తెలంగాణలో బతుకమ్మ సంబురాలను ఆట పాటలతో మహిళలు ఎంత ఘనంగా జరుపుకుంటారో తెలిసిందే. తెలంగాణ సంస్కృతీ సంప్రదాయాలను చాటే బతుకమ్మ సంబురాలు ఈ రోజు(శుక్రవారం) నుంచి ప్రారంభం కానున్నాయి. తెలంగాణ ప్రత్యేక రాష్ట్రం ఏర్పడిన తరువాత నుంచి బతుకమ్మ పండుగను అధికారికంగా తెలంగాణ ప్రభుత్వం నిర్వహిస్తుంది. ఈ పండుగను బాలికలు, మహిళలు, యువతులు ఎంతో ఇష్టంగా జరుపుకుంటారు. ఈ రోజు ఎంగిలి పువ్వు బతుకమ్మను జరుపుకుంటారు. చివరిరోజు సద్దుల బతుకమ్మతో బతుకమ్మ పండుగ ముగుస్తుంది. రకరకాల పూలతో బతుకమ్మను పేర్చి, సంప్రదాయ వస్త్రాలను ధరించి మహిళలు, యువతులు, బాలికలు ఈ పండుగను జరుపుకుంటారు.
ఇళ్ల వద్దనే జరుపుకోండి..
అయితే కరోనా వైరస్ వ్యాప్తి నేపథ్యంలో ఈ సారి బతుకమ్మ ఏర్పాట్లను ప్రభుత్వం చేయడంలేదు. తమ ఇళ్ల వద్దనే బతుకమ్మను జరుపుకోవాలని భావిస్తోంది. బతుకమ్మ వేడుకల్లో పాల్గొనే సమయంలో తప్పకుండా మాస్కులను ధరించాలని తెలంగాణ జాగృతి అధ్యక్షురాలు, ఎమ్మెల్సీ కల్వకుంట్ల కవిత సూచించారు. కరోనా నిబంధనలు పాటిస్తూ, భౌతిక దూరం పాటిస్తూ పండుగ జరుపుకోవాలని తెలంగాణ ఆడపడుచులను ఆమె కోరారు. తొలిరోజు ఉత్సవాల్లో బతుకమ్మను పేర్చి గౌరమ్మను పూజిస్తారు. ఇలా తొమ్మిది రోజులపాటు పండుగను జరుపుకుంటారు. ఒక్కోరోజు ఓ రకమైన నైవేథ్యాన్ని సమర్పిస్తారు.
1. ఎంగిలి పువ్వు బతుకమ్మ
2. అటుకుల బతుకమ్మ
3. ముద్దపప్పు బతుకమ్మ
4. నానే బియ్యం బతుకమ్మ
5. అట్ల బతుకమ్మ
6. అలిగిన బతుకమ్మ
7. వేపకాయల బతుకమ్మ
8. వెన్నముద్దల బతుకమ్మ
9. సద్దుల బతుకమ్మ
9వ రోజు అష్టమి నాడు అదేరోజు దుర్గాష్టమిని జరుపుకుంటారు. పెరుగన్నం, చింతపండు, లెమన్ రైస్, పులిహోర, కొబ్బరిఅన్నం,నువ్వుల అన్నం లాంటివి ఈ రోజు చేసి సమర్పిస్తారు.
