ఐపీఎల్ తాజా సీజన్లో అదిరిపోయే మ్యాచ్ అందించింది పంజాబ్ కింగ్స్ లెవెన్ టీమ్. చివరి వరకు ఊపిరి బిగపట్టేలా చేసి మ్యాచ్ను సూపర్ ఓవర్ వరకు తీసుకెళ్లింది. అయితే ఐపీఎల్ చరిత్రలో సూపర్ ఓవర్లో అత్యల్ప (2) స్కోరు నమోదు చేసి ఓటమి పాలైంది. మరోవైపు బెంగళూరు ఈ సీజన్ తొలి మ్యాచ్లో అదరగొట్టింది. సన్రైజర్స్ హైదరాబాద్పై 10 పరుగుల తేడాతో విజయం సాధించి ఘనంగా ఈ సీజన్ను ప్రారంభించింది. ఈ రెండు జట్ల మధ్య గురువారం తొలి మ్యాచ్ జరుగబోతోంది.
ఇప్పటికే యూఏఈ పరిస్థితులకు అలవాటు పడి, ఒక్కో మ్యాచ్ ఆడిన ఇరు జట్లూ రెండో మ్యాచ్కు సిద్ధమవుతున్నాయి. రెండు టీమ్లూ మెరుగైన ఆటతీరునే ప్రదర్శించి అంచనాలను అందుకున్నాయి. అయితే పంజాబ్ ఒత్తిడికి చిత్తవగా, సన్రైజర్స్పై బెంగళూరు సునాయాస విజయం సాధించింది. ఈ నేపథ్యంలో గురువారం జరుగబోతున్న మ్యాచ్లో విజయ పరంపరను కొనసాగించాలని బెంగళూరు భావిస్తుండగా.. ఈ సీజన్లో తొలి విజయం అందుకోవాలని పంజాబ్ పట్టుదలగా ఉంది. మరి, గురువారం సాయంత్రం 7:30 గంటలకు దుబాయ్ అంతర్జాతీయ క్రికెట్ స్టేడియంలో జరుగుతున్న ఈ మ్యాచ్లో విజయం ఎవరిని వరిస్తుందో చూడాలి.
కింగ్స్ లెవెన్ పంజాబ్ బలాలు
పెద్దగా అంచనాలు లేకుండా తొలి మ్యాచ్లో బరిలోకి దిగిన పంజాబ్ జట్టు అద్భుత ప్రదర్శనతో ఆకట్టుకుంది. గట్టి పోటీనిచ్చి ఢిల్లీకి చెమటలు పట్టించింది. అయితే సూపర్ ఓవర్లో ఒత్తడిని అధిగమించలేకపోవడంతో ఓటమి పాలైంది. ఓపెనర్ మయాంక్ అగర్వాల్ అసాధారణ ఆటతీరుతో ఢిల్లీకి చుక్కలు చూపించాడు. 60 బంతుల్లో 7 ఫోర్లు, 4 సిక్సర్లతో 89 పరుగులు చేశాడు. కేఎల్ రాహుల్, కరుణ్ నాయర్, మ్యాక్స్వెల్ కూడా రాణిస్తే పంజాబ్ బ్యాటింగ్ మరింత బలపడుతుంది. ఇక, బౌలింగ్ విభాగంలో షమీ ఫామ్లో ఉన్నాడు. తొలి మ్యాచ్లో కేవలం 15 పరుగులు ఇచ్చి మూడు కీలక వికెట్లు పడగొట్టాడు. విధ్వంసకర ఆటగాడు క్రిస్ గేల్ తుది జట్టులో ఉంటే పంజాబ్కు అవకాశాలు మరింత మెరుగవుతాయి.
బలహీనతలు
పంజాబ్ టీమ్ కెప్టెన్ రాహుల్ పేలవ ఫామ్తో సతమతమవుతున్నాడు. తొలి మ్యాచ్లో మంచి ఆరంభం లభించినప్పటికీ సద్వినియోగం చేసుకోలేకపోయాడు. అలాగే ఎన్నో అంచనాలు పెట్టుకున్న కరుణ్ నాయర్, పూరన్, మ్యాక్స్వెల్ విఫలమయ్యారు. బౌలింగ్ విభాగంలో షమీ తప్ప మిగిలిన వాళ్లు పూర్తిగా నిరాశపరిచారు. జోర్డాన్ 4 ఓవర్లలో ఏకంగా 56 పరుగులు ఇచ్చాడు. ఇక, ఒత్తిడిలో సమర్థంగా ఆడడంలో పంజాబ్ తరచుగా విఫలమవుతోంది. అటు బౌలింగ్, ఇటు బ్యాటింగ్ విభాగాల్లో నిరాశపరిచింది.
పంజాబ్ జట్టు (అంచనా)
క్రిస్ గేల్, కేఎల్ రాహుల్, కరుణ్ నాయర్, మయాంక్ అగర్వాల్, సర్ఫరాజ్ ఖాన్, గ్లెన్ మ్యాక్స్వెల్, నీషమ్, కాట్రెల్, జోర్డాన్, షమీ, బిష్ణోయ్
బెంగళూరు రాయల్ ఛాలెంజర్స్ బలాలు
ఈ సీజన్లో అటు యువకులతోనూ, ఇటు అనుభవజ్ఞులతోనూ బెంగళూరు జట్టు బలంగా ఉంది. కొత్త కుర్రాడు దేవదత్ పడిక్కళ్ మెరిశాడు. అరంగేట్ర మ్యాచ్లోనే అర్ధసెంచరీ చేసి ఆకట్టుకున్నాడు. ఇక, స్టార్ ప్లేయర్ ఏబీ డివిల్లియర్స్ కూడా అద్భుతంగా బ్యాటింగ్ చేశాడు. అరోన్ ఫించ్ కూడా ఆకట్టుకున్నాడు. మరోవైపు బౌలింగ్లోనూ బెంగళూరు సత్తా చాటింది. చాహల్ తన స్పిన్ మాయాజాలంతో మూడు కీలక వికెట్లు పడగొట్టాడు. శివం దూబే, స్టెయిన్, నవ్దీప్ కూడా బంతితో ఆకట్టుకున్నారు.
బలహీనతలు
`కింగ్` కోహ్లీ ఫామ్లో లేకపోవడం బెంగళూరును కలవరపెడుతోంది. మిడిల్ ఓవర్లలో వేగంగా ఆడడంపై టీమ్ దృష్టి సారించాల్సిన అవసరం ఉంది. బలమైన ప్రత్యర్థి ఎదురైనపుడే కోహ్లీ సేనలోని బలహీనతలు బయటపడతాయి. పేస్ బౌలింగ్ విభాగం మరింత కట్టుదిట్టంగా బౌలింగ్ చేయడంపై దృష్టి సారించాలి.
బెంగళూరు రాయల్ ఛాలెంజర్స్ జట్టు (అంచనా)
దేవదత్ పడిక్కళ్, ఫించ్, కోహ్లీ, డివిల్లీర్స్, శివమ్ దూబే, డేల్ స్టెయిన్, ఉమేష్ యాదవ్, నవ్దీప్ సైనీ, వాషింగ్టన్ సుందర్, యజ్వేంద్ర చాహల్, ఫిలిప్
మ్యాచ్ ఫేవరెట్
ఈ సీజన్లోని ఈ రెండు జట్లు ఆడిన తొలి మ్యాచ్లను పరిగణనలోకి తీసుకుంటే బెంగళూరునే ఫేవరెట్గా చెప్పాలి. అయితే అద్భుత పోరాట పటిమను కనబరిచిన పంజాబ్ను తేలికగా తీసుకోవడానికి లేదు. తమదైన రోజున మ్యాచ్ను ఒంటి చేత్తో మలుపు తిప్పగల ఆటగాళ్లు పంజాబ్లో ఉన్నారు.
