ది ఫ్యామిలీ మ్యాన్ 2లో అసలు ఏముంది? దీన్ని అడ్డుకోడానికి ఎందుకు ప్రయత్నాలు జరుగుతున్నాయి? ఈ పబ్లిసిటీ ఈ వెబ్ సిరీస్ కు ఎంతవరకు ఉపయోగపడుతుంది? అసలు జూన్ 4న ఈ వెబ్ సిరీస్ అమెజాన్ ప్రైమ్ లో విడుదలవుతుందా? ఇవన్నీ ప్రశ్నలే. ‘ది ఫ్యామిలీ మ్యాన్-1’ కు కొనసాగింపుగా రూపొందించిన వెబ్ సిరీస్ ‘ది ఫ్యామిలీ మ్యాన్- 2’ ఈ జూన్ 4 న విడుదల కావలసి ఉంది. ఇప్పుడిది తమిళనాట ప్రకంపనలు సృష్టిస్తోంది. ఈ వెబ్ సిరీస్ ను రద్దు చేయాలంటూ తమిళనాడు ప్రభుత్వం కేంద్ర ప్రభుత్వానికి లేఖ రాసింది.
ఈ సిరీస్ ను ఆపాలని ఎండీఎంకే అధినేత, రాజ్యసభ సభ్యుడు వైకో కేంద్ర మంత్రి ప్రకాశ్‌ జవదేకర్‌ ను కోరారు. ఇందులో తమిళులను తీవ్రవాదులుగా చూపించారంటూ అభ్యంతరం వ్యక్తం చేశారు. తమిళులను పాకిస్థాన్‌ ఏజెంట్లుగా చూపించారన్నది ప్రధాన అభియోగం. ఇంకా చెప్పాలంటే ఇందులో సమంత నటించిన పాత్ర. ఆమె ఎల్ టీటీఈ టెర్రరిస్టుగా నటించారు. ‘ఐ విల్ కిల్ దెమ్.. ఐ విల్ కిల్ దెమ్ ఆల్..’ అంటూ ఈ పాత్ర ద్వారా ఆమె పలికిన డైలాగులు ట్రైలర్ ద్వారా జనంలోకి బాగా వెళ్లాయి.
తమిళం మాట్లాడే సమంతను తీవ్రవాదిగా చూపించడంపై అభ్యంతరం వ్యక్తమవుతోంది. తక్షణం ఫ్యామిలీ మ్యాన్ సీజన్‌ను నిషేధించాలన్న డిమాండ్లు ఊపందుకున్నాయి. దర్శకుడు రాజ్ అండ్ డీకే దర్శకత్వంలో ఈ వెబ్ సిరీస్ రూపొందింది. మొదటి సీజన్‌లో నటించిన మనోజ్ బాజ్ పాయ్, ప్రియమణిలతో పాటు సెకండ్ సిరీస్‌లో అక్కినేని సమంత ఇందులో కీలక పాత్ర పోషించింది. ఈ వెబ్ సిరీస్ ఇలాంటి వివాదంలో చిక్కుకుంటుందని ఎవరూ ఊహించలేదు. తమిళ ప్రజలు కూడా దీని మీద ఆగ్రహంతో ఉన్నారు. అసలు ఈ సిరీస్ ఇంతకుముందే విడుదల కావలసి ఉన్నా వాయిదా పడుతూ వచ్చింది.
పుట్టుకతో తమిళురాలైన సమంత ఇలాంటి పాత్రలో కనిపిస్తుండం కొంత ఈ వివాదానికి కారణమైంది. తమిళ ప్రజలు ఆమెను ట్రోల్ చేయడం మొదలు పెట్టారు. అంతేకాదు దీన్ని నిషేధించాలంటూ సోషల్ మీడియా వేదికగా డిమాండ్లు ఎక్కువయ్యాయి. పైగా ఎల్టీటీఈ అనేది ఉగ్రవాద సంస్థ కాదు అది శ్రీలంకలోని తమిళుల హక్కుల కోసం పోరాడిన సంస్థగా వాదిస్తున్నారు. తమిళ టైగర్స్ ను తీవ్రవాదులుగా ఎందుకు చూపిస్తున్నారంటూ విమర్శనాస్త్రాలు సంధిస్తున్నారు. ఈ పరిస్థితుల నేపథ్యంలో జూన్ 4న ఈ వెబ్ సిరీస్ స్ట్రీమింగ్ ఉంటుందా లేదా అన్నది ఇప్పుడు ప్రశ్నార్థకమైంది.
Must Read ;-మ‌హిళా ఆటో డ్రైవ‌ర్ కు సమంత గిఫ్ట్
