వైవిధ్యమైన కథాంశాల్ని ఇష్టపడే ప్రేక్షకులకు ఇప్పుడు ఒకటే ఆప్షన్ ఓటీటీ. అందులో భాషతో సంబంధం లేకుండా అందరినీ అలరిస్తోన్న మలయాళ ఫ్యామిలీ ఎంటర్ టైనర్ ‘ఇట్టిమాణి మేడిన్ చైనా’. కంప్లీట్ యాక్టర్ మోహన్ లాల్ నటించిన కామెడీ ఎంటర్ టైనర్ ఇది. ఆయన ఇందులో తండ్రీ, కొడుకులుగా(తండ్రి పాత్ర ఫ్లాష్ బ్యాక్ లో మాత్రమే కనిపిస్తుంది) నటించడం విశేషం.
కథేంటి?: చైనాలో పుట్టి, పదేళ్ళ వయసులో కేరళకు వలస వచ్చిన యువకుడు ఇట్టిమాణి. తండ్రి ఆస్తిపాస్థులేమీ ఇవ్వకపోయినప్పటికీ.. తనకున్న తెలివితేటలతో .. కేటరింగ్, నకిలీ వస్తువుల్ని అమ్మే వ్యాపారాన్ని నిర్వహిస్తూ… అమ్మతో జీవిస్తుంటాడు. అతడికి వయసు మీద పడుతున్నా.. పెళ్ళి మాత్రం కాదు. ఎన్ని సంబంధాలు వస్తున్నప్పటికీ వాటికి అతడి బిజినెస్ అడ్డుపడుతుంటుంది.
అతడికున్న మరో అలవాటు ఏంటంటే.. కమీషన్ లేనిదే అతడు ఏ పనీ చేయడు. చివరికి అతడి అమ్మ హాస్పిటల్ ఫీజు లో కూడా కమీషన్ తీసుకుంటాడు. అలాంటి ఇట్టిమాణి .. తన అమ్మ స్నేహితురాలైన అన్నమ్మకు సహాయం చేయాలనుకుంటాడు. ఆమెకు ముగ్గురు కొడుకులు. వారంతా విదేశాల్లో ఉంటూ… ఆమెను నిర్లక్ష్యం చేస్తుంటారు. ఆమెకు గుండెపోటు వచ్చిందని తెలిసినప్పటికీ పట్టించుకోరు. అందుకే ఇట్టిమాణి .. అన్నమ్మ కొడుకులకు ఓ షాక్ ట్రీట్ మెంట్ఇస్తాడు. చివరికి ఆ బిడ్డల్లో మార్పు తీసుకొస్తాడు.
ఎలా తీశారు?: ఉద్యోగాల పేరుతో ఉన్న ఊరిని, కన్నవారిని వదిలేసి విదేశాల్లో సెటిల్ అయిపోయి, తల్లిదండ్రుల్ని నిర్లక్ష్యం చేసేవారికి ఈ సినిమా ఒక గుణపాఠం. ఎంత ఉద్యోగంలో బిజీ గా ఉన్నప్పటికీ కన్నవారితో మాట్లాడడం పిల్లల బాధ్యత. అందులో నిర్లక్ష్యం వహిస్తే.. ఎలాంటి వారికైనా తీరని వేదన. పర్టిక్యులర్ గా ఈ పాయింట్ ను చాలా అద్భుతంగా ప్రజెంట్ చేశాడు కొత్త దర్శకుడు జిబి జోజు. ఇష్యూ సీరియసే అయినప్పటికీ ..చేదు గుళికకు షుగర్ కోటింగ్ ఇచ్చినట్టు .. కామెడీ తో పరిష్కార మార్గం చూపించాడు దర్శకుడు . హ్యూమన్ రిలేషన్స్, ఫ్యామిలీ ఎమోషన్స్ తో సినిమాకి మంచి సెంటిమెంట్ టచ్ ఇచ్చాడు. ఇట్టిమాణిగా మోహన్ లాల్ జీవిస్తే… అన్నమ్మగా రాధికా శరత్ కుమార్ తన అభినయంతో మెప్పించింది.
హైలైట్స్: శతమానం భవతి, ప్రతిరోజూ పండగే లాంటి తెలుగు సినిమాలు కూడా ఇదే పాయింట్ ను టచ్ చేశాయి. అయితే వాటికీ ‘ఇట్టిమాణి మేడిన్ చైనా’ కి ట్రీట్ మెంట్ లో మాత్రం చాలా వ్యత్యాసం ఉంటుంది. అసలు మోహన్ లాల్ రాధిక కొడుకులకు ఇచ్చే షాక్ ట్రీట్ మెంటే ఈ సినిమాకి హైలైట్. ప్రేక్షకులకు కూడా అది షాకిస్తుంది. మలయాళ క్రైస్తవ సంస్కృతి, సాంప్రదాయాల్ని ఈ సినిమాలో చాలా బాగా ప్రెజెంట్ చేశారు. అది సినిమాకి మంచి బలంగా నిలుస్తుంది.
నటీనటులు : మోహన్ లాల్, రాధికా శరత్ కుమార్, హనీరోజ్, అజు వర్గీస్, కే.పి.ఎ.సి లలిత, సలీమ్ కుమార్, హరీశ్ కనారణ్, ధర్మజన్, సిజాయ్ వర్గీస్, వినూ మోహన్ , కైలాష్ తదితరులు
నిర్మాణం : ఆంటనీ పెరుంబావూర్
దర్శకత్వం : జిబి జోజు
ఎక్కడచూడాలి?: అమెజాన్ ప్రైమ్
ఒక్కమాటలో : హార్ట్ టచింగ్ ఎంటర్ టైనర్
భాష : మలయాళం
రేటింగ్ : 3.5 / 5
-ఆర్కే











