ఏపీలో అభివృద్ధికి మెగాస్టార్ చిరంజీవి ఫిదా అయ్యారు. ఏపీలో అన్ని రంగాల్లోనూ అభివృద్ధి చెందుతోందని, గతంతో పోలిస్తే రాష్ట్రంలో అనేక రంగాల్లో పురోగతి స్పష్టంగా కనిపిస్తోందన్నారు. తూర్పుగోదావరి జిల్లా కపిలేశ్వరపురంలో ఆయన పర్యటించారు. ఈ సందర్భంగా జీఎస్ఎల్ ఆస్పత్రి, సూర్య ఛారిటబుల్ ట్రస్ట్ సంయుక్త ఆధ్వర్యంలో నిర్మించిన నూతన హెల్త్ కేర్ సెంటర్ను ఆయన ఘనంగా ప్రారంభించారు.
ఈ కార్యక్రమంలో పాల్గొని మాట్లాడిన చిరంజీవి.. ఏపీలో జరుగుతున్న అభివృద్ధి పనులపై ఆశ్చర్యం వ్యక్తం చేశారు. చాలా కాలం తర్వాత తాను ఏపీకి వచ్చానని, ఇక్కడికి వచ్చాక రోడ్లు సహా పలు రంగాల్లో ఎంతో మార్పు వచ్చిందని ఆయన పేర్కొన్నారు. గతంతో పోలిస్తే రోడ్లు చాలా మెరుగ్గా ఉన్నాయని, రాష్ట్రంలో పరిపాలన కూడా ఎంతో మెరుగవుతోందని కొనియాడారు.
ఇదే వేదికగా ఆరోగ్య రంగానికి సంబంధించి కీలక ప్రశంసలు గుప్పించారు. రాష్ట్రంలో వైద్య, ఆరోగ్య పరిస్థితులు ఎంతో మెరుగవుతున్నాయని, ఆరోగ్య రంగంలో వస్తున్న మార్పులు అభినందనీయమని మెచ్చుకున్నారు. రాష్ట్రం ఇలాగే మరింత అభివృద్ధి చెందాలని, ప్రజలందరికీ మరింత మేలు జరగాలని ఆయన ఆకాంక్షించారు. మెగాస్టార్ స్వయంగా రాష్ట్రంలోని అభివృద్ధి పనులను ప్రశంసించడం ప్రస్తుతం రాజకీయ, సినీ వర్గాల్లో చర్చనీయాంశంగా మారింది.
సామాజిక సేవా కార్యక్రమాల్లో ఎప్పుడూ ముందుండే మెగాస్టార్ చిరంజీవి, గ్రామీణ ప్రాంత ప్రజలకు మెరుగైన వైద్య సేవలు అందుబాటులోకి వస్తుండటాన్ని ఈ సందర్భంగా ప్రత్యేకంగా అభినందించారు. కార్పొరేట్ వైద్యం నగరాలకే పరిమితం కాకుండా ఇలాంటి మారుమూల ప్రాంతాలకు కూడా విస్తరించడం ఎంతో సంతోషకరమని పేర్కొన్నారు. వైద్య రంగంలో ఇలాంటి సేవా దృక్పథం మరింత మందికి స్ఫూర్తిదాయకం కావాలని ఆయన ఆకాంక్షించారు.











