రాజమౌళికి జక్కన్న అనే పేరు అందుకే పెట్టా: ఎన్టీఆర్

జూనియర్ ఎన్టీఆర్ మొట్టమొదటిసారిగా ఓ పాన్ ఇండియా సినిమా చేస్తున్నారు. పైగా ఇది మల్టీస్టారర్ సినిమా. నందమూరి ఫ్యామిలీ హీరో, మెగా ఫ్యామిలీ హీరో కలిసి రాజమౌళి లాంటి దిగ్గజం దర్శకత్వంలో ట్రిపుల్ ఆర్ చేయడం పెద్ద విశేషం. ప్రస్తుతం కోవిడ్ పాజిటివ్ తో ఎన్టీఆర్ చికిత్స తీసుకుంటున్నారు. మరి ఈ సినిమా విశేషాలను ఎన్టీఆర్ నోట వింటే ఎలా ఉంటుంది. ఆప్రయత్నాన్ని ఇంటర్నేషనల్ ఫిలిం ట్రేడ్ ప్రచురణ సంస్థ డెడ్ లైన్ చేసింది. ఫోన్ ద్వరానే ఎన్టీఆర్ ను ఇంటర్వ్యూ చేసింది. ఈ ఇంటర్వ్యూలో ఎన్టీఆర్ ఏం చెప్పారో చూద్దాం.

కరోనా ప్రభావం గురించి మీరేమనుకుంటున్నారు?

నాకు చాలా ఇబ్బందికరంగా ఉంది. నేను మొదటి సినిమాలో నటించినప్పుడు నాకు 17 ఏళ్లు. అప్పట్నుంచి నేను ఏడాది 365 రోజులూ కష్టపడటానికి ఇష్టపడతాను. అలా పనిచేయగలిగే శక్తి నాకు ఉంది. ఇలా ఇంట్లో బందీగా ఉండటం ఇదే ఆఖరిసారి కావాలనుకుంటున్నాను. మరో కోణంలో ఆలోచిస్తే నాకు ఇద్దరు చిన్నపిల్లలు. వారితో గడపడానికి మంచి సమయం దొరికింది. అమ్మ, నా భార్య, బంధువులతో కూడా గడపగలిగాను. షూటింగ్ కు వెళ్లాల్సి వచ్చినా అంతే ఉత్సాహంతో వెళతాను. మరో వైపు ఓటీటీ పుణ్యమా అని సినిమాల పరిధి బాగా పెరిగింది. ప్రజల అభిరుచులు కూడా మారుతున్నాయి. వారికేం కావాలో, నేనేం చేయాలో తెలుసుకోడానికి కూడా ఈ పరిస్థితులు తోడ్పడ్డాయి.

ఆర్ఆర్ఆర్ గురించి మాట్లాడదాం. దీన్ని ఆర్ఆర్ఆర్ అనాలా? ట్రిపుల్ ఆర్ అనాలా?

 ప్రాథమికంగా ఆర్ఆర్ఆర్. ట్రిపుల్ ఆర్ అని పలుకుతున్నారంతే.

రాజమౌళి, రామారావు, రామ్ చరణ్ కలిపి ట్రిపుల్ ఆర్ అన్నారు కదా. రౌద్రం, రణం, రుధిరం అని కూడా అంటున్నారు?

మొదట ఈ సినిమా మా పేర్లతోనే ప్రారంభమైంది. అరుదైన కలయిక ఇది. ఇండియాలో ఇప్పటిదాకా చూడని అతి పెద్ద మల్టీస్టారర్ ప్రయత్నం. అందుకే వర్కింగ్ టైటిల్ గా ట్రిపుల్ ఆర్ వచ్చింది. అలా ఇది చాలా పాపులర్ అయ్యింది. ఓ దశలో రాజమౌళి దీనికి ట్రిపుల్ ఆర్ అని ఎందుకు పెట్టకూడదు అనకున్నారు. అప్పుడు రౌద్రం, రణం, రుధిరం అనే పేరును నిర్ణయించారు.

ఈ ట్రిపుల్ ఆర్ ప్రయాణం ఎప్పుడు ప్రారంభమైంది?

2018 నవంబరులో ప్రారంభమైంది. రాజమౌళి ఈ ప్రాజెక్టు గురించి చెప్పినప్పుడే ఇది సుదీర్ఘమైన ప్రయాణం అని అర్థమైంది. ఆయన బాహుబలిని ఐదేళ్లపాటు రెండు భాగాలుగా తీశారు. ట్రిపుల్ ఆర్ విషయానికి వచ్చేసరికి మేము దాదాపు 8 నెలలు కరోనా మహమ్మారి బారిన పడ్డాం. సాంకేతికంగా ఈ సినిమాని 19 నెలల్లోనే పూర్తిచేశాం. సాంకేతికంగా చూస్తే ఈ సినిమాకు అంత సమయం అవసరం. ఇందులోని ఫైట్స్ అందరినీ ఆశ్చర్యచకితుల్ని చేస్తాయి. రాజమౌళి ఏ విషయంలోనూ రాజీపడరు. అక్టోబరు 13న విడుదల చేయాలనుకుంటున్నాం. ఇప్పటికే ఆ తేదీకే విడుదల చేయడానికి అవకాశం ఉంది.

కరోనా కారణంగా ఈ సినిమాలో మార్పులేమైనా జరిగాయా?

కథ పరంగా, బడ్జెట్ పరంగా ఎలాంటి మార్పూ జరగలేదు. మేము పనిచేస్తున్న వేగం మాత్రం మారిపోయింది. రేయింబవళ్లు పనిచేసి సినిమాని పూర్తిచేయగలిగాం. ఇలా చేయాల్సి రావడానికి కరోనానే కారణం. ఈ మహమ్మారి వల్ల చిత్ర పరిశ్రమ బాగా దెబ్బతింది. ఎవరి బాగోగులు వారే చూసుకోవాలి. ప్రభుత్వ పరంగా పెద్దగా సహకారం ఏమీ లేదు. సినిమా షూటింగ్ మొదలుకుని థియేటర్లో విడుదలయ్యేదాకా ఒక మహా యజ్ఞమే. థియేటర్లు ప్రారంభం కాగానే ప్రేక్షకులు బాగా ఆదరించారు. ఇది మాకు ఆశాకిరణం లాంటిది.

ఈ సినిమాని ఓటీటీలో విడుదల చేయాలని నిర్మాతలు భావిస్తున్నారా?

ఓటీటీలో విడుల చేయాలని ఎప్పుడూ అనుకోలేదు. ఇది పెద్ద తెరపైనే చూసి ఆనందించాల్సిన సినిమా. బాహుబలి, జురాసిక్ పార్క్, ఎవెంజర్స్ లాంటి సినిమాలను మీరు ఓటీటీలో చూసి ఎంజాయ్ చేయగలరా? అందుకే ఓటీటీ గురించి ఎప్పుడూ ఆలోచించలేదు. సినిమా హాళ్ల కోసం ఎంతకాలమైనా ఎదురుచూస్తాం. ఇలాంటి సినిమాలను చూడటానికి జనం థియేటర్లకు వస్తారన్న నమ్మకం మాకుంది. మనదేశం సినిమాల మీదే ఆధారపడి ఉంది. ప్రేక్షకులు ఇలాంటి సినిమాలను థియేటర్లలోనే చూస్తారు. ఇది కూడా అలా చూడాల్సిన సినిమానే.

ఈ సినిమా మీద మీకున్న నమ్మకం ఏమిటి?

మన దేశంలో అత్యంత సక్సెస్ ఫుల్ దర్శకుడు రాజమౌళి చేసిన సినిమా ఇది. ‘బాహుబలి’ అతను ఎలాంటి మార్కెట్ ను సృష్టించగలిగాడో మీకు తెలుసు. అతని ఖ్యాతి దిగంతాలకు వ్యాపించింది. పాన్ ఇండియా సినిమాకి తెరతీశాడు. ఒక తెలుగు చిత్రం మన దేశంలోనే కాకుండా చైనా, అమెరికా, ఇంగ్లండు లాంటి దేశాల్లో సైతం విజయఢంకా మోగిస్తుందని మాకు తెలియదు. దాన్ని రాజమౌళి నిరూపించారు. ఆర్ఆర్ఆర్ కూడా ఆ స్థాయి సినిమా అనే నమ్మకం మాకుంది. రామ్ చరణ్, నేను కలిసి నటించడం వల్ల కూడా ఇది క్రేజీ ప్రాజెక్టు అయ్యింది.

రాజమౌళితో మీ అనుభవం గురించి చెప్పండి?

ఇది ఆయనతో నేను చేస్తున్న నాలుగో సినిమా. 2001లో మేము మొదటిసారి కలిసి ప్రయాణించాం. భారతీయ సినిమాల పరంగా ఏదో సాధించాలన్న తపన ఉన్న దర్శకుడు. అప్పటికీ ఇప్పటికీ ఆయన ఆలోచనలు ఏమీ మారలేదు. ఆయన ఓ టాస్క్ మాస్టర్. నటుల నుంచి నటనను ఎలా రాబట్టుకోవాలో బాగా తెలుసు. ఆ విషయంలో రాజీ పడడు. ఆయనలోని ఆ గుణాన్ని గమనించే జక్కన్న అనే ముద్దు పేరు పెట్టాను.

ఇది ఒక శిల్పి పేరు. ఆయన నుంచి ఎన్నో అద్భుతమైన శిల్పాలు రూపొందాయి. సినిమాని అలాంటి కళాఖండంగా మలిచే శిల్పి మా జక్కన్న. నిజానికి ఇది ఎంతో కఠినమైన పని, అయినా ఆయన రాజీపడరు సినిమాని అందంగా చెక్కుతూనే ఉంటారు. ఆయనతో పనిచేయడం నాకెంతో ఆనందం కలిగిస్తుంది. నా అప్తుడు ఇంతలా ఎదిగినందుకు నాకెంతో ఆనందంగానూ, గర్వంగానూ ఉంది.

మీరు పోషించింది వాస్తవ పాత్ర. ఈ విప్లవకారుడి పాత్ర పోషణ కోసం మీరు ఎలాంటి పరిశోధన చేశారు? ఏమైనా ఒత్తిడి ఫీలయ్యారా?

కచ్చితంగా. ఈ విప్లవ హీరోలకు దేశవ్యాప్తంగా పరిచయం చేయబోతున్నాం. వీరు స్థానికి పోరాట యోధులు. వారు సాధించినదాన్ని ప్రపంచానికి చూపించటమే మా పని. వారి గురించి మాకు కొంత తెలుసు. చాలా పరిశోధన కూడా జరిగింది. ఆ పాత్రలను తెరపై చూపించాల్సి వచ్చినపుడు మేం వారి జీవితాల్లోకి వెళ్లాల్సి వచ్చింది. ఇప్పుడు ఈ పాత్రల కథలను నా పిల్లలకు చెబుతున్నా.

ఈ పాత్ర పోషణ కోసం ట్రైనింగ్ తీసుకున్నారా?

అవును.. దాదాపు 18 నెలల పాటు కఠినమైన శిక్షణ తప్పలేదు. ముఖ్యంగా శారీరకంగా ఆ పాత్ర దృఢత్వం కనిపించాలి. అదనంగా 9 కిలోల బరువు పెరగాల్సి వచ్చింది.

లాక్ డౌన్ వల్ల మీ శరీరాకృతిని అంత కాలం ఎలా ఉంచగలిగారు?

అప్పటికే చాలా షూటింగ్ పూర్తిచేశాం. లాక్ డౌన్ లో ఉన్నప్పుడు బరువు తగ్గే అవకాశం కూడా రాలేదు.

ఈ సినిమాకు సంబంధించి ఇంకా ఏమైనా విశేషాలు చెబుతారా?

రాజమౌళి ఈ ఇంటర్వ్యూ చదివితే అతను గొడ్డలి పట్టుకుని నా వెంటపడతాడు. ప్రేక్షకులు థియేటర్లో సినిమా చూసి ఆ థ్రిల్ ఫీలవ్వాల్సిందే. ఇంతకుమించి నేను ఈ సినిమా గురించి ఏమీ చెప్పలేను.

ఇటీవలి కాలంలో ఇంగ్లీషు సినిమాలే కాకుండా అంతర్జాతీయ సినిమాలు చాలా వస్తున్నాయి. సినిమా పరిధి పెరగడం వల్ల కొత్త ప్రేక్షకులూ పుట్టుకొస్తున్నారు. చైనా లాంటి దేశాల్లో బాహుబలి బాగా వసూళ్లు సాధించింది. దీన్ని దృష్టిలో ఉంచుకునే మీరు సినిమాలు చేస్తున్నారా?

బాహుబలి ప్రపంచ ద్వారాలు తెరిచింది. దంగల్ అనే సినిమా చైనాలో అత్యధిక వసూళ్లు సాధించింది. ప్రపంచంలోని అనేక దేశాల్లో ఇలాంటి సినిమాలకు ఆదరణ లభిస్తోంది. ఇది మంచి పరిణామంగా నేను భావిస్తున్నా. కానీ ప్రతి సినిమా అలా చేయలేదు. నటుడిగా మనకు అలాంటి అవకాశం వచ్చినప్పుడే ప్రతి ఒక్కరికీ ఆ కథను చూపించగలం.

మీరింకా ఏయే సినిమాలు చేస్తున్నారు? కొరటాల శివతో చేస్తున్నారని విన్నాం?

మేమిద్దరం కలిసి జనతా గ్యారేజ్ చేశాం. ఇది బ్లాక్ బస్టర్. ట్రిపుల్ ఆర్ తర్వాత మేము మళ్లీ కలుస్తున్నాం. ప్రస్తుతం ఈ ప్రాజెక్టు స్క్రిప్టు దశలోనే ఉంది. ఆ తర్వాత కేజీఎఫ్ దర్శకుడు ప్రశాంత్ నీల్ తో కలిసి ఓ సినిమా చేయబోతున్నా.

కొరటాల శివ సినిమా పాన్ ఇండియా సినిమా అంటున్నారు?

పాన్ ఇండియా అనే పదాన్ని నేను ఇష్టపడను. ఇది వేపుడు వేసే పాన్ అనేలా నాకు వినిపిస్తుంది. మంచి సినిమాను మన దేశంలోని అనేక భాషల్లో చూపించే ప్రయత్నమిది. ట్రిపుల్ ఆర్ ను అలాగే చూపించబోతున్నాం.

కెమెరా వెనక్కి వెళ్లే ఆలోచన మేకేమైనా ఉందా?

ఇప్పటిదాకా నాకు అలాంటి ఆలోచన లేదు. నేను విధిని గట్టిగా నమ్ముతాను. నటుడిగా కథలో భాగం కావాలని కోరుకుంటాను.. కాబట్టి దర్శకత్వం చేపట్టే ఆలోచన లేదు. మంచి కంటెంట్ ను జనంలోకి తీసుకువెళ్లడానికి ఇష్టపడతాను. మన భారతీయ సాంస్కృతిక వారసత్వాన్ని ప్రపంచంతో పంచుకునే కంటెంట్ గా అందించాలనుకుంటున్నాను.

హాలీవుడ్ కు వెళ్లే ఆలోచన ఉందా?

ఎందుకు వెళ్లకూడదు? మన భారతీయ నటుడు ప్రపంచ సినిమాల్లో నటించడానికి అవకాశం ఉంటే అది కచ్చితంగా గొప్ప పనే.

– హేమసుందర్ పామర్తి

courtesy: https://deadline.com/