(విజయనగరం నుంచి లియోన్యూస్ ప్రతినిధి)
ఖాకీ దుస్తులు వేసుకున్న వారంతా కఠినాత్ములు కాదని, వారిలోనూ మానవత్వం, సేవా దృక్పథం ఉంటుందని నిరూపించి విశాఖ రేంజ్ డీఐజీ ఎల్. కె. వి. రంగారావుచే అభినందన, ప్రశంసలు అందుకున్నారు.. విజయనగరం జిల్లా కొత్తవలస పోలీసు స్టేషన్లో కానిస్టేబుల్ గా పనిచేస్తున్న వై. సురేష్ కుమార్.
సామాజిక బాధ్యతగా..
విజయనగరం జిల్లా కొత్తవలస పోలీసుస్టేషన్లో కానిస్టేబుల్ పనిచేస్తున్న వై.సురేశ్ కుమార్ తన సామాజిక భాద్యతగా పేదలను, అనాధలను, మతిస్థిమితం లేని వారిని ఆదరించి వారికి అవసరమైన సపర్యలు చేస్తుంటారు.
ఫేస్బుక్ ద్వారా కుటుంబ సభ్యులను ఒకటి చేసిన సురేష్
ఇటీవల కొత్తవలస లో ఒక మతిస్థిమితం లేని వ్యక్తిని గుర్తించి అతనికి సపర్యలు చేసి అనాధ శరణాలయంలో చేర్చారు. ఆయన వివరాలు ఫేస్బుక్ లో పెట్టడం వలన శ్రీకాకుళంలోని ఆ వ్యక్తి కుటుంబ సభ్యులు గుర్తించారు. అతని పేరు జగదీష్ అని, పదవతరగతి వరకు చదువుకున్నాడని, మతిస్థిమితం లేక గత సంవత్సరకాలంగా కనిపించడం లేదని ఆయన వివరాలు కొత్తవలస పోలీసులకు అందజేసి తమ కుమారుడుని తమతో తీసుకువెళ్ళారు. ఈ సందర్భంగా సురేష్కు ధన్యవాదాలు తెలిపారు.
స్వయంగా గోతులు పూడ్చిన సురేష్
ఇటీవల కురిసిన భారీ వర్షాలకు కొత్తవలస మండలం రావుపల్లి బ్రిడ్జ్ పై ఏర్పడిన గోతుల వలన ప్రజలకు అసౌకర్యం, ప్రమాదాలు జరుగుతున్నాయని గుర్తించి ఆ గోతులను సిమెంట్ తో తానే స్వయంగా పూడ్చారు. స్థానికుల ప్రశంసలు అందుకున్నారు.
తన గ్రామాభివృద్ధిలో..
పోలీస్ కానిస్టేబుల్ గా పనిచేస్తున్న సురేష్ తన గ్రామాభివృద్ధికి ఇతోధిక కృషి చేస్తున్నారు. తాను చదువుకున్న నెల్లిమర్ల మండలం జరజాపుపేట జిల్లా పరిషత్ ఉన్నత పాఠశాల పునర్నిర్మాణ పనులకు తనవంతు ఆర్ధిక సహాయం చేశారు. అందులో తన స్నేహితులనూ భాగస్వామ్యం చేశారు.
జూట్ కార్మికుని బిడ్డగా ..
ఒక సాధారణ జుట్ మిల్ కార్మికుని కొడుకైనప్పటికీ పట్టుదలతో ఉన్నతవిద్యను అభ్యసించి పోలీసు వృత్తిని చేపట్టారు సురేష్ కుమార్. తన విధులను సక్రమంగా నిర్వహిస్తూ, ప్రవృత్తిగా సేవా కార్యక్రమాలు చేయడం అలవర్చుకున్నారు.
సురేష్ ను ఆదర్శంగా తీసుకోవాలి : డీఐజీ
సురేష్ కుమార్ అభినందనీయుడని, ప్రతీ పోలీసు తమ పరిధిలో ఇలాంటి సేవాకార్యక్రమాలు చేయాలని, సురేష్ ను ఆదర్శంగా తీసుకోవాలని విశాఖపట్నం డి.ఐ.జి.ఎల్.కె.వి.రంగారావు కొనియాడారు. సోమవారం సురేష్ కుమార్ను ప్రత్యేకంగా తన కార్యాలయానికి పిలిపించిన డీఐజీ అభినందించి, ప్రశంసపత్రం అందజేశారు.
