రకుల్ ప్రీత్ సింగ్.. టాలీవుడ్ లో ఈ పేరుకు పెద్దగా పరిచయం అవసరం లేదు. అనతికాలంలోనే ఈ ముద్దుగుమ్మ టాలీవుడ్ టాప్ హీరోయిన్ల జాబితాలో చేరిపోయింది. టాలీవుడ్ లో ఎంతమంది స్టార్ హీరోయిన్లు ఉన్నా రకుల్ స్థానం వేరు. అలాంటి ఈ అమ్మడు ఇటీవల బాలీవుడ్ డ్రగ్స్ కేసులో ఆరోపణలు ఎదుర్కొంది. ఈ కేసు నిమిత్తం రకుల్ ఎన్సీబీ విచారణకు హాజరైంది కూడా. ఇప్పుడు ఈ అమ్మడు తిరిగి హైదరాబాద్ వచ్చేసింది. బాలీవుడ్ డ్రగ్స్ కేసులో ఆరోపణలు ఎదుర్కొంటూ ఎన్సీబీ విచారణకు హాజరైన రకుల్‌ప్రీత్‌ సింగ్‌కు కాస్త రిలీఫ్ దక్కినట్లుంది. రెండ్రోజుల పాటు ఎన్సీబీ అధికారుల అడిగిన ప్రశ్నల వర్షంలో తడిసి ముద్దయిన రకుల్ తన విచారణ పూర్తికాగానే ముంబయిని వదిలిపెట్టి హైదరాబాద్‌కు చేరుకుంది.
డ్రగ్స్ కేసులో రకుల్ పేరు బయటికి రాగానే మీడియాలో రకరకాల కథనాలు ప్రసారమయ్యాయి. దీంతో ఉక్కిరిబిక్కిరైన ఆమె తనపై కథనాలు ప్రసరించకుండా మీడియాను ఆదేశించాలంటూ న్యాయస్థానాన్ని ఆశ్రయించింది. అనంతరం ఎన్సీబీ నోటీసులతో రకుల్ రెండ్రోజుల పాటు విచారణకు హాజరైంది. ఈ సందర్భంగా తన స్నేహితురాలు డ్రగ్స్ ఇస్తే తన ఇంట్లోనే దాచి పెట్టానని అంగీకరించినట్లు వార్తలు వచ్చాయి. దీనిపై రకుల్ గానీ, ఎన్సీబీ అధికారులు గానీ ఎలాంటి క్లారిటీ ఇవ్వలేదు. మరోవైపు ఆమె చేతిలో ఉన్న తెలుగు సినిమా షూటింగ్ నిమిత్తం హైదరాబాద్ చేరుకుంది.
శంషాబాద్ ఎయిర్‌పోర్ట్ నుంచి బయటికి వస్తుండగా తీసిన ఫోటోలు ఇప్పుడు సోషల్‌మీడియాలో వైరల్‌గా మారాయి. ఇదే కేసులో దీపికా ప‌దుకొనె, సారా అలీఖాన్‌, శ్రద్ధా కపూర్, కరిష్మా ప్ర‌కాశ్‌ ఎన్సీబీ కార్యాలయానికి హాజరై.. వాంగ్మూలాల‌ను ఇచ్చారు. అయితే ఎన్సీబీ అధికారుల విచారణలో దీపిక, సారా, శ్రద్ధాతోపాటు హాజరైన పలువురు కూడా బాలీవుడ్‌లో డ్రగ్స్ వ్యవహారం గురించి కీలక విషయాలను వెల్లడించినట్లు సమాచారం. ఇదిలాఉంటే.. విచారణ అనంతరం దీపికా పదుకొనే, శ్రద్ధా కపూర్, సారా అలీ ఖాన్, కరిష్మా ప్రకాష్, రకుల్ ప్రీత్ సింగ్, సిమోన్ ఖంబట్టా, జయ షా మొబైల్ ఫోన్లను ఎన్సీబీ అధికారులు స్వాధీనం చేసుకున్న విషయం తెలిసిందే.
