సూయజ్ కాలువలో చిక్కుకుపోయిన, సూయజ్ కాలువ ద్వారా నౌకల రాకపోకలు నిలిచిపోయేందుకు కారణమైన భారీ చమురునౌక ఎవర్ గ్రీన్ (తైవాన్)ను బయటకు తీసుకుచ్చేందుకు అంతర్జాతీయంగా పలు దేశాలు ప్రయత్నిస్తున్నాయి. అయితే భౌగోళిక పరిస్థితుల నేపథ్యంలో నౌకను కదిలించే పరిస్థితి లేకపోవడంతో నౌక కింద ఉన్న ఇసుక, బురద తొలగించడం (డ్రెడ్జింగ్), నౌకలోని బరువు (దాదాపు 2.2లక్షల టన్నుల చమురు)ను తగ్గించడం మాత్రమే మార్గాలని నిపుణులు చెబుతున్నారు. కాగా భారతదేశంతో పాటు చైనా, నెధర్లాండ్స్ తదితర దేశాలకు ఈ మార్గం ద్వారా చమురు వస్తుంది. చైనా నుంచి నెదర్లాండ్స్ వెళ్తుండగా ఈ నౌక చిక్కుకుపోయింది. ఈ నౌకద్వారా కూడా భారత్, చైనా, నెదర్ళాండ్స్‌కి చమురు దిగుమతి అవుతుంది. ప్రస్తుతం చమురు రవాణా ఆగిపోవడంతో ఇందన ధరలపై ప్రభావం ఉంటుందనే చర్చ మొదలైంది. ఎందుకంటే మన దేశానికి కావాల్సిన చమురు దిగుమతుల్లో 90 శాతం ఆ మార్గం ద్వారానే వస్తుంటాయి.
సూయజ్ కాలువ విషయానికి వస్తే..
ఈజిప్టు సమీపంలో మద్యధరా సముద్రం, ఎర్ర సముద్రాన్ని కలిపే కాలువ ఇది. 193 కిలోమీటర్ల పొడవైన ఈ కాల్వ ప్రపంచంలోని అత్యంత రద్దీగా ఉండే నౌకా మార్గంగా మారింది. యూరప్, ఆసియా దేశాలకు సంబంధించి ఎగుమతులు, దిగుమతులకు ఈ మార్గం కీలకం. అంతేకాదు.. ప్రపంచంలోని అన్ని దేశాలకు జరుగుతున్న ఎగుమతులు, దిగుమతుల్లో 12శాతం ఆ మార్గం ద్వారానే జరుగుతాయి. రోజూ దాదాపు 10 లక్షల బ్యారెల్స్ చమురు (అంటే ప్రపంచ అవసరాల్లో 8శాతం) ఈ మార్గం ద్వారానే సరఫరా అవుతోంది. అయితే ఈ మార్గంలో వస్తున్న ఎవర్ గ్రీన్ నౌక వాతావరణ పరిస్థితుల నేపథ్యంలో సూయజ్ కాలువలో అడ్డంగా ఇరుక్కుపోయింది. దీంతో నౌకలు ఎక్కడికక్కడ ఆగిపోయాయి. దాదాపు 160ఓడలు నిలిచిపోయాయి. అందులో దాదాపు 25వరకు చమురు రవాణా చేస్తున్నవే. ఈ నౌక వెడల్పు 59మీటర్లు కాగా పొడవు 400మీటర్లు.
బయటకు వచ్చే మార్గాలు ఇవీ..
ప్రస్తుతం ఈ నౌకను అక్కడి నుంచి కదిలించడం కష్టంగా మారింది. అయితే ఓవైపు కాలువను వెడల్పు చేసేందుకు, నౌక కింద ఉన్న ఇసుక తొలగించేందుకు ప్రయత్నాలు జరుగుతున్నాయి. అక్కడ ఉన్న పరిస్థితుల నేపథ్యంలో రెండుమూడు యంత్రాలు వెళ్లడం కూడా చాలా కష్టంగా మారింది. దీంతో ప్రత్యామ్నాయంగా ఓడలో ఉన్న చమురును ఇతర నౌకలకు మార్చుతున్నారు. ఆ మార్గంలో ఎవర్ గ్రీన్ నౌకను దాటి వెళ్లేందుకు వీల్లేని నేపథ్యంలో ఎటువైపు వెళ్లున్నవి అదే మార్గంలో తిప్పుకోగలిగే చిన్న ఓడలను వెనక్కి రప్పించడం ద్వారా చమురును బదిలీ చేస్తున్నారు. అదే సమయంలో భద్రతా బలగాలూ అక్కడి చేరాయి. చమురు దొంగల ప్రాబల్యం కూడా ఉన్న నేపథ్యంలో ప్రత్యేక బలగాలను తరలించడంతోపాటు సమీప దేశాల నుంచి కూడా భద్రతా బలగాలను తరలిస్తున్నారు.
చర్యలు తీసుకుంటున్న సూయజ్ కెనాల్ అథారిటీ
నౌక చిక్కుకుపోయిన ప్రాంతంలో ఇసుకను తవ్వి, దాన్ని సరైన మార్గంలోకి తీసుకువచ్చేందుకు ఏర్పాట్లు చేస్తున్నట్లు సూయజ్ కెనాల్ అథారిటీ (SCA) ప్రకటించింది. 9 టగ్‌/కగ్ లు (లాగే ఓడలు) ప్రయత్నాలు చేస్తున్నాయని ప్రకటించింది. కాలువ రెండు తీరాలను తాకుతూ షిప్‌ ఆగిపోవడంతో ఇసుక తొలగింపునకు నెదర్లాండ్‌కు చెందిన బోస్కాలిస్‌ సంస్థ డ్రెడ్జింగ్ పనులు మొదలు పెట్టింది. ప్రస్తుతం ఈ నౌకలో 20 అడుగుల పొడవైన కంటెయినర్లు 20వేల వరకు ఉండడంతో వాటిని తొలగించేందుకు ప్రణాళిక వేస్తున్నారు. అయితే నౌక సగం బరువు నీరు, సగం బరువు ఇసుకపై ఉన్న నేపథ్యంలో బరువులు తొలగించే సందర్భంలో నౌక చీలిపోవడం, దెబ్బతినడం, ఒకవైపు ఒరగడం లాంటివి జరిగితే పరిస్థితి మరింత దిగజారుతుంది. ఈ పరిస్థితి తలెత్తకుండా ఆఫ్ షోర్, ఆన్ షోర్ భారీ క్రేన్‌లు చేర్చాల్సి ఉంది.
ఆలస్యమైతే..లక్షల కోట్ల నష్టమే..
ఈ మార్గానికి ఉన్న ప్రాధాన్యం నేపథ్యంలో నౌకలు ఎక్కడికక్కడ ఆగిపోవడంతో ప్రతిగంటకు రూ.3వేలకోట్ల నష్టం వాటిల్లనుంది. ప్రధానంగా భారత్‌కు, చైనా, దక్షిణ కొరియా, సింగపూర్ దేశాలకు ఈ నష్టం ఉండనుంది. 1869లో ఈజిఫ్టులో ఈ కాలువ నిర్మాణం జరిగింది. మధ్యధరా సముద్రం, ఎర్ర సముద్రాన్ని కలిపేందుకు ఈ మార్గం ఏర్పాటు చేశారు. దీంతో ప్రపంచ దేశాలకు నార్త్ అట్లాంటిక్ మహా సముద్రం, నార్తర్న్ హిందూ మహా సముద్రం మధ్య మార్గం ఏర్పడింది. ఈ మార్గం కంటే ముందు ఆసియా, ఐరోపా దేశాల చుట్టూ తిరిగి వెళ్లడం ద్వారా సమయం ఎక్కువగా తీసుకోవడంతో పాటు 8,900 కి.మీ.లు అదనంగా వెళ్లాల్సి వచ్చింది. అందుకే సూయజ్ కాలువ అంత రద్దీగా ఉంటుంది.
బైపాస్ మార్గం కన్నా ముందే..
ఈ మార్గంలో నౌకలు చిక్కుకుపోవడం, రద్దీని తట్టుకునేందుకు 2007తరువాత బైపాస్ మార్గం ఏర్పాటు చేశారు. అయితే బైపాస్ మార్గాని కంటే ముందే ఎవర్ గ్రీన్ నౌక చిక్కుకుపోయింది. వేరే నౌకలు ఇలా చిక్కుకున్నా నౌకలు ఆలస్యంగానైనా నడిచేవి. అయితే భారీ నౌక కావడంతో ఆ అవకాశం కూడా లేకుండా పోయింది. సాధారణ సమయంలోనే ఈ మార్గం దాటేందుకు నౌకలకు 11నుంచి 18గంటలు పడుతుంది. గతేడాది 19వేల భారీ నౌకలు ఈ మార్గాన్ని దాటాయి. ఇక చిన్న నౌకలు, రెండు దేశాలకే పరిమితైన నౌకలు మరో 20వేలు ఉంటాయని అంచనా. గతేడాది ఈ మార్గం ద్వారా ఈజిప్టుకు వచ్చిన ఆదాయం దాదాపు రూ. 44వేల కోట్లుగా అంచనా వేశారు.
Must Read ;- ‘రామ్ సేతు’ నిర్మిస్తున్న అమెజాన్ ప్రైమ్
