శ్రీకాళహస్తి ఎమ్మెల్యే బియ్యపు మధుసూదన రెడ్డి. జగన్ పట్ల భక్తికి, దూకుడుతనానికి, అత్యుత్సాహానికి ఆయన పెట్టింది పేరు. కరోనా సీజన్ మొదలైన తొలినాళ్ల నుంచి.. తన అత్యుత్సాహంతో.. కరోనా సూపర్ స్ప్రెడర్ గా మచ్చ తెచ్చుకున్న మధుసూదన్ రెడ్డి తీరు ఏ మాత్రం మారలేదు. ఇప్పుడు.. ప్రత్యేకించి, రోజుకు పదివేల కేసుల వంతున ఏపీ రాష్ట్రంలో కరోనా అత్యంత వేగంగా విస్తరిస్తున్న రోజుల్లో కూడా ఆయన అదే అత్యుత్సాహం ప్రదర్శిస్తున్నారు. కరోనా సూపర్ స్ప్రెడర్ గా మరోమారు కీర్తి తెచ్చుకుంటున్నారు.
ఇంతకూ ఏం జరిగిందంటే.. వైఎస్సార్ ఆసరా వారోత్సవాల సందర్భంగా నియోజకవర్గంలో కార్యక్రమం నిర్వహించారు. ఎమ్మెల్యే గనుక.. ఆయన కూడా స్వయంగా ఆ కార్యక్రమాల్లో పాల్గొన్నారు. ఈ రోజుల్లో ప్రభుత్వ కార్యక్రమాలను కూడా చాలా పరిమిత సంఖ్యలో జనాన్ని పోగేసి జాగ్రత్తలతో నిర్వహిస్తున్నారు. అయితే మధుసూదన్ రెడ్డి నిర్వహించిన కార్యక్రమంలో మాత్రం.. ఎలాంటి జాగ్రత్తలు తీసుకోలేదు. ఎమ్మెల్యే వెంట ఉన్న కొద్ది మంది మాత్రమే మాస్కులు ధరించారు.
ఎమ్మెల్యే సహా.. అనేక మంది అసలు మాస్కులు ధరించలేదు. దీనికి తోడు గుంపులు గుంపులుగా ఎమ్మెల్యే చుట్టూ జమ అయ్యారు. పైగా స్కూలు పిల్లలను కూడా గుంపులుగా ఆ కార్యక్రమానికి రప్పించారు. దారుణం ఏంటంటే.. ఆ పిల్లల్లో ఎవ్వరికీ మాస్కులు లేవు.
ఇదంతా ఒక ఎత్తు.. కార్యక్రమంలో అత్యుత్సాహం ఉప్పొంగిపోయి.. ఎమ్మెల్యే మధుసూదన రెడ్డి బ్రేక్ డ్యాన్సులు చేయడం ఒక ఎత్తు. అనుచరులు ఉబ్బెత్తిస్తోంటే.. వారితో పదం కలిపి స్టెప్పులు వేయడం ప్రారంభించిన ఎమ్మెల్యే మధుసూదన్ రెడ్డి.. స్కూలు పిల్లలతో కలిసి అదే డ్యాన్సులను కొనసాగించారు.
అత్యుత్సాహం తొలిసారి కాదు..
మధుసూదన్ రెడ్డిలో అత్యుత్సాహం.. కరోనా జాగ్రత్తలను పట్టించుకోకుండా.. అది వెల్లువలా బయటకు రావడం.. ఇది తొలిసారి కాదు. గతంలో కరోనా వ్యాపిస్తున్న తొలిరోజుల్లోనే పేదలకు సాయం అందించినప్పుడు మధుసూదన రెడ్డి కూడా చాలా చురుగ్గా ఉన్నారు. విరాళాలు వచ్చిన సొమ్ములతో పాటు భారీగా తన సొంతసొమ్ము వెచ్చించి నియోజకవర్గంలో పేదలకు దినుసులు, కూరగాయలు పంచారు. ఈ ప్రయత్నాన్ని ఖచ్చితంగా అభినందించాల్సిందే. అయితే ఈ వితరణ కార్యక్రమాన్ని ఒక ఉత్సవంలాగా భారీ ఊరేగింపులతో.. ఫ్లెక్సిలు, పదుల సంఖ్యలో ట్రాక్టర్లతో ఊరేగింపులు చేయడం చాలా వివాదాస్పదం అయింది. నియోజకవర్గ పరిధిలో పలువురు అధికార్లకు కూడా కరోనా వచ్చింది. శ్రీకాళహస్తి నియోజకవర్గంలో కరోనా భారీగా విజృంభించింది. ఊరంతా రెడ్ జోన్ చేశారు. దీనికంతా ఎమ్మెల్యే మధు కారణం అని ప్రచారం జరిగింది. ఆయన ఊరేగింపులు.. ఆ తర్వాత.. అనేక మంది వైసీపీ ఎమ్మెల్యేలకు అలాంటి ప్రచార కాంక్షతో ఊరేగింపులు చేయడానికి స్ఫూర్తినిచ్చాయి.!
ఎమ్మెల్యే దంపతులకు కూడా సోకింది, కానీ..
ఊరంతా కరోనా రావడానికి తన ఊరేగింపులు కారణం కాదని ప్రజల్ని నమ్మించడానికి మధు చాలా కష్టపడాల్సి వచ్చింది. పేదలకు సాయం చేస్తే నా వల్లే వచ్చిందంటారా అంటూ ఆయన పదేపదే చెప్పుకున్నారు. కానీ నింద అలాగే ఉండిపోయింది. ఈలోగా ఎమ్మెల్యే మధు, ఆయన భార్యకు కూడా కరోనా సోకింది. ఇద్దరూ తిరుపతిలో కికిత్స తీసుకున్నారు. కుదుటపడ్డారు. ఎమ్మెల్యే మళ్లీ తన మునుపటి దూకుడులోకి వచ్చేశారు. వైఎస్సార్ ఆసరా కార్యక్రమాన్ని భారీగా నిర్వహించారు. కరోనా జాగ్రత్తల జోలికి వెళ్లకుండా ఎడాపెడా నిర్వహించారు. సోషల్ డిస్టెన్సు అనే మాటను తగలేశారు. మాస్కులు ధరించాలనే నిబంధనను తుంగలో తొక్కారు. స్కూలు పిల్లలను కూడా గుంపులుగా పిలిపించి.. కార్యక్రమం నిర్వహించారు. కార్యక్రమాల ఆర్భాటానికి ఇవన్నీ అవసరం అని ఎమ్మెల్యే అనుకోవచ్చు. కానీ.. సోషల్ డిస్టెన్స్ గానీ.. కనీసం మాస్కులు గానీ.. పాటించాలనే జాగ్రత్త తీసుకోకపోవడమే తప్పు.
నారా లోకేష్ ఫైర్
ఈ వ్యవహారం తన దృష్టికి రాగానే లోకేష్ దానిని తీవ్రంగా పరిగణించారు. మధుసూదనరెడ్డి పిల్లలతో కలిసి బ్రేక్ డ్యాన్సులు చేసిన వ్యవహారంపై తెలుగుదేశం పార్టీ ప్రధాన కార్యదర్శి నారా లోకేష్ కూడా ఫైర్ అయ్యారు. ఆయన ట్విటర్ లో ఘాటు విమర్శలతో విరుచుకుపడ్డారు. ‘‘మాస్కుల్లేవు, సోషల్ డిస్టెన్సింగ్ లేదు.. రాష్ట్రంలో రోజుకు పదివేల కేసులతో ప్రమాద ఘంటికలు మోగుతున్న వేళ.. వైఎస్సార్ సీపీ ఎమ్మెల్యేలు సిగ్గులేకుండా సూపర్ స్ప్రెడర్లుగా వ్యవహరిస్తున్నారంటూ రెచ్చిపోయారు. తనకు కరోనా పాజిటివ్ వచ్చి బయటపడినా కూడా.. ఎమ్మెల్యే మధుసూదన రెడ్డి పాఠం నేర్చుకోలేదని విమర్శించారు.
ఎమ్మెల్యే మధుకు ఇంత ధీమా తగదు
ఎమ్మెల్యే మధుసూదన రెడ్డి.. తనకు పాజిటివ్ వచ్చి తగ్గిపోయింది గనుక.. మళ్లీ కరోనా రాదనే ధీమాతో ఉండవచ్చు. కానీ.. ఇలాంటి కార్యక్రమాలు నిర్వహించేప్పుడు.. తన అత్యుత్సాహానికి ఒక పరిమితి పెట్టుకోవాలి. ఆయనకు మళ్లీ రాకపోవచ్చు. కానీ.. ఇలా నిబంధనలు పాటించకుండా మాస్కుల్లేకుండా గుంపులుగా మందిని పోగేసి కార్యక్రమం నిర్వహిస్తే.. ఏ ఒక్కరినుంచి అయినా.. అనేక మందికి వ్యాపించే ప్రమాదం చాలా ఉంటుంది. కరోనాకు ఆయనే కారణం అవుతున్నారనే విమర్శలు మళ్లీ మళ్లీ వస్తాయి. వైఎస్సార్ ఆసరా అనేది ప్రజల మంచి కోరే గొప్ప కార్యక్రమం అయినప్పుడు.. దాన్ని ఎటూ ప్రజలు గుర్తిస్తారు. ఇలాంటి ఆర్భాటాలు, ప్రమాదకరమైన కార్యక్రమాలు అనవసరం. ఆ సంయమనం ఎమ్మెల్యే కలిగి ఉండాలి.
No masks. No social distancing.
Even though AP is clocking 10,000 #Covid19 cases a day, YSRCP legislators continue to shamelessly play the role of super spreaders. Ironically this MLA, B Madhusudhan Reddy of Srikalahasthi tested positive earlier & hasn’t learnt his lessons yet. pic.twitter.com/raRyJi2g68— Lokesh Nara (@naralokesh) September 13, 2020
