గణేశ.. పర్సనాలిటీ డెవలప్మెంట్!

వ్యక్తిత్వ వికాసం అంటే సక్సెస్ వైపు తీసుకువెళ్లే సూత్రం మాత్రమే అని అందరూ అనుకుంటూ ఉంటారు. మనం కూడా అలాగే అనుకుందాం. సక్సెస్ దక్కాలంటే కావాల్సంది ఏమిటి?.. హార్డ్ వర్క్, వనరులు, ఫెయిల్యూర్స్ కు భయపడి వెనుతిరగకుండా పోరాడడం.. వీటన్నింటికంటె ముఖ్యమైన మరో సంగతి కూడా ఉంది. అది- విజయం కోసం పోరాటం ప్రారంభించే ముందే.. మన బలహీనతల్ని తెలుసుకోవడం, మన లోపాలను గుర్తెరగడం. 

వినాయకుడు తెలిసిన ప్రతి ఒక్కరికీ తెలిసిన కథ ఒకటి ఉంది. వినాయకుడు- కుమారస్వామి అన్నదమ్ములిద్దరికీ పరమశివుడు ఒక పోటీ పెట్టాడు. మీ ఇద్దరిలో ఎవరు ముందుగా సమస్తలోకాలను చుట్టి వస్తారో వారికి గణాధిపత్యం ఇస్తానన్నాడు. నెమలి వాహనం ఉంది గనుక.. కుమారస్వామి తక్షణమే ఎగిరి వెళ్లిపోయాడు. వినాయకుడు మాత్రం తల్లిదండ్రులకు మూడుసార్లు ప్రదక్షిణం చేసి.. అన్నిలోకాలూ తిరిగిన ఫలం సంపాదించుకున్నాడు. గణాధిపత్యం పొందాడు. ఇదీ కథ! 

ఈ కథను సరదాగా మనం చాలా సందర్భాల్లో చెప్పుకుని ఉంటాం. తల్లిదండ్రులను పూజించాలి.. పెద్దలను గౌరవించాలి. తల్లిదండ్రులను పూజించడం అనేది.. సమస్తలోకాలను చుట్టివచ్చినంత పుణ్యఫలాన్ని మనకు అందిస్తుంది.. ఇలాంటి నీతులు చెప్పే దృష్టాంతాలలో మనం ఈ కథను వినిఉంటాం. కానీ దానికంటె అద్భుతమైన నీతి ఒకటి ఈ కథలో ఉంది. 

అదే మన బలహీనతల్ని మనం ముందుగా తెలుసుకోవడం.

పరమశివుడు ఇద్దరు కొడుకులకు పోటీ పెట్టాడు. బాగానే ఉంది. పోటీ ప్రకారం కుమారస్వామి వెంటనే వెళ్లిపోయాడు. కానీ వినాయకుడు కదల్లేదు. ఎందుకు? అంత పెద్ద శరీరం, ఎలుక వాహనంతో తాను బయల్దేరినా కూడా.. నెమలిమీద ఎగిరిపోయిన కుర్రవాడు కుమారస్వామిని నెగ్గలేనని అతను అన్నింటికంటె ముందు గ్రహించాడు. తనది స్థూలకాయం, తన వాహనం మరీ అంత వేగంగా వెళ్లలేని ఎలుక. ఈ బలహీనతల్ని ముందుగా పరిగణనలోకి తీసుకున్నాడు. పోటీ విషయంలో తనకు ఉన్న పరిమితులు ఏమిటో ముందుగా గుర్తించాడు. ఒక్కసారి మన పరిమితులు పూర్తిగా మనకు అర్థం కాగానే.. దానికి అనుగుణంగా.. ప్రత్యామ్నాయాలను అన్వేషించాడు. దాని ఫలితమే తల్లిదండ్రుల చుట్టూ ప్రదక్షిణం చేయడం. 

మన పరిమితుల్ని తెలుసుకుంటే చాలు…

గణేశుడి కథ నుంచి ఆ ఒక్క నీతిని మనం నేర్చుకుంటే చాలు. పర్సనాలిటీ డెవలప్మెంటు, వ్యక్తిత్వ వికాస పాఠాలు అనేకం చదువుకున్నంత ఫలితం దక్కుతుంది. మామూలుగా పురాణ ప్రవచనాలు పూర్తవుతున్నప్పుడు.. ‘ఈ కథ చదివిన వారికి, విన్నవారికి అందరికీ గోదాన, హిరణ్య దానాది అనేక దానాల పుణ్యఫలం దక్కుతుందని’ చెబుతుంటారే.. అలాగన్నమాట. ఈ ఒక్క నీతి గ్రహిస్తే, ఆ టెక్నిక్ అలవాటు చేసుకుంటే.. అనేక పర్సనాలిటీ డెవలప్మెంటు పాఠాలు విన్నట్టే.

ఒక ఇంగ్లిషు సామెత ఉంది. ‘‘Knowledge is, knowing of what we dont know” అని. ‘‘జ్ఞానం అంటే.. మనకు ఏం తెలియదో తెలుసుకుని ఉండడం’ అని దీనికి తెలుగులో అర్థం చెప్పుకోవచ్చు. ఉదాహరణకు ఒక నది వద్దకు వెళ్తాం. ఈత కొట్టాలని అనిపిస్తుంది. పైకి మామూలుగా కనిపించినప్పటికీ.. నది ఎంత వేగంతో ప్రవహిస్తోందో మనకు తెలియదు. అలా  దాని వేగం తెలియదనే మనలోని అజ్ఞానాన్ని మనం గుర్తించగలిగితే.. ఈత కోసం నదిలో దూకే సాహసం చేయం. దాని వేగం తెలియని మన అజ్ఞానం గురించి కూడా మనకు అవగాహన లేకపోతే.. నదిలో దిగుతాం. ఆ వేగానికి కొట్టుకుపోయి ప్రాణం మీదికి తెచ్చుకుంటాం. 

సరిగ్గా ఈ విషయమే మనకు వినాయకుడి కథ చెప్తుంది. పోటీ అనౌన్స్‌మెంట్ రాగానే.. వినాయకుడు తన బలాలు- బలహీనతలను బేరీజు వేసుకున్నాడు. భేషజాలకు పోకుండా తనకున్న బలహీనతలు, పరిమితులు (లిమిటేషన్స్) ఏమిటో ముందు అవగాహన చేసుకున్నాడు. తాను వేగంగా వెళ్లడం సాధ్యం కాదని ఆయన తెలుసుకోగలిగాడు గనుకనే.. ప్రత్యామ్నాయం చూసుకున్నాడు.

మనం చేయాల్సింది కూడా అదే. సక్సెస్ కావాలంటే మన బలాల్ని మనం తెలుసుకోవడం మాత్రమే కాదు.. బలహీనతల్ని కూడా తెలుసుకోవడం అంతే అవసరం. మనకి ఏం చేతకాదో మనం తెలుసుకుంటే.. దానిని బట్టి.. చేతనైన పనులు మాత్రమే  చేస్తాం. చేతనైన పనులు మాత్రమే చేస్తాం కాబట్టి- ఆ పనులు చేయడంలో మనకు చేతకాని విషయం (లోపం) ఉండదు కాబట్టి.. ఖచ్చితంగా విజయం వైపు మన అడుగులు పడతాయి. ఈ అద్భుతమైన విజయసూత్రాన్ని మనం ఈ వినాయక చవితి పర్వదినం నాడు అర్థం చేసుకుందాం.

వినాయకచవితి పర్వదినం శుభాకాంక్షలతో…

..కె.ఎ.మునిసురేష్ పిళ్లె