కొంచెం చిలిపితనం .. మరికొంచెం కొంటెతనం కలిస్తే రష్మిక. అందం .. అందుకు తగిన అభినయం రంగరిస్తే రష్మిక. ఆమె కుర్రకారు కలలను ఆక్రమించే నాయిక .. వాళ్ల ఊహలను ఉప్పెనలా కమ్ముకునే మత్తుపూల మాలిక. చాలామంది కథానాయికలకు అందం .. అభినయం ఉన్నప్పటికీ అదృష్టం ఉండదు. ఈ కారణంగానే పాపం .. వాళ్లు చాలా వెనకబడుతుంటారు. అయితే అందం .. అభినయంతో పాటు అదృష్టం కూడా పుష్కలంగా ఉన్న కథానాయికగా రష్మిక కనిపిస్తుంది. ఫస్టుమూవీతోనే తిరుగులేని హిట్ అందుకోవడమే ఆమె అదృష్టానికి నిలువెత్తు నిదర్శనం.
‘ఛలో’ సినిమాతో రష్మిక తెలుగు తెరకి పరిచయమైంది. యూత్ ఫుల్ లవ్ స్టోరీ కావడంతో ఈ సినిమా కుర్రాళ్ల గుండెల్లోకి గూడ్స్ లా దూసుకెళ్లింది. ఇంత క్యూట్ గా ఉన్న హీరోయిన్ ను ఇంతవరకూ చూడలేదనే అనుకున్నారు. మంచి మార్కులు వేసి ప్రమోట్ చేయకపోతే, మళ్లీ తెరపైకనిపించదేమోననే బెంగతో చకచకా స్టాంపింగ్ చేసేశారు. హిట్టు పట్టుకొచ్చి రష్మిక దోసిట్లో పెట్టేశారు. ఆ మాత్రం అభిమానం చూపిస్తే చాలు అల్లుకుపోనూ అనుకుంటూ రష్మిక తన దూకుడు చూపించింది. విజయ్ దేవరకొండ జోడీగా చేసిన ‘గీత గోవిందం’ సినిమా ఆమెకి భారీ హిట్ తెచ్చిపెట్టింది.
‘గీత గోవిందం‘ సినిమాలో రష్మిక చేసిన అల్లరికి కుర్రాళ్లు మురిసిపోయారు .. ఆమె అలిగితే సీట్లలో కూర్చునే బ్రతిమాలే ప్రయత్నాలు చేశారు. బ్రహ్మచారులంతా పెళ్లంటూ చేసుకుంటే ఇలాంటి అమ్మాయినే పెళ్లి చేసుకోవాలని ఫిక్స్ అయ్యారు. ఆ పాత్రతో ఆమె అంతగా ప్రభావితం చేసింది. ఆ క్రేజ్ తోనే ఆమె క్రితం ఏడాది ‘భీష్మ’ .. ‘సరిలేరు నీకెవ్వరు‘ సినిమాల విజయాలను తన ఖాతాలో వేసుకుంది. ఈ రెండు సినిమాలుస్టార్ హీరోయిన్స్ రేస్ లో రష్మికను ‘టాప్ 3’ ప్లేస్ లో నిలబెట్టాయి.
ప్రస్తుతం రష్మిక తెలుగులో ‘పుష్ప‘ సినిమా చేస్తోంది. సుకుమార్ దర్శకత్వం వహిస్తున్న ఈ సినిమాలో ఆమె బన్నీ జోడీగా అలరించనుంది. అంతేకాదు .. తమిళంలో కార్తీ సరసన ‘సుల్తాన్‘ చేస్తోంది. బక్కియరాజ్ కణ్ణన్ దర్శకత్వం వహిస్తున్న ఈ సినిమాలో కూడా, ప్రాధాన్యత కలిగిన పాత్రలోనే ఆమె కనిపించనుంది. ఇక కన్నడలో ధృవ్ సర్జా జోడీగా ‘పొగరు’ సినిమా చేస్తోంది. పనిలో పనిగా ఒక బాలీవుడ్ సినిమాకి కూడా గ్రీన్ సిగ్నల్ ఇచ్చేసింది. రష్మిక అందానికి మెచ్చి అదృష్టం కూడా గాఢంగా హగ్ చేసుకోవడంతో, న్యూ ఇయర్లో కూడా ఈ సుందరి దూసుకెళ్లడం ఖాయమనే అనిపిస్తోంది.
Must Read ;- రష్మికా మందన్న బాలీవుడ్ ఎంట్రీ..!
