హైదరాబాద్‌లో బీజేపీ మరోసారి సంచలనాలు నమోదు చేసే అవకాశం ఉందా అంటే..అవుననే సమాధానమే వస్తుంది. అది ప్రస్తుతమా.. రానున్న కాలంలోనా అనేది పక్కన బెడితే.. హైదరాబాద్‌లో బీజేపీకి సంచలనాల చరిత్ర ఉంది. 1980వ దశకాల్లో పార్టీ ఎన్నో సంచలనాలు నమోదు చేసినా..తరువాత కాలంలో ప్రాంతీయ పార్టీల రాక, మజ్లిస్ రాజకీయ వ్యూహాలు…బీజేపీ తీసుకునే నిర్ణయాల్లో లోపాలు.. కారణం ఏదైనా బీజేపీ హైదరాబాద్‌తో తన ప్రాభవాన్ని కోల్పోవాల్సి వచ్చింది.
టైగర్ నరేంద్ర, గోల్కొండ లయన్ బద్దం బాల్ రెడ్డి.. దత్తాత్రేయ.. ఇలా కీలకమైన నేతలు హైదరాబాద్ బీజేపీలో ఉన్నారు. పాతబస్తీ ప్రాంత పరిధిలోనే MIMకి బీజేపీ నేతలు చెమటలు పట్టించే వారు. తరువాతి కాలంలో బీజేపీ కొంత వెనుకబడిందని చెప్పాలి. మిగిలిన పార్టీలు MIM ఉన్న ప్రాంతంలో పెద్దగా జోక్యం చేసుకోలేదు. కొన్ని సార్లు పొత్తులు కారణమైతే..మరికొన్ని సార్లు అభ్యర్థులు లేకపోవడం కారణంగా చెప్పవచ్చు. తరువాతి కాలంలో దత్తాత్రేయ కూడా కీలకమైన నేతగానే ఉన్నారు. ఇంద్రసేనారెడ్డి, లక్ష్మణ్, కిషన్‌రెడ్డి లాంటి వారు గెలుపు సాధిస్తున్నా..పాత బస్తీ ప్రాంతంలో మళ్లీ పట్టు నిలుపుకునే అవకాశం రాలేదు. పూర్వపు మహారాజ్ గంజ్, ప్రస్తుత గోషామహల్‌లో రాజాసింగ్ మాత్రం తన నియోజకవర్గంలో పట్టు నిలుపుకుంటున్నారు. తాజాగా జీహెచ్ఎంసీ ఎన్నికల ఫలితాలను చూస్తుంటే.. పూర్వ వైభవం దిశగా బీజేపీ వెళుతోందని చెప్పవచ్చు. గెలుపోటములు పక్కన బెడితే..149 స్థానాల్లో అభ్యర్థులను నిలిపిన తెలంగాణ బీజేపీ.. రాజకీయ సమీకరణాలను మార్చిందని చెప్పాల్సి ఉంటుంది. ఇక కేంద్రంలో బీజేపీ తొలిసారి అధికారంలోకి వచ్చాక..బీజేపీ విస్తరణకు చాలామంది ప్రయత్నించారు. అయితే బీజేపీ కేంద్రంలో అధికారంలోకి రాకంటే ముందే.. అంటే బీజేపీ రెండు స్థానాలే గెలిచిన( అందులో ఒకటి హన్మకొండ-చందుపట్ల జంగారెడ్డి. అప్పట్లో 54వేల ఓట్ల మెజార్టీతో పీవీ నరసింహారావుపై గెలిచిన తొలి దక్షిణ భారతదేశపు బీజేపీ ఎంపీ) టైంలోనూ పార్టీని విస్తరించే కార్యక్రమాల్లో నిమగ్నమయ్యారు. వీరికి అండగా అప్పట్లో ఎంతమంది వ్యాపార వేత్తలు ఉన్నారన్న అంశం పక్కన పెడితే.. పాతబస్తీలో MIMకి చెమలు పట్టించిన వారిలో ముఖ్యులు ఆలె నరేంద్ర, బద్దం బాల్ రెడ్డి పేర్లు ప్రధానంగా వినిపిస్తాయి.
ఆలె నరేంద్ర విషయానికి వస్తే..
ఆర్ఎస్‌ఎస్‌లో కీలక సభ్యుడైన ఆలె నరేంద్ర.. నారాయణగూడలో జన్మించారు. పదిహేడేళ్ల వయసులో జనసంఘ్ ద్వారా రాజకీయాల్లోకి వచ్చారు. సిమ్లా ఒప్పందానికి వ్యతిరేకంగా సాగిన ఉద్యమంలో పాల్గొని తీహార్ జైల్లో నెలరోజులు ఉన్నారు. 1975లో ఎమర్జెన్సీకి వ్యతిరేకంగా ఉద్యమించి 18 నెలల పాటు జైలుకి వెళ్లారు. 1969-1972 వరకూ జన్‌సంఘ్‌కు ఫుల్‌ టైమర్‌గా పని చేశారు. జనసంఘ్..భారతీయ జనతాపార్టీగా మారాక..1980లో మొదటిసారిగా ఆ పార్టీ అభ్యర్థిగా హైదరాబాద్ పార్లమెంట్‌కు పోటీ చేసి ఓడిపోయారు. 1983లో బీజేపీ అభ్యర్థిగా చాంద్రాయణగుట్ట అసెంబ్లీ నియోజకవర్గం నుంచి పోటీ చేసి ఓడిపోయారు. అదే ఏడాది హిమాయత్‌నగర్ అసెంబ్లీకి జరిగిన ఉప ఎన్నికలో గెలుపొందారు. 1983 నుంచి 1994 వరకు మూడుసార్లు హిమాయత్ నగర్ ఎమ్మెల్యేగా గెలిచారు. 1999లో కాంగ్రెస్‌పై గెలుపొందారు. అప్పట్లో హైదరాబాద్‌లో ఉన్న పరిస్థితుల కారణంగా.. టైగర్ నరేంద్ర వ్యవహరించిన తీరు, ఎదుర్కొన్న పరిస్థితులు, దాడుల నేపథ్యంలో ఆయనకు టైగర్ నరేంద్రగా పేరు వచ్చింది. అప్పట్లో కొన్ని వర్గాలకు వ్యతిరేకంగా మాట్లాడాలంటేనే..భయపడే పరిస్థితి నుంచి ఆ వర్గాలపై పోరాడేందుకు స్పూర్తినిచ్చిన వ్యక్తిగా టైగర్ నరేంద్రకు పేరుంది.
గోల్కొండ లయన్ బద్దం బాల్‌రెడ్డి
పాతబస్తీలో పుట్టి, జన్‌సంఘ్‌లో పెరిగిన గోల్కొండ లయన్ బద్దం బాల్ రెడ్డి ఎంఐఎంకు రాజకీయ ప్రత్యర్థిగా తొడగొట్టి నిలబడ్డారు. ఓవైపు కాంగ్రెస్‌ని, మరోవైపు MIMని ఎదుర్కొన్నారు. 1978లో ఆయనపై దాడి జరిగింది. ఆయన్ను హత మార్చేందుకు మరోసారి కుట్ర పన్నిన ఉగ్రవాదులను 2017లో ఎన్‌ఐఏ అరెస్ట్‌ చేసింది. 1991,1998, 1999లో హైదరాబాద్ లోక్‌సభ స్థానం నుంచి బీజేపీ అభ్యర్థిగా ఆయన పోటీ చేశారు. 1991లో ఎంఐఎం అభ్యర్థి సుల్తాన్‌ సలావుద్దీన్‌ ఒవైసీ చేతిలో 39,524 ఓట్ల తేడాతో ఓటమి పాలయ్యారు. హైదరాబాద్ లోక్‌సభ స్థానంలో ఎంఐఎంకు ఇదే అతి తక్కువ మెజారిటీ. తరువాత కార్వాన్ నుంచి మూడుసార్లు ఎమ్మెల్యేగా ఎన్నికయ్యారు 1985లో కార్వాన్ నుంచి బీజేపీ అభ్యర్థిగా పోటీ చేసి 9,777 ఓట్ల మెజారిటీతో విరాసత్‌ రసూల్‌ఖాన్‌పై, 1989లో 3,066 ఓట్ల మెజా రిటీతో ఆకర్‌ ఆగాపై, 1994లో 13,293 ఓట్ల మెజారిటీతో సయ్యద్‌ సజ్జాద్‌పై విజయం సాధించారు. 2009లో చేవెళ్ల లోక్‌సభ, ఇటీవలి శాసనసభ ఎన్నికల్లో రాజేంద్రనగర్‌ శాసనసభ స్థానాల నుంచి పోటీ చేసి ఓటమిపాలయ్యారు. హైదరాబాద్ బీజేపీలో చాలామంది నాయకులు ఆ పార్టీని విస్తరించేందుకు ప్రయత్నాలు చేశారు. అయితే ఆలె నరేంద్ర, బద్దం బాల్‌రెడ్డి పేర్లు మాత్రం అన్ని వర్గాలకూ గుర్తుంటాయి.
