తమిళ్ సూపర్ స్టార్ విజయ్ కు మన తెలుగులో కూడా మంచి మార్కెట్ ఉందనే విషయం తెలిసిందే. విజయ్ నటించిన ‘తుపాకీ’, ‘పోలీసోడు’, ‘అదిరింది’, ‘సర్కార్’, ‘విజిల్’ వంటి సినిమాలు తెలుగులో కూడా రిలీజయి మంచి సక్సెస్ సాధించాయి. ఈ సినిమాలతో తెలుగులో కూడా తనకంటూ ఒక ప్రత్యేకమైన ఇమేజ్ ఏర్పరుచుకున్నాడు విజయ్. ఆయన తాజా చిత్రం ‘మాస్టర్’. ‘ఖైదీ’ ఫేమ్ లోకేష్ కనగరాజ్ ఈ సినిమాకు దర్శకత్వం వహిస్తున్నాడు. ఈ సినిమాలో కోలీవుడ్ స్టార్ విజయ్ సేతుపతి విలన్ గా నటిస్తుండటం విశేషం.
ఇక మాస్టర్ తెలుగు వెర్షన్ టీజర్ ను దీపావళి కానుకగా విడుదల చేసే యోచనలో ఉన్నారట దర్శక నిర్మాతలు. ఇప్పటికే ఈ సినిమాకు సంబంధించిన పోస్ట్ ప్రొడక్షన్ పనులు పూర్తి అయ్యాయని, ఈ సినిమాలో హీరో విజయ్ కు తెలుగు హీరో సత్యదేవ్ డబ్బింగ్ చెప్పాడని సమాచారం. ఇక ఇందులో విజయ్ కాలేజ్ ప్రొఫెసర్ గాను, మాఫియా డాన్ గాను రెండు భిన్నమైన పాత్రలలో కనిపించనున్నాడు. అలాగే విజయ్ పాత్ర చాల కొత్తగా ఉంటుందని ఇప్పటికే దర్శకుడు తెలిపాడు. ఈ సినిమాలో మీరు ఒక కొత్త విజయ్ ని చూడబోతున్నట్లు కూడా ఆయన తెలిపాడు.
అనిరుధ్‌ సంగీతం అందిస్తోన్న ఈ సినిమాపై విజయ్ అభిమానులు భారీ అంచనాలు పెట్టుకున్నారు. దీంతో మరో సూపర్ డూపర్ హిట్ కొట్టబోతున్నట్లు ఆయన అభిమానులు నమ్మకంగా ఉన్నారు. వరుస విజయాలతో దూసుకుపోతున్న విజయ్ ఈ సినిమాతో కోలీవుడ్ లో సరికొత్త రికార్డులను నెలకొల్పడం ఖాయంగా కనపడుతోంది. ఈ సినిమాను వచ్చే ఏడాది సంక్రాంతి కానుకగా విడుదల చేద్దామని దర్శకనిర్మాతలు భావిస్తున్నారు. మరి ఈ సినిమా విజయ్ అభిమానులను, సామాన్య ప్రేక్షకులను ఏ స్థాయిలో మెప్పిస్తుందో చూడాలి.
