తెలుగుదేశం పార్టీకి కొత్త సారథులు రాబోతున్నారు. 2019 ఎన్నికల్లో ఓడిపోయాక డీలాపడిపోయిన క్యాడర్ లో జోష్ నింపేందుకు యువరక్తానికి పెద్దపీట వేసేందుకు టీడీపీ అధిష్టానం తీవ్ర కసరత్తు చేసింది. ఎన్నికల అనంతరం చాలా నియోజకవర్గాల్లో ఇన్ ఛార్జిలు కూడా లేకుండా పోయారు. దీంతో టీడీపీ క్యాడర్ నిస్తేజంగా తయారైంది. పార్టీ అధినేత పిలుపు ఇచ్చినా క్యాడర్ ను క్షేత్రస్థాయిలో కూడగట్టి నడిపించే నాయకులు కరవయ్యారు.
ఇవన్నీ గమనించిన టీడీపీ అధినేత గత మూడు నెలలుగా తీవ్ర కసరత్తు చేసి ఓ లిస్ట్ రెడీ చేశారు. రాష్ట్ర టీడీపీ అధ్యక్షుడి నుంచి అన్ని జిల్లాల పార్టీ అధ్యక్షులు, తెలుగు యువత అధ్యక్ష పదవితోపాటు దాదాపు 300 పార్టీ పదవులను కష్టపడే యువ నేతలకు ఇవ్వాలని పార్టీ అధినేత భావిస్తున్నారట.
ఇందులో భాగంగానే ఐ వీ ఆర్ ఎస్ ద్వారా ప్రతీ కార్యకర్త అభిప్రాయాలను స్వీకరించి నియోజకవర్గంతోపాటు, జిల్లా పార్టీ అధ్యక్షుడిగా ఎవరు ఉంటే బాగుంటుందో ప్రతి కార్యకర్తను అడగి తెలుసుకున్నారు. సేకరించిన మొత్తం సమాచారాన్ని వడగట్టి యువ నేతలను ఎంపిక చేయనున్నారు.
టీడీపీ అధ్యక్ష పదవి అచ్చెన్నాయుడిని వరిస్తుందా?
టీడీపీ అధ్యక్ష పదవి రేసులో అచ్చెన్నాయుడి పేరు ప్రధానంగా వినిపిస్తోంది. అధికార వైసీపీ తీవ్ర ఇబ్బందులు పెట్టినా అచ్చెన్నాయుడు పార్టీ లైన్ దాటలేదు. దీంతో అచ్చెన్నాయుడు అయితే ఉత్తరాంధ్రలో పార్టీని ముందుకు నడిపించడంతోపాటు బీసీ సామాజిక వర్గానికి పార్టీ అధ్యక్ష పదవి ఇచ్చినట్టవుతుందని చంద్రబాబునాయుడు భావిస్తున్నారని సమాచారం. అందుకే సీనియర్ నాయకుడు కళా వెంకట్రావును తప్పించి అచ్చెన్నాయుడుకు పగ్గాలు అప్పగించాలని టీడీపీ అధిష్టానం యోచిస్తోంది.
అధికార వైసీపీని ధీటుగా ఎదుర్కోవాలంటే టీడీపీ రాష్ట్ర అధ్యక్షుడిగా సరైన వాగ్దాటి ఉన్న వ్యక్తి అవసరం అని పార్టీ భావిస్తోంది. నాలుగేళ్ల నుంచి రాష్ట్ర టీడీపీ అధ్యక్షుడిగా కళా వెంకట్రావు ఉన్నా ఆయన పెద్దగా పార్టీని నడిపించింది ఏమీ లేదు. ఆయన సౌమ్యుడు కావడం, వయసు పైబడటంతో ప్రస్తుత పరిస్థితుల్లో అచ్చెన్నాయుడే సరైన అభ్యర్థి అనేది చంద్రబాబునాయుడు ఆలోచనగా ఉందని సమాచారం.
తెలుగుయువత అధ్యక్షుడిగా పరిటాల శ్రీరామ్
2019 ఎన్నికలకు ముందే రాష్ట్ర తెలుగుయువత అధ్యక్షుడిగా పరిటాల శ్రీరామ్ పేరు తెరమీదకు వచ్చింది. అయితే అప్పుడే విజయవాడకు చెందిన దేవినేని అవినాష్ పార్టీలోకి రావడంతో ఆ పదవిని అతనికి కట్టబెట్టాల్సి వచ్చింది. వైసీపీని తట్టుకోవాలంటే టీడీపీ క్యాడర్‌లో జోష్ తెప్పించగల నేత పరిటాల శ్రీరామ్ మాత్రమే.
అటు రాయలసీమతోపాటు, ఆంధ్రాలోనూ పరిటాల అభిమానులు భారీగా ఉన్నారు. పరిటాల శ్రీరామ్ కు తెలుగుయువత పగ్గాలు అప్పగిస్తే యూత్ లో జోష్ వస్తుందని, అది పార్టీకి కలసి వస్తుందనే అంచనాలు ఉన్నాయి. తాజాగా వేయబోయే కమిటీల్లో తెలుగు యువత అధ్యక్షుడిగా పరిటాల శ్రీరామ్ పేరే ప్రముఖంగా ఉంది. వేరే ఎవరికి ఇచ్చినా ఆ జిల్లాకే పరిమితం అవుతున్నారని, ఇక పరిటాల శ్రీరామ్‌ను రంగంలోకి దింపాలని పార్టీ అధిష్టానం భావిస్తోందని తెలుస్తోంది.
దసరాకు కమిటీలు విడుదల చేస్తారా?
టీడీపీలో కమిటీల నియామకం కసరత్తు పూర్తయింది. స్టేట్ పదవుల నుంచి గ్రామ స్థాయి వరకూ ప్రతి పదవి ఎవరికి ఇవ్వాలనే విషయంలో తీవ్ర కసరత్తు చేసి ఓ లిస్ట్ రెడీ చేశారు. ప్రస్తుతం కరోనా తీవ్రంగా వ్యాపిస్తున్న నేపథ్యంలో కొద్ది రోజులు ఆగి, పదవులు అప్పగించాలని పార్టీ పెద్దలు భావిస్తున్నారు. దసరా నాటికి పార్టీ పదవులు ఇచ్చే అవకాశాలు కనిపిస్తున్నాయి.
ఇప్పటికే కరోనా కారణంగా 6 నెలలు ఆలస్యం జరిగిపోయింది. ఇప్పటికీ క్యాడర్ కు దిశా నిర్ధేశం చేసే వారే కరవయ్యారు. ఇదే పరిస్థితి ఎక్కువ రోజులు కొనసాగితే పార్టీ దెబ్బతినే ప్రమాదం ఉందని గ్రహించిన చంద్రబాబు, ఇక సాధ్యమైనంత త్వరలో యువనేతలను రంగంలోకి దింపనున్నారని తెలుస్తోంది.
