కరోనా మహమ్మారి పట్టణాలనే కాదు, పల్లెల్లనూ వణికిస్తోంది. మారుమూల గ్రామాలను కరోనా చుట్టేయడంతో చిత్రవిచిత్రమైన పరిస్థితులు నెలకొంటున్నాయి. ఆదిలాబాద్‌ జిల్లా ఇంద్రవెల్లి మండలం తేజాపూర్‌ పరిధిలోని సాలె గూడకు చెందిన ఓ గిరిజన బాలికకు ఊరికి దూరంగా ఉంటోంది. కరోనా పాజిటివ్ రావడమే అందుకు కారణం. వైరస్‌ వ్యాప్తి చెందకుండా గ్రామస్తులు అప్రమత్తమయ్యారు. కుటుంబ సభ్యుల సహకారంతో గ్రామ శివారులో ప్రత్యేకంగా ఓ గుడిసెను ఏర్పాటు చేసి, బాలికకు అక్కడ ఆశ్రయం కల్పించారు. కరోనా కారణంగా ఆ అమ్మాయి ఊరికి దూరంగా ఉండాల్సివస్తోంది. గుడిసెలో ఓ మంచంపై పుస్తకం పట్టుకొని చదువుతున్న ఆ అమ్మాయి ఫోటో వైరల్ గా మారింది. ‘పాపం.. ఆ అమ్మాయి త్వరగా కోలుకోవాలి’ అని నెటిజన్లు అంటున్నారు.
జయశంకర్‌ భూపాలపల్లి జిల్లాలో..
జయశంకర్‌ భూపాలపల్లి జిల్లా మహదేవ్‌పూర్‌ మండల కేంద్రంలోని బాలికల ఆశ్రమ పాఠశాల విద్యార్థినులకు ఈనెల 22న కరోనా పరీక్షలు నిర్వహించారు. ఈ సందర్భంగా ఎడపల్లి గ్రామానికి చెందిన ఒక విద్యార్థినికి పాజిటివ్‌గా తేలింది. మరునాడు గ్రామానికి చెందిన ఇద్దరు వృద్ధులు అనుమానంతో పీహెచ్‌సీకి వచ్చి పరీక్షలు చేయించుకోగా వారికి కూడా పాజిటివ్ అని నిర్ధారించారు. దీంతో వైద్య సిబ్బంది 38 మందికి పరీక్షలు నిర్వహించగా 13 మందికి పాజిటివ్‌గా తేలింది.
Must Read ;- యాదాద్రికి కరోనా ఎఫెక్ట్ : 36 మందికి పాజిటివ్
