వరలక్ష్మీ శరత్ కుమార్ .. తెలుగు .. తమిళ సినిమాలను ఫాలో అయ్యేవారికి ఈ పేరును గురించి ప్రత్యేకంగా పరిచయం చేయవలసిన పనిలేదు. కెరియర్ తొలినాళ్లలో హీరోయిన్ గా మెరిసిన వరలక్ష్మీ, తన ఫ్యామిలీ నేపథ్యం కారణంగా గ్లామర్ విషయంలో ఒక పరిథిని దాటలేకపోయింది. అందువలన ఇతర హీరోయిన్స్ ధాటిని ఆమె తట్టుకోవడం కష్టమైపోయింది. ఇలాంటి పరిస్థితుల్లోనే తాను ఏ తరహా పాత్రలకు పనికి వస్తాననే ఆలోచన చేయడం .. విలన్ తరహా పాత్రలకు పనికి వస్తాననే విషయాన్ని పసిగట్టడం ఆమె తెలివితేటలకు నిదర్శనం.
వరలక్ష్మీ శరత్ కుమార్ విగ్రహం చాలా నిండుగా ఉంటుంది. విశాలమైన ఆమె కళ్లు ఆదేశిస్తున్నట్టుగా ఉంటాయి. ఆమె నడకలోను .. డైలాగ్ డెలివరీలోను ఆత్మవిశ్వాసం తొంగిచూస్తూ ఉంటుంది. అగ్నిపర్వతాలు లావా చిమ్ముతున్నా, కూల్ గా తాను చేయవలసిన పనిని చేసుకుంటూ వెళ్లే ఆమె విలనిజం ప్రేక్షకులకు విపరీతంగా నచ్చేసింది. అందువల్లనే హీరోయిన్ గా కంటే, విలన్ గానే ఆమె ఎక్కువగా బిజీ అయింది .. ఎక్కువ ప్రశంసలను అందుకుంది. నిబ్బరంతో కూడిన ఆమె విలనిజానికి తమిళ ప్రేక్షకులు నీరాజనాలు పడుతున్నారు.
తమిళంలో హీరోయిన్స్ ఎంపిక ప్రక్రియ జరుగుతున్నప్పుడు ఆప్షన్స్ ఉంటాయి. కానీ కథ ప్రకారం లేడీ విలన్ అవసరం అనిపించినప్పుడు అక్కడ అందరికీ ఉన్న ఏకైక అవకాశం వరలక్ష్మీనే. అక్కడి స్టార్ హీరోలను సైతం టెన్షన్ పెట్టేసే పవర్ఫుల్ విలన్ ఆమె. ఆ క్రేజ్ కారణంగానే తెలుగు నుంచి కూడా వరుస అవకాశాలు వెళ్లాయి. ‘తెనాలి రామకృష్ణ బీఏ బీఎల్’ .. ‘నాంది‘ … క్రాక్‘ సినిమాలతో ఇక్కడి ప్రేక్షకులను కూడా మంత్రముగ్ధులను చేసింది. బాలకృష్ణ – గోపీచంద్ మలినేని సినిమాలోను విలన్ పాత్రను దక్కించుకుంది. విలన్ గా మెప్పించడం వీజీ కాకపోయినా, క్రేజీ విలన్ గా ఆమె మార్కులు కొట్టేసింది.
Must Read ;- ఆ.. వార్తలను ఖండించిన మెహ్రీన్
