స్థానిక ఉత్పత్తులకు ఇంటర్నేషనల్ బ్రాండింగ్ తీసుకురావడంలో సీఎం చంద్రబాబు ఎప్పుడూ ఒక అడుగు ముందే ఉంటారు. ఒకప్పుడు గిరిజనులు పండించే అరకు కాఫీకి గ్లోబల్ బ్రాండింగ్ క్రియేట్ చేసి, ప్రపంచ మార్కెట్ దృష్టిని AP వైపు తిప్పిన ఘనత చంద్రబాబుదే. ఇప్పుడు అదే తరహాలో ఏపీలో పండే మొక్కజొన్నను ఆంధ్రా పాప్కార్న్ పేరుతో ఇంటర్నేషనల్ బ్రాండ్గా మార్చేందుకు ఆయన శ్రీకారం చుట్టారు. పండించిన పంటను నేరుగా అమ్మేయడం కాకుండా, దానికి ప్రాసెసింగ్ ద్వారా విలువ జోడిస్తే రైతులు పారిశ్రామికవేత్తలుగా మారి సిరులు కురిపిస్తారన్నది బాబు ఆలోచన.
ముసునూరు మండలం కాట్రేనిపాడులోని గౌర్మెట్ పాప్కార్నికా పరిశ్రమలో జరిగిన కార్యక్రమంలో చంద్రబాబు తన తాజా గ్లోబల్ యాక్షన్ ప్లాన్ను ఆవిష్కరించారు. త్వరలోనే దేశవ్యాప్తంగా ఉన్న రైల్వే స్టేషన్లలో ఆంధ్రా పాప్కార్న్ – అరకు కాఫీ కౌంటర్లు ఏర్పాటు చేస్తామని ప్రకటించారు. బ్రెజిల్ వంటి దేశాల నుంచి పాప్కార్న్ దిగుమతి చేసుకునే స్థితి నుంచి.. మన దేశీయ, జన్యు మార్పిడి లేని ఆంధ్రా పాప్కార్న్ను విదేశాలకు ఎగుమతి చేసే స్థాయికి ఎదగాలన్నదే తన ఆకాంక్ష అని చెప్పారు. దేశంలో 3400 థియేటర్లకు పాప్కార్న్ సప్లై చేస్తూ 70 శాతం మార్కెట్ షేర్ దక్కించుకున్న స్థానిక గౌర్మెట్ సంస్థను ఆయన అభినందించారు.
ఏపీలో పండే మిరప, పసుపు, ఆక్వా, కొండపల్లి బొమ్మలు.. ఇలా ప్రతి లోకల్ ప్రొడక్ట్ను ఇంటర్నేషనల్ మార్కెట్కు తరలించాలన్నదే కూటమి ప్రభుత్వ లక్ష్యం. రాష్ట్రంలో పండే పంటల్లో ప్రస్తుతం 10 శాతం మాత్రమే ప్రాసెసింగ్ అవుతోందని, దీన్ని భారీగా పెంచితేనే వ్యవసాయం బలమైన ఆర్థిక శక్తిగా మారుతుందని చంద్రబాబు స్పష్టం చేశారు. మారుతున్న ఆహారపు అలవాట్లకు అనుగుణంగా రైతులు పంటల విధానాన్ని మార్చుకోవాలని, యువత ఫుడ్ ప్రాసెసింగ్ రంగంపై దృష్టి సారించాలని పిలుపునిచ్చారు.
సాధారణ అంశాన్ని ప్రపంచస్థాయికి తీసుకెళ్లి ‘బ్రాండ్’ క్రియేట్ చేయడంలో చంద్రబాబు మార్కే వేరు. ఉమ్మడి రాష్ట్రంలో కనీసం మంచినీళ్లు దొరకని రాతిగుట్టల మధ్య హైటెక్ సిటీ బ్రాండ్ను సృష్టించి గ్లోబల్ ఐటీ కంపెనీలను క్యూ కట్టించారు. కరవు జిల్లా అనంతపురంలో కియాతో ఆటోమొబైల్ బ్రాండ్ తెచ్చారు. మహిళల పొదుపును డ్వాక్రా బ్రాండ్గా మార్చి దేశానికే ఆదర్శంగా నిలిపారు. ఇక అడవి బిడ్డలు పండించిన అరకు కాఫీ ఘుమఘుమలను ఫ్రాన్స్, పారిస్ దాకా తీసుకెళ్లి గ్లోబల్ బ్రాండ్గా నిలబెట్టిన ఘనత ఆయనదే. ఇప్పుడు అదే తరహాలో ఆంధ్రా పాప్ కార్న్ పేరుతో ఏపీ పల్లెల్లో పండే మొక్కజొన్నకు ఇంటర్నేషనల్ మార్కెట్ క్రియేట్ చేస్తున్నారు. నాయకులు ఎవరైనా పథకాలు తెస్తారు..ప్రాజెక్టులు కడతారు. కానీ లోకల్ ప్రొడక్ట్ను గ్లోబల్ బ్రాండ్గా మార్చి వ్యాపారాలు సృష్టించడంలో మాత్రం చంద్రబాబును మించిన మాస్టర్ మైండ్ మరొకరు లేరు..దటీజ్ బాబు..!
