సూపర్ స్టార్ రజనీకాంత్ పేరు చెప్పగానే ఆయన ఫాన్స్ పూనకంతో ఊగిపోతారు. ఆయనకు భారత దేశంలోనే కాదు ఇతర దేశాల్లో కూడా అధిక సంఖ్యలో ఫాలోయింగ్ ఉన్న సంగతి తెలిసిందే. అలాంటి స్టార్ హీరోకు ఈ మధ్య కాలం కలసి రావడం లేదు. రజనీకు శంకర్ దర్శకత్వం వహించిన ‘రోబో’ సినిమా తర్వాత ఆ స్థాయికి తగ్గట్లు సినిమాలు విజయం కావట్లేదు. రజనీ వరుసపెట్టి సినిమాలు చేస్తున్నా విజయం మాత్రం అందుకోవట్లేదు. ‘కబాలి, ‘కాలా’, రోబో-2, పేట్టా’ లాంటి సినిమాలు బాక్స్ ఆఫీస్ వద్ద బోల్తా కొట్టాయి. అయితే మురగదాస్ దర్శకత్వంలో వచ్చిన ‘దర్బార్’ పర్లేదనిపించింది. కానీ రజనీ స్థాయికి తగ్గ హిట్ కాదు ఆ సినిమా.
ప్రస్తుతం రజనీకాంత్ శివ దర్శకత్వంలో ‘అన్నాత్తే’ అనే సినిమాలో నటిస్తున్నారు. ఈ సినిమాను సన్ పిక్చర్స్‌ సంస్థ నిర్మిస్తోంది. ఇందులో ప్రతినాయకుడిగా బాలీవుడ్ ప్రముఖ నటుడు జాకీ ష్రాఫ్ నటిస్తున్నారు. కీర్తి సురేశ్‌, మీనా, ఖుష్బూలు కూడా కీలక పాత్రలు పోషిస్తున్నారు. ఈ సినిమా షూటింగ్ కరోనా కారణంగా నిలిచిపోయింది. మన దేశంలో అన్ లాక్ ప్రక్రియ మొదలైన విషయం తెలిసిందే. ఇటీవల సినిమా షూటింగ్స్ కు కేంద్ర ప్రభుత్వం అనుమతి ఇచ్చింది. లాక్ డౌన్ కారణంగా ఇన్నాళ్లు నిలిచిన ఈ సినిమా పనులు ఇటీవలే మొదలయ్యాయి. అయితే కరోనా మహమ్మారి పూర్తిగా తగ్గే వరకు రజినీకాంత్ ఇంటికే పరిమితం అవ్వనున్నారు.
‘అన్నాత్తే’ సినిమా షూటింగ్ లో రజనీ జనవరి నెలాఖరులో పాల్గొంటారని చిత్ర యూనిట్ తెలిపింది. ఈ గ్యాప్ లో రజినీ తన సినిమాకు సబంధించి ఆయనే స్వయంగా డైలాగ్స్ రాసుకోవాలని అనుకుంటున్నారు. వెంటనే ఈ విషయాన్ని దర్శకుడు శివకు తెలియజేసి డైలాగ్స్ రాసే పనిలో పడ్డారు సూపర్ స్టార్ రజనీ. కీలక సన్నివేశాలకు, హీరో ఎలివేషన్ సన్నివేశాలకు ఆయన డైలాగ్స్ రాస్తున్నారు. చూడాలి రజనీ రాస్తున్న డైలాగ్స్ ఈ సినిమాకు ఎంత ప్లస్ అవుతోందో మరి. ఆయన ఫాన్స్ కూడా ఈ సినిమాపై నమ్మకంతో ఉన్నారు. ఈసారి పక్కగా రజనీ పెద్ద హిట్ కొడతాడని అంచనాలున్నాయి.
