కర్నూలులో హైకోర్టు బెంచ్..రాయలసీమ ప్రజల చిరకాల వాంఛల్లో ఒకటి. రాష్ట్ర విభజన నాటి నుంచి కర్నూలులో హైకోర్టు బెంచ్ ఏర్పాటు చేయాలని సీమ ప్రజలు డిమాండ్ చేస్తూనే ఉన్నారు. ఇటీవలి ఎన్నికలకు ముందు అధికారంలోకి వస్తే కర్నూలులో హైకోర్టు బెంచ్ ఏర్పాటు చేస్తామని ప్రజాగళం కార్యక్రమంలో కూటమి హామీ ఇచ్చింది. ఇప్పుడు ఇచ్చిన మాట నెరవేర్చే దిశగా అడుగులు వేస్తోంది.
కూటమి ప్రభుత్వం చొరవతో కర్నూలులో హైకోర్టు బెంచ్ ఏర్పాటులో కీలక పరిణామం చోటు చేసుకుంది. 15 మంది న్యాయమూర్తులకు సరిపడా సౌకర్యాలకు సంబంధించిన వివరాలు అందించాలని హైకోర్టు రిజిస్ట్రార్ శ్రీనివాస శివరాం కర్నూలు జిల్లా కలెక్టర్ రంజిత్ భాషాకు లేఖ రాశారు. 15 మంది న్యాయమూర్తులకు సరిపడా మౌలిక సదుపాయాలు, కోర్టు కాంప్లెక్స్‌, కోర్టు గదులు, సిబ్బంది గదులు, న్యాయవాదులకు వసతికి సంబంధించిన పూర్తి సమాచారాన్ని అత్యవసరంగా రోజు వ్యవధిలోనే తన ముందు ఉంచాలని కలెక్టర్‌కు రాసిన లేఖలో హైకోర్టు రిజిస్ట్రార్ కోరారు.
ఈ లేఖ అందుకున్న కలెక్టర్ రంజిత్ భాషా రోడ్లు, భవనాలశాఖ సూపరింటెండెంట్ ఇంజనీర్, మున్సిపల్ కార్పొరేషన్ కమిషనర్, ఆర్డీవోలకు లేఖ రాశారు. కోర్టు రిజిస్ట్రార్ అడిగిన సదుపాయాలతో ఏవైనా ప్రభుత్వ లేదా ప్రైవేటు భవనాలు ఉన్నాయా? అన్న విషయాన్ని పరిశీలించి నివేదిక ఇవ్వాలని కోరారు.
కర్నూలులో హైకోర్టు బెంచ్ ఏర్పాటు చేస్తామని ప్రజాగళం కార్యక్రమంలో హామీ ఇచ్చింది కూటమి. ప్రభుత్వం ఏర్పడ్డాక బెంచ్ ఏర్పాటు కోసం మంత్రి మండలి తీర్మానం చేసింది. తర్వాత శాసనసభలోనూ తీర్మానం చేసింది. కర్నూలులో హైకోర్టు బెంచ్ ఏర్పాటుపై అభిప్రాయాలు తీసుకునేందుకు కాంపిటెంట్ అథారిటీ ముందు ఈ వ్యవహారాన్ని ఉంచాలని రిక్వెస్ట్ చేస్తూ రాష్ట్ర న్యాయశాఖ అప్పటి కార్యదర్శి గతేడాది అక్టోబర్ 28న హైకోర్టు రిజిస్ట్రార్ జనరల్‌కు లేఖ రాశారు.
కర్నూలులో హైకోర్టు బెంచ్ ఏర్పాటుపై హైకోర్టు సీనియర్ న్యాయమూర్తులతో ఓ కమిటీని చీఫ్‌ జస్టిస్ ధీరజ్‌ సింగ్ ఠాకూర్ ఏర్పాటు చేశారు. జస్టిస్ రవినాథ్ తిల్హరీ, జస్టిస్ రఘునందన్‌ రావు, జస్టిస్ ఎన్‌.జయసూర్య, జస్టిస్ బి.కృష్ణమోహన్‌లకు కమిటీలో స్థానం కల్పించారు.
కర్నూలులో హైకోర్టు బెంచ్ ఏర్పాటుకు, న్యాయమూర్తులు, అధికారులు, ఇతర సిబ్బంది వసతికి అవసరమైన భవనాల కోసం ఉన్నతాధికారులు విస్తృతంగా పరిశీలించారు. కర్నూలు శివారులోని దిన్నెదేవరపాడులో ఆంధ్రప్రదేశ్ విద్యుత్తు నియంత్రణ మండలి నూతన భవనాన్ని సుమారు రూ.25 కోట్లతో గతేడాది అధికారులు అత్యాధునికంగా నిర్మించారు. అందులో న్యాయస్థాన అవసరానికి ఉపయోగపడే నాలుగు విశాలమైన హాళ్లు, ప్రత్యేక గదులు అందుబాటులో ఉన్నాయి. ఈ భవనానికి అనుబంధంగా ఉన్న అతిథిగృహం, అందులోని నాలుగు సూట్‌ రూములను ఉపయోగించుకోవచ్చు. ఐతే ఇక్కడ 15 మంది న్యాయమూర్తులకు సరిపడా సౌకర్యాలు లేవు. దీంతో పాటు బి.తాండ్రపాడులోని ఓ ప్రైవేట్ ఇంజినీరింగ్ కాలేజ్ ప్రాంగణంలో సిల్వర్ జూబ్లీ కళాశాల ప్రాంగణంలోని క్లస్టర్‌ విశ్వవిద్యాలాయ పరిపాలన భవనంలో ఖాళీగా ఉన్న 50 గదులను అధికారులు పరిశీలించారు. మునగాలపాడులో బాలసాయిబాబా ట్రస్టు పరిధిలో ఓ సువిశాల పాఠశాల భవనం అందుబాటులో ఉంది.వీటన్నింటికి సంబంధించి అధికారులు ప్రాథమిక ప్రతిపాదనలను పంపినట్లు సమాచారం. అన్ని సక్రమంగా జరిగితే మరికొన్ని రోజుల్లోనే కర్నూలులో హైకోర్టు బెంచ్ ఏర్పడే అవకాశాలున్నాయి.
