ఈ ఏడాది ఐపీఎల్లో టైటిల్ సాధించే సత్తా ఉన్న టీమ్లలో కోల్కతా నైట్ రైడర్స్, ముంబై ఇండియన్స్ ముందు వరసలో ఉన్నాయి. అత్యంత బలమైన టీమ్లుగా అంచనాలు నెలకొల్పాయి. ఈ రెండు టీమ్లు బుధవారం జరిగే మ్యాచ్లో పోటీపడబోతున్నాయి. కింగ్ ఖాన్ షారూక్ టీమ్ అయిన కోల్కతా ప్లే ఆఫ్స్కు వెళ్లే వాటిల్లో కచ్చితంగా ఉండే టీమ్. 2012, 14 సీజన్లలో చాంపియన్గా నిలిచింది. గత సీజన్లో మాత్రం ఐదో స్థానంతో సరిపెట్టుకుంది.
ఎన్నో అంచనాలు రేకెత్తించిన ముంబై టీమ్ ఈ ఐపీఎల్ సీజన్ను పేలవంగా ప్రారంభించింది. తొలి మ్యాచ్లో చెన్నై చేతిలో ఓటమి పాలైంది. బ్యాటింగ్, బౌలింగ్ విభాగాల్లో విఫలమైంది. దీంతో రెండో మ్యాచ్లో ఎలాగైనా గెలవాలనే పట్టుదలతో ఉంది. ఇక, ఐపీఎల్ను విజయంతో ప్రారంభించాలని కోల్కతా జట్టు కృతనిశ్చయంతో ఉంది. బుధవారం సాయంత్రం 7:30 గంటలకు అబుదాబిలోని షేక్ జాయేద్ స్టేడియంలో ఈ రెండు జట్ల మధ్య తొలి మ్యాచ్ జరగబోతోంది. మరి, సమఉజ్జీల మధ్య జరుగుతున్న ఈ మ్యాచ్లో విజయం ఎవరిని వరిస్తుందో చూడాలి.
కోలకతా నైట్ రైడర్స్ బలాలు
గత సీజన్లో పేలవ ఆటతీరుతో నిరాశపరిచిన కోలకతా టీమ్ ఈ సారి భారీ ప్రణాళికతో బరిలోకి దిగుతోంది. ముచ్చటగా మూడోసారి టైటిల్ చేజిక్కించుకోవాలని ఊవిళ్లూరుతోంది. కోల్కతా జట్టుకు మంచి బ్యాటింగ్ లైనప్ ఉంది. ఇయాన్ మోర్గాన్, పాట్ కమిన్స్ చేరిక జట్టుకు మరింత బలాన్ని చేకూర్చింది. కమిన్స్ కోసం కోల్కతా జట్టు ఏకంగా రూ.15.5 కోట్లు ఖర్చు పెట్టింది. ఇక, టీ-20 స్టార్లు ఆండ్రీ రస్సెల్, సునీల్ నరైన్ వంటి ఆల్రౌండర్లు ఒంటి చేత్తో మ్యాచ్ను మలుపు తిప్పగల సమర్థులు.
దినేశ్ కార్తీక్, శుభ్మన్ గిల్, నితీష్ రాణా వంటి బ్యాట్స్మెన్ కారణంగా ఎనిమిదో స్థానం వరకు కోల్కతా బ్యాటింగ్లో డెప్త్ ఉంది. స్పిన్ విభాగంలో నరైన్, కుల్దీప్ వంటి అంతర్జాతీయ స్థాయి బౌలర్లు ఉన్నారు. ఇక, కమిన్స్ చేరికతో పేస్ బౌలింగ్ విభాగం కూడా బలపడింది. బ్రెండన్ మెకల్లమ్ కోచ్గా ఉండటం అదనపు బలం.
బలహీనతలు
కోల్కతా జట్టు ఎక్కువగా ఆండ్రీ రస్సెల్, సునీల్ నరైన్ మీదే ఆధారపడుతోంది. వారు విఫలమైతే గాడి తప్పుతోంది. ఈ సీజన్లో రస్సెల్ బౌలింగ్ చేయడంపై సందేహాలు నెలకొన్నాయి. కెప్టెన్ దినేష్ కార్తీక్ జట్టుపై తనదైన ముద్రను వేయలేకపోతున్నాడు. బ్యాటింగ్ విభాగంలో అందరూ యంగ్స్టర్లే ఉన్నారు. అనుభవజ్ఞుడు లేని లోటు స్పష్టంగా కనిపిస్తోంది. ఇక, భారీ మొత్తం వెచ్చించి దక్కించుకున్న కమిన్స్ సరైన ఫామ్లో లేడు. ఇటీవల జరిగిన ఇంగ్లండ్-ఆస్ట్రేలియా సిరీస్లో తేలిపోయాడు. నెమ్మదిగా ఉండే యూఏఈ పిచ్లపై కమిన్స్ ఎలా రాణిస్తాడో చూడాలి.
కోల్కతా జట్టు (అంచనా)
దినేశ్ కార్తీక్ (కెప్టెన్), ఇయాన్ మోర్గాన్, సునీల్ నరైన్, ఆండ్రూ రస్సెల్, నితీశ్ రాణా, రాహుల్ త్రిపాఠి, రింకూ సింగ్, శుభ్మన్ గిల్, సిద్ధేశ్ లాడ్, టామ్ బాంటన్, ప్యాట్ కమిన్స్
ముంబై ఇండియన్స్ బలాలు
ఎన్నో అంచనాల మధ్య బరిలోకి దిగిన తొలి మ్యాచ్లో ముంబై టీమ్ విఫలమైంది. అయితే ఈ సీజన్లో బలమైన జట్లలో ముంబై ఒకటి అనే విషయంలో ఎటువంటి సందేహమూ లేదు. ముంబై టీమ్లో రోహిత్ శర్మ, డికాక్, హార్దిక్ పాండ్యా, కీరన్ పోలార్డ్ వంటి మ్యాచ్ విన్నర్లు ఉన్నారు. వారిలో ఏ ఇద్దరూ రాణించిన ముంబై టీమ్కు తిరుగుండదు. తొలి మ్యాచ్ నుంచి పాఠాలు నేర్చుకున్న ముంబై టీమ్ కోల్కతాతో మ్యాచ్లో ఎలాగైనా గెలిచి పరువు దక్కించుకోవాలని భావిస్తోంది.
బలహీనతలు
చెన్నైతో జరిగిన తొలి మ్యాచ్లో ముంబై బ్యాటింగ్, బౌలింగ్ పేలవంగా సాగింది. స్టార్ ఆటగాళ్లెవరూ రాణించలేదు. చెన్నై కట్టుదిట్టంగా బౌలింగ్ చేసిన పిచ్పై ముంబై బౌలర్లు తేలిపోయారు. పిచ్ను అర్థం చేసుకోవడంలో విఫలమయ్యారు. ముఖ్యంగా స్పిన్ బౌలింగ్ను ఎదుర్కోవడంలో తడబడ్డారు. స్పిన్కు అనుకూలిస్తున్న యూఏఈ పిచ్లపై ముంబై స్పిన్నర్లు రాణించలేకపోతున్నారు. క్వాలిటీ స్పిన్నర్ లేకపోవడం ముంబైకున్న పెద్ద లోటు.
ముంబై జట్టు (అంచనా)
రోహిత్ శర్మ (కెప్టెన్), డికాక్, సూర్యకుమార్ యాదవ్, సౌరబ్ తివారి, హార్దిక్ పాండ్యా, కీరన్ పోలార్డ్, కృనాల్ పాండ్యా, ప్యాటిన్సన్, బుమ్రా, రాహుల్ చాహర్, బౌల్ట్
మ్యాచ్ ఫేవరెట్
సమఉజ్జీలుగా బరిలోకి దిగుతున్న ఈ రెండు జట్లకూ సమాన అవకాశాలున్నాయి. టీ20లకు సరిపోయే పవర్ హిట్టర్లతో కోల్కతా టీమ్ బలంగా ఉంది. బౌలర్లు కూడా అంచనాలు అందుకుంటే ముంబైపై విజయం ఖాయం. మరోవైపు తొలి మ్యాచ్ తప్పులను పునరావృతం చేయకుండా ముంబై టీమ్ అంచనాల మేరకు ఆడితే కోల్కతాను నిలువరించడం పెద్ద కష్టం కాదు.
