నట సింహ నందమూరి బాలకృష్ణ ప్రస్తుతం బోయపాటి శ్రీను దర్శకత్వంలో ‘అఖండ’ మూవీలో నటిస్తున్న సంగతి తెలిసిందే. సింహ, లెజెండ్ మూవీస్ బ్లాక్ బస్టర్ అయిన నేపథ్యంలో ఈ సినిమా మీద భారీ అంచనాలు నెలకొన్నాయి. ఇటీవల విడుదలైన అఖండ టీజర్ ను రికార్డు స్థాయిలో వ్యూస్ దక్కాయి. ఈ నేపథ్యంలో సినిమా కూడా ఓ రేంజ్ లో అదరగొడుతుందని అభిమానులు నమ్మకంగా ఉన్నారు.
ప్రస్తుతం కరోనా సెకండ్ వేవ్ కారణంగా ‘అఖండ’ సినిమా షూటింగ్ కు చిత్ర యూనిట్ బ్రేకిచ్చిన సంగతి తెలిసిందే. ఈ విరామాన్ని బాలయ్య.. కోవిడ్ బాధితుల సహాయం కోసం వినియోగిస్తున్నారు. ఇటీవల హిందూపూర్ నియోజక వర్గంలోని కోవిడ్ బాధితులకు కోవిడ్ మందుల కిట్స్ ను పంపిణీ చేయించిన బాలయ్య.. ఈ రోజు రంజాన్ పర్వదినాన్ని పురస్కరించుకొని తన్ ట్విట్టర్ హ్యాండిల్ ద్వారా ముస్లీమ్ సోదరులకు రంజాన్ శుభాకాంక్షలు తెలియచేశారు.
‘అస్సలామాలేకుమ్.. ముస్లీమ్ సోదర సోదరీమణులకు రంజాన్ పవిత్ర పర్వదిన శుభాకాంక్షలు. త్యాగానికి, సేవానిరతికి మారుపేరు రంజాన్ పవిత్ర మాసం. ఎంతో భక్తి శ్రద్ధలతో కఠిన ఉపాస దీక్ష ఉంటూ.. దైవాన్ని కొలవడం ఆదర్శ ప్రాయం. అల్లా కృపా కటాక్షాలతో ఈ రంజాన్ పర్వదినం..మీ అందరి జీవితాల్లో కొత్త వెలుగులు నింపాలని, అందరూ సుఖ సంతోషాలతో , ఆయురారోగ్యాలతో వర్ధిల్లాలని, సమస్త మానవాళి సుభిక్షంగా ఉండాలని కోరుకుంటూ మరొక్కసారి మీ అందరికీ నా రంజాన్ శుభాకాంక్షలు తెలియచేసుకుంటూ.. మీ బాలకృష్ణ’ అని తన సందేశాన్ని వినిపించారు.
