మరో వివాదం.. మాన్సాస్ ఆఫీస్ మార్చివేతకు సంచైత వ్యూహం

(విజయనగరం నుండి లియో న్యూస్ ప్రతినిధి)

సంచలన, వివాదాస్పద నిర్ణయాలకు మారుపేరుగా నిలుస్తున్న విజయనగరం మాన్సాస్ ఛైర్ పర్సన్ పూసపాటి సంచైత గజపతి మరో సంచలన నిర్ణయం తీసుకున్నారు. కొన్ని దశాబ్ధాలుగా విజయనగరం కేంద్రంగా పని చేస్తున్న మాన్సాస్ కార్యాలయాన్ని విశాఖ జిల్లాలో చిట్టచివర, మారుమూలగా ఉన్న పద్మనాభం మార్చేందుకు నిర్ణయించారు. ఈ మేరకు ఆమె మాన్సాస్ ఈఓకు లెటర్ రాయడం, వెనువెంటనే ఆయన దేవాదాయశాఖ కమిషనర్‌కు సిఫార్సు చేయడం చకచకా జరిగిపోయాయి. కమిషనర్ నుండి ఆదేశాలు వస్తే కార్యాలయం మార్చివేసేందుకు రంగం సిద్ధమైనట్లే.

ప్రభుత్వ అండదండలతోనే ..

‘వడ్డించే వాడు మనవాడైతే.. కడబంతిలో కూర్చున్నా ఇబ్బంది లేదు’ అనే చందంగా రాష్ట్ర ప్రభుత్వం ఆమెకు పూర్తి సహాయసహకారాలు అందిస్తుండటంతోనే ఆమె అనుచిత నిర్ణయాలు తీసుకుంటున్నారని స్థానికులు పెద్ద ఎత్తున ఆరోపిస్తున్నారు. విజయనగరం ప్రజలను ఇబ్బందులకు గురిచేసే విధంగా ఆమె వ్యవహర్తిస్తున్నా, ప్రజాప్రయోజనాలను మాన్సాస్ నుండి కనుమరుగు చేస్తున్నా స్థానిక ప్రజాప్రతినిధులు ప్రశ్నించకపోవడంలో ఆంతర్యమేంటనే చర్చ జిల్లాలో జోరుగా సాగుతోంది.

మాన్సాస్ విచ్ఛిన్నానికి కుట్ర

ప్రతిష్టాత్మకమైన మాన్సాస్ సంస్థను ముక్కలు చేసి, విచ్ఛిన్నానికి సంబంధిత ఛైర్ పర్సన్ కుట్ర చేస్తున్నారని, ఇటువంటి చర్యలను పూర్తిగా ఖండిస్తున్నామని మాన్సాస్ డైరెక్టర్, టీడీపీ విజయనగరం అసెంబ్లీ నియోజకవర్గం ఇన్‌ఛార్జి పూసపాటి అదితి గజపతి స్పష్టం చేశారు. స్థానిక అశోక్ బంగ్లాలో సోమవారం ఆమె మీడియాతో మాట్లాడుతూ మాన్సాస్ ను భ్రష్టు పట్టించేందుకు ఛైర్ పర్సన్ ఇటువంటి దుందుడుకు చర్యలకు పాల్పడుతున్నారని దుయ్యబట్టారు. ఇందులో వైసీపీ నాయకుల పాత్ర ఉందని, మాన్సాస్ భూములు కాజేసేందుకు ఒక ప్రణాళిక ప్రకారం చేస్తున్న కుట్రగా ఆమె అభివర్ణించారు.

బాధ్యతా రాహిత్య చర్య

ఎంతోమంది ప్రజలకు అందుబాటులో ఉన్న మాన్సాస్ అఫీస్‌ను పద్మనాభం తరిలించాలనే ప్రయత్నం వెంటనే విరమించు కోవాలని,  దేవాదాయ శాఖ అనుమతి ఇవ్వకుండా తగిన చర్యలు తీసుకోవాలని పట్టణ పౌర సంక్షేమ సంఘం జిల్లా కార్యదర్శి రెడ్డి శంకరరావు డిమాండ్ చేశారు.దశాబ్ధాలుగా విజయనగరంలో కొనసాగుతున్న ఆఫీస్‌ను ఒక్క సారిగా మార్చాలనే ప్రయత్నంలోనే కుట్ర దాగివుందన్నారు. మాన్సాస్ విద్యా సంస్థల్లో పని చేస్తున్న ఉద్యోగులకు, వారి సమస్యలు తెలియ జెప్పేందుకు అఫీస్ ఇక్కడ అందుబాటులో ఉందని, అది విజయనగరంలో కొనసాగేలా మంత్రి బొత్స సత్యనారాయణ తగిన చర్యలు తీసుకోవాలని శంకరరావు డిమాండ్ చేశారు. అయోధ్యా మైదానానికి తాళం వేయడం, మహారాజ కళాశాలను ప్రైవేటు పరం చేయాలనే ప్రయత్నాన్ని పట్టణ పౌర సంక్షేమ సంఘం, విద్యార్థులు, ఎస్ఎఫ్ఐ తదితర ప్రజాసంఘాలు చేస్తున్న పోరాటాలకు భయపడి ఆఫీస్ మారుస్తున్నారని భావించాల్సి వస్తుందని ఆయన హెచ్చరించారు. మాన్సాస్ అఫీస్ తరలించే చర్యను పట్టణ పౌర సంక్షేమ సంఘం తీవ్రంగా వ్యతిరేకిస్తోందని ఆయన స్పష్టం చేశారు.

ఏదేమైనా మాన్సాస్ ఛైర్ పర్సన్ బాధ్యతలు చేపట్టిన నాటి నుండి సంచైత రోజుకో వివాదాస్పద నిర్ణయాలతో అటు రాష్ట్ర ప్రభుత్వాన్ని, ఇటు సంస్థను అప్రదిష్ట పాలుజేస్తోందనే విమర్శలు జిల్లాలో వ్యక్తమవుతున్నాయి.