భజన చేయడానికి కూడా ఓ పరిమితి ఉంటుంది. ఓ రేంజ్ లో భజన చేయడంలో మాత్రం నిర్మాత, నటుడు బండ్ల గణేశ్ తర్వాతే ఎవరైనా. ఎన్నో సందర్భాల్లో ఇది రుజువైంది కూడా. వకీల్ సాబ్ గా పవన్ జనం ముందుకు వస్తే బండ్ల ఆగుతారా.
నీ బండ్ల బడా.. ఇదేం భజన సామీ :
‘వకీల్ సాబ్’ విడుదలయ్యాక బండ్ల గణేశ్ ఎలా ట్వీట్ చేస్తాడా అని ఎంతో మంది ఎదురుచూశారు. ‘మాస్ కా బాప్ వకీల్ సాబ్ గురించి చెప్పాలంటే మాటలు చాలవు. బ్లాక్ బస్టర్.. జై పవర్ స్టార్’ అంటూ ట్వీట్ చేశారు బండ్ల గణేశ్. ఆర్జీవీ ట్వీట్లకు ఎంత క్రేజ్ ఉంటుందో బండ్ల గణేశ్ ప్రసంగానికి కూడా అంత క్రేజ్ ఉంటుంది. అది ఏ స్థాయిలో ఉంటుందో ‘వకీల్ సాబ్’ ప్రీ రిలీజ్ వేడుకలో ఎందరో చూశారు. పవర్ స్టార్ కు తాను ఎంత భక్తుడినో చెప్పుకోడానికి గణేష్ పడ్డ తపన అంతా ఇంతా కాదు. అది చూసే వారు మాత్రం.. పవన్ కళ్యాణ్ కూడా నండోయ్.. నవ్వు ఆపుకోలేరు.
ఈశ్వరా.. పవనేశ్వరా.. పవరేశ్వరా.. అంటూ బండ్ల మాటల ప్రవాహం ఓ రేంజ్ లో సాగిపోయింది.
ఏడు కొండల వాడికి అన్నమయ్య.. శివుడికి భక్త కన్నప్ప.. శ్రీరాముడికి హనుమంతుడు ఎలాగో పవన్కల్యాణ్కు బండ్ల గణేశ్ అలా అట. ‘పవన్ కళ్యాణ్ ఒక వ్యసనం.. బూడిదయ్యేదాకా మనం వదల్లేం’ ఇలాంటి మాటలు మాట్లాడితే పవన్ అభిమానులు రెచ్చిపోకుండా ఎలా ఉంటారు. ఈ ప్రసంగం సోషల్ మీడియాలో కూడా వైరల్ అయిపోయింది. యూట్యూబ్ లో ట్రెండింగ్ స్పీచ్ ఏదైనా ఉంది అంటే ఇదే. సాధారణంగా ఇలాంటి పొగడ్తలను కొందరు ప్రోత్సహించరు. సినిమా రంగంలో మాత్రం ఈ పొగడ్తలకు ఎంతో ప్రాధాన్యం ఉంటుంది.
అతిథులు కూడా అలాంటి పొగడ్తల కోసం ఎదురుచూస్తుంటారుగానీ మరీ ఈ రేంజ్ లో కాదు. బండ్ల గణేశ్ కు ఉన్న ఈ నోట దూల వల్ల ఇబ్బంది పడ్డ సందర్భాలు అనేకం. ఓ సందర్భంలో తన దేవుడి సినిమా మాదిరిగా ‘అజ్ఞాతవాసి’గా మారిపోవాల్సి వచ్చింది. సెవెన్ ఓ క్లాక్ బ్లేట్ తో ఓ రేంజ్ లో ట్రోల్ కావలసి వచ్చింది. ఎట్టకేలకు బ్లేడ్ గణేశ్ పాత్రను కూడా పోషించి ‘సరిలేరు నీకెవ్వరు’లో జనం ముందుకు రావలసి వచ్చింది. మరి పవన్ కళ్యాణ్ ఈ భక్తుడికి మళ్లీ సినిమా ఆఫర్ ఇచ్చి ఎప్పుడు కరుణిస్తారో చూడాలి.
ఆల్రెడీ ఆఫర్ ఉండనే ఉంది. ఆ ప్రాజెక్టు పట్టాలెక్కేదెప్పుడు అనేది మాత్రం చూడాల్సిందే. బండ్ల మాటేమోగాని ‘వకీల్ సాబ్’ నిర్మాత దిల్ రాజు కూడా ఈరోజు ధియేటర్ లో పవన్ వీరాభిమాని మాదిరిగా రెచ్చిపోవాల్సి వచ్చింది. సతీసమేతంగా సినిమాకు హాజరై పేపర్లు విసురుతూ రెచ్చిపోయారు. పెద్ద హోదాలో ఉన్న వారే ఇంతటి వీరాభిమానాన్ని ప్రదర్శిస్తున్నప్పుడు సామాన్య ప్రజానీకం లోనూ ఇలా పవన్ మేనియా ఉండటంలో తప్పేమీ లేదేమో. కాకపోతే ఇలాంటి భజన పరులకు మాత్రం సోషల్ మీడియా చక్కటి వేదికగా ఉపయోగపడుతోంది.
Must Read ;- ‘వకీల్ సాబ్’ మూవీ రివ్యూ
