కాకినాడ సమీపంలోని తొండంగి సముద్ర తీర ప్రాంతంలో దివీస్ ఫార్మా రూ.1500 కోట్ల పెట్టుబడితో కొత్త ప్లాంట్ ఏర్పాటుకు చేస్తున్న ప్రయత్నాలను రైతులు, మత్స్యకారులు తీవ్రంగా అడ్డుకుంటున్నారు. గత కొన్ని రోజులుగా తొండంగి గ్రామస్థులు టెంట్లు వేసుకుని నిరసన తెలుపుతున్నారు. నిరసనకారులు నిన్న దివీస్ ల్యాబ్ ఏర్పాటు చేసుకున్న తాత్కాలిక కార్యాలయానికి నిప్పుపెట్టారు. కంపెనీ నిర్మించుకున్న గోడను కొంత భాగం కూల్చివేశారు. ఇవాళ తెల్లవారుజామునే రంగంలోకి దిగిన పోలీసులు నిరసనకారులను అరెస్టు చేసి అక్కడ నుంచి తరలించారు. నిరసనకారులపై ఇవాళ పోలీసులు విరుచుకుపడ్డారు. మహిళలను జుట్టుపట్టుకుని ఈడ్చుకెళ్లారని మత్స్యకారులు ఆరోపిస్తున్నారు.
ముందుగా నిరసనకారులు వేసుకున్న టెంట్లను పోలీసులు పీకేవేశారు. ఇవాళ మరలా నిరసనకారులు టెంట్లు వేసుకోవడంతో పోలీసులు లాఠీ ఛార్జీ చేసి చెదరగొట్టారు. నిరసనలో కీలకంగా వ్యవహరిస్తున్న వారిని వాహనాల్లో ఎక్కించుకుని వెళ్లారు. రైతుల నిరసనకు వామపక్షాలు మద్దతు ప్రకటించాయి. దీంతో వామపక్షాల నేతలను అరెస్టు చేసి తుని స్టేషన్‌కు తరలించారు. భూములు ఫ్యాక్టరీకి ఇచ్చేది లేదని రైతులు, మత్స్యకారుల తెగేసి చెబుతున్నారు. ఫ్యాక్టరీ వస్తే ఉపాధి పోతుందని మత్స్యకారుల ఆందోళన వ్యక్తం చేస్తున్నారు. దివీస్ కంపెనీ ఏర్పాటును వ్యతిరేకిస్తున్నట్టు టీడీపీ సీనియర్ నేత యనమల రామకృష్ణుడు ప్రకటించారు.
Must Read ;- రాజకీయ వల విసిరారా.. ప్రశాంత పల్లెల్లో చిచ్చు రాజేసింది ఎవరు?
