Amaravathi Farmers Movement Reached 600 Days :
న‌వ్యాంధ్ర‌ప్ర‌దేశ్ నూత‌న రాజధాని అమరావతిని ప‌రిర‌క్షించుకునేందుకు అలుపెర‌గ‌ని పోరాటం సాగుతోంది. ఆదివారం నాటికి ఈ ఉద్యమం 600 రోజుల‌కు చేరుకుంది. అయినా గానీ త‌మ డిమాండ్ మేర‌కు రాజ‌ధానిని అమ‌రావ‌తిలోనే కొన‌సాగిస్తామ‌ని జగన్ స‌ర్కారు ప్ర‌క‌టించేదాకా త‌మ ఉద్యమాన్ని ఆపేది లేదని ఈ సంద‌ర్భంగా అమరావతి రైతులు విస్ప‌ష్ట ప్ర‌క‌ట‌న చేశారు. ఉద్యమం 60 రోజుల‌కు చేరుకున్న సంద‌ర్భాన్ని పుర‌స్క‌రించుకుని ఆదివారం రైతులు త‌ల‌పెట్టిన ర్యాలీలు, నిర‌స‌న‌ల‌కు జగన్ స‌ర్కారు అనుమ‌తి నిరాక‌రించింది. అయితే పోలీసు ఆంక్ష‌ల‌ను తెంచుకుని అయినా నిర‌స‌న‌ల‌ను కొన‌సాగిస్తామ‌ని రైతులు ప్ర‌క‌టించారు. ఈ నేప‌థ్యంలో రైతుల‌ను నిర‌స‌న‌ల‌ను ఎక్క‌డిక‌క్క‌డ నిలువ‌రించేలా జగన్ స‌ర్కారు రాజధాని ప‌రిధిలోని గ్రామాల్లో పెద్ద ఎత్తున పోలీసు బ‌ల‌గాల‌ను మోహ‌రించింది. ఫ‌లితంగా ఆయా గ్రామాల్లో ఆదివారం ఉద‌యం నుంచే ఉద్రిక్త ప‌రిస్థితులు నెల‌కొన్నాయి.
న‌మ్మించి మోసం చేసిన జగన్
చంద్రబాబు హ‌యాంలోనే అమరావతిని రాజ‌ధానిగా ఎంపిక చేసినా.. తాను అధికారంలోకి వ‌చ్చినా రాజ‌ధానిని అమ‌రావ‌తిలోనే కొన‌సాగిస్తాన‌ని వైసీపీ అధినేత జగన్ చెప్పారు. అంతేకాకుండా ఆ మాట నిజమేనని న‌మ్మించేలా తాడేప‌ల్లిలో రాజ‌భ‌వ‌నం లాంటి ఇంటిని కూడా ఆయన నిర్మించుకున్నారు. ఇవ‌న్నీ చూసిన‌నం అయ‌న మాట నిజమేనని న‌మ్మి వైసీపీకి ఓట్లేశారు. అయితే ఎప్పుడైతే అధికారంలోకి వ‌చ్చారో అప్పుడే జగన్ త‌న నిజస్వ‌రూపాన్ని ప్ర‌ద‌ర్శించ‌డం మొద‌లెట్టారు. అమరావతి ప‌రిధిలో ఇన్ సైడర్ ట్రేడింగ్ జరిగిందని చెప్పిన జగన్.. దానిపై ద‌ర్యాప్తు చేస్తామ‌ని, రాజధాని ప‌రిధిలో చంద్రబాబు సామాజిక వ‌ర్గం త‌ప్పించి వేరే ఎవ్వ‌రూ లేర‌ని సంచలన వ్యాఖ్యలు చేశారు. మొత్తంగా అమరావతిపై త‌న‌దైన శైలి క‌క్ష‌ను పెంచుకున్న జగన్.. అమరావతిని పురిట్లోనే చంపేసే దిశ‌గా సాగారు. ఇందులో భాగంగానే మూడు రాజ‌ధానుల మాట ఎత్తుకున్న జగన్.. అమరావతిని శాస‌న రాజ‌ధానిగా కొన‌సాగిస్తూ.. ప‌రిపాల‌నా రాజ‌ధానిని విశాఖ‌లో, న్యాయ రాజ‌ధానిని క‌ర్నూలులో ఏర్పాటు చేయ‌నున్న‌ట్లుగా ప్ర‌క‌టించారు. అందుక‌నుగుణంగా అసెంబ్లీలో తీర్మానం కూడా చేశారు. మొత్తంగా రాష్ట్ర ప్ర‌జ‌ల‌తో పాటు మ‌రీ ముఖ్యంగా రాజధాని కోసం వేలాది ఎకరాల భూముల‌ను ఇచ్చిన అమరావతి రైతుల‌ను జగన్ న‌మ్మించి న‌ట్టేట ముంచార‌నే చెప్పాలి.
చంద్రబాబు పిలుపే ఆల‌స్యం
రాష్ట్రంలోని అన్ని ప్రాంతాల‌కు స‌మ‌దూరంలో ఏపీ రాజ‌ధానిని అమరావతి ప‌రిధిలో ఏర్పాటు చేయాల‌ని నాటి ఏపీ సీఎం నారా చంద్ర‌బాబునాయుడు నిర్ణ‌యించారు. అయితే ఆ ప్రాంతంలో ప్ర‌భుత్వ భూములేవీ లేని కార‌ణంగా రైతుల నుంచి భూముల‌ను సేక‌రించాల‌ని భావించారు. ఇందుకోసం ల్యాండ్ పూలింగ్ పేరిట కొత్త త‌ర‌హా భూ సేక‌ర‌ణ‌కు శ్రీ‌కారం చుట్టారు. దీనికి రైతుల నుంచి భారీ స్పంద‌న వ‌చ్చింది. సింగిల్ పైసా ఖ‌ర్చు లేకుండా ప్రభుత్వం ఏకంగా 32 వేల ఎక‌రాల‌ను సేకరించింది. అదే స‌మ‌యంలో రైతుల నుంచి కూడా ఎలాంటి వ్యతిరేక‌త లేకుండానే.. త‌మ ప్రాంతంలో రాజధాని వ‌స్తే.. త‌మ బ‌తుకులు మారిపోతాయ‌ని భావించి భూములు ఇచ్చారు. ఈ భూసేక‌ర‌ణ ఓ య‌జ్జంలా జ‌ర‌గ్గా.. సింగిల్ పైసా ఖ‌ర్చు లేకుండా వేలాది ఎకరాల సేక‌ర‌ణ‌పై ఇత‌ర రాష్ట్రాలు, కేంద్ర ప్రభుత్వం స‌హా పలు ఇత‌ర దేశాలు కూడా చంద్రబాబు స‌ర్కారు, రైతులపై ప్ర‌శంస‌ల జ‌ల్లు కురిపించాయి. భూసేక‌ర‌ణ పూర్తి కాగానే.. తొలుత సచివాలయం నిర్మాణం చేప‌ట్టిన చంద్రబాబు స‌ర్కారు.. ఆ తర్వాత అసెంబ్లీని, త‌ద‌నంత‌రం రాష్ట్ర హైకోర్టును.. వాటికి స‌మాంత‌రంగా ఉద్యోగులు, అధికారుల‌కు ఇళ్లు తదిత‌రాల నిర్మాణాల‌ను కూడా చేప‌ట్టింది. మొత్తంగా అప్ప‌టిదాకా సాగు భూములుగా ఉన్న అమరావతి రోజుల వ్య‌వ‌ధిలోనే రాజధాని రూపును సంత‌రించుకుంది.
జగన్ రాగానే.. నిలిచిన అభివృద్ధి
అయితే ఎప్పుడైతే జగన్ సీఎంగా ప‌ద‌వీ బాధ్య‌త‌లు చేప‌ట్టారో.. ఆ మ‌రుక్ష‌ణ‌మే రాజధానిలో అభివృద్ధి ప‌నుల‌న్నీ నిలిచిపోయాయి. అప్ప‌టికే రాజధానిలో పెట్టిన వేలాది కోట్ల రూపాయ‌లు బూడిద‌లో పోసిన ప‌న్నీరే అయ్యింద‌న్న వాద‌న‌లు వినిపించాయి. బంగారం పండే త‌మ భూముల‌ను రాజధాని కోస‌మంటూ ఇస్తే.. ఇప్పుడు వాటిని బీడు భూములుగా మార్చ‌డంతో పాటు త‌మ జీవ‌నోపాధిని దెబ్బ కొట్టేలా వ్య‌వ‌హ‌రిస్తున్న జగన్ స‌ర్కారు తీరును నిర‌సిస్తూ అమరావతి రైతులు ఉద్యమాన్ని ప్రారంభించారు. రాజధాని ప‌రిధిలోని 29 గ్రామాల్లో ఎక్క‌డిక‌క్క‌డ దీక్షా శిబిరాలు ఏర్పాటు చేసుకుని క‌రోనాను కూడా లెక్క చేయ‌కుండా నిర‌స‌న‌లు కొన‌సాగించారు. అయితే ఈ దీక్ష‌ల‌ను కూడా భ‌గ్నం చేసే దిశ‌గా క‌దిలిన జగన్ స‌ర్కారు.. కొంద‌రు పెయిడ్ ఆర్టిస్టుల‌ను రంగంలోకి దించి పోటీ ఉద్య‌మాల‌ను కూడా చేయించింది. అయితే ఎక్క‌డా వెన‌క్కు త‌గ్గ‌ని అమరావతి రైతులు.. పోలీసుల నుంచి ఆంక్ష‌లు క‌ఠిన‌తర‌మ‌వుతున్నా కూడా వెన‌క్కు త‌గ్గ‌కుండా ఉద్యమాన్ని కొన‌సాగిస్తున్నారు. ఆ ఉద్యమం ఆదివారం నాటికి 600 రోజుల‌కు చేరింది.
లోకేశ్ సంపూర్ణ మ‌ద్ద‌తు
అమరావతి రైతుల ఉద్యమం 600 రోజుల‌కు చేరుకున్న సంద‌ర్భంగా వారికి మ‌ద్ద‌తు తెలుపుతూ టీడీపీ జాతీయ ప్ర‌ధాన కార్య‌ద‌ర్శి నారా లోకేశ్ రైతుల‌కు త‌న సంపూర్ణ మ‌ద్ద‌తు ప్ర‌క‌టించారు. ఈ మేర‌కు ట్విట్ట‌ర్ వేదికగా ఆయన ఓ ఆస‌క్తిక‌ర ట్వీట్ చేశారు. ఈ ట్వీట్ లో ‘‘అమరావతిని అంతం చేసేందుకు వైకాపా నాయకులు గల్లీ నుండి ఢిల్లీ వరకూ చేసిన కుట్రలన్నింటిని రైతులు ఓర్పుతో ఛేదించారు. బెదిరింపులు,అణిచివేత, అరెస్టులకు అదరం..బెదరం అంటూ 600 రోజులుగా జై అమరావతి ఉద్యమంలో భాగస్వామ్యమైన రైతులు, మహిళలు, యువత కు ఉద్యమాభివందనాలు. రోడ్లను సైతం తవ్వేస్తూ అమరావతిని చంపేస్తాం అని ఆనందపడుతున్న జగన్ గారూ!.. మీరు తవ్వుకున్న ఆ గుంతల్లోనే వైకాపా ప్రభుత్వాన్ని ప్రజలు పూడ్చిపెట్టబోతున్నారు. అవమానాల్ని భరిస్తూనే రాజధాని అమరావతి గొప్పతనాన్ని దేశమంతా తెలిసేలా చేసిన రైతులనే అంతిమ విజయం వరించబోతుంది’’ అని లోకేశ్ పేర్కొన్నారు.
Amaravathi Farmers Movement Reached 600 Days
జగన్ తీరుపై చంద్రబాబు మండిపాటు
అమరావతి ఉద్యమం 600 రోజులు పూర్తి చేసుకున్న సందర్భఁగా టీడీపీ అధినేత చంద్రబాబు.. జగన్ తీరును నిర‌సిస్తూ కీలక వ్యాఖ్యలు చేశారు. అమరావతి కోసం రైతులు సాగిస్తున్న ఉద్యమం చారిత్రాత్మకం అని ఆయన అన్నారు. జగన్ చేస్తున్న దాడి అమరావతిపై కాదని, యావత్ రాష్ట్ర సంపద సృష్టిపైనే అని చంద్రబాబు వ్యాఖ్యానించారు. రాజధాని కోసం పోరాటం చేస్తున్న దళిత రైతులపై ఎస్సీ, ఎస్టీ అట్రాసిటీ కేసులు పెడుతున్నారని చంద్రబాబు ఆరోపించారు. ఉద్యమాన్ని అణచాలని చూసినా మొక్కవోని దీక్షతో రైతులు చేసిన ఉద్యమం చరిత్రలో నిలిచిపోతుందన్నారు. రాజధాని అమరావతి నిర్మాణానికి కన్నతల్లి లాంటి 32 వేల ఎకరాల భూమిని రైతులు, రైతు కూలీలు త్యాగం చేశారని చంద్రబాబు గుర్తు చేశారు. వారు ఇచ్చిన భూమిలోనే హైకోర్టు, సచివాలయం, ఎమ్మెల్యేలు, ఎమ్మెల్సీలు, ఉద్యోగులకు ఇళ్లు కట్టించామన్నారు. అమరావతిలో ఇన్ సైడర్ ట్రేడింగ్ జరిగిందని, నేల పటుత్వం లేదని, ముంపు ప్రాంతమని, అన్ని వర్గాల ప్రజలుంటే కేవలం ఒకే సామాజిక వర్గమే ఉందంటూ వైసీపీ ప్రభుత్వం అసత్య ప్రచారం చేసిందని చంద్రబాబు మండిపడ్డారు. ఇన్ సైడర్ ట్రేడింగ్ జరగలేదని సుప్రీంకోర్టు తీర్పు ఇచ్చినా వైసీపీ తప్పుడు ప్రచారాలు ఆగలేదన్నారు. రాజధానిలో రోడ్లు వేసిన కంకరను దొంగతనంగా తవ్వుకుని, హైకోర్టు సమీపంలో ఇసుకను మాయం చేసే స్ధితికి వైసీపీ నేతలు వచ్చారని చంద్రబాబు ఆగ్రహం వ్యక్తం చేశారు. అంబేద్కర్ స్మృతి వనాన్ని సైతం చెడగొట్టారన్నారు.
