ఎవరో కుట్ర కేసులో అరెస్టయ్యారు.. వేరెవరో, అరెస్టయిన నాయకుడిని విడుదల చేయించాలంటూ లేఖ రాశారు. మధ్యలో ఈ వ్యవహారాన్ని జగన్ కు ముడిపెట్టడానికి భాజపా ఏపీ వ్యవహారాల ఇన్చార్జి సునీల్ డియోధర్ ప్రయత్నిస్తున్నారు. ఈ లేఖ వెనుక జగన్మోహన్ రెడ్డి ఉన్నారని భావించాలి అంటూ ఆయన పరోక్షంగా హెచ్చరిస్తున్నారు. డైరక్టుగా జగన్ నే ఉద్దేశిస్తూ ఆయన ట్వీట్ చేయడం ఇక్కడ గమనార్హం.
భీమ కోరేగావ్ కుట్రకేసులో అరెస్టైన వరవరరావు విషయంలో రాసిన లేఖ- తిరుపతి ఎమ్మెల్యే భూమన కరుణాకర్ రెడ్డి కి ఇబ్బంది తెచ్చిపెట్టింది. అనారోగ్యం, వృద్ధాప్యం దృష్ట్యా ఆయన విడుదలకు సహకరించాలని పేర్కొంటూ రాసిన లేఖపై కేంద్రంలోని బిజెపి పెద్దలు ఫైర్ అవుతున్నారు.
కుట్రకేసులో అరెస్టయి, బెయిల్ రాక జైలులో ఉండి వరవరరావు విచారణను ఎదుర్కొంటున్న విషయం తెలిసిందే. ఇప్పటికే పలు మార్లు పిటిషన్ వేసినప్పటికీ బెయిలు రాలేదు. ఈ నేపథ్యంలో లో ఇటీవల ఆయన తీవ్ర అనారోగ్యానికి గురయ్యారు. కోర్టు ఆదేశాల మేరకు ముంబాయి ఆసుపత్రిలో చికిత్స అందించారు. ఆస్పత్రినుంచి ఆయన తిరిగి జైలుకు కూడా చేరుకున్నారు. ఈ క్రమంలో పలువురు వరవరరావు విడుదలకు సహకరించాలని లేఖలు రాశారు.
వృద్ధాప్యం, తీవ్ర అనారోగ్యం దృష్ట్యా మానవతా దృక్పథంతో వరవరరావు విడుదలకు సహకరించాలని తిరుపతి ఎమ్మెల్యే భూమన కరుణాకర్ రెడ్డి ఇ ఉపరాష్ట్రపతి లేఖ రాశారు. అయితే దీనిపై బిజెపి రాష్ట్ర వ్యవహారాల ఇంచార్జ్ సునీల్ డియోధర్ తాజాగా తీవ్రంగా స్పందించారు. దేశ ప్రధాని హత్యకు కుట్రపన్నిన కేసులో అరెస్టయిన వరవరరావు విడుదలకు ఉపరాష్ట్రపతి కి ఎలా లేఖ రాస్తారని ప్రశ్నించారు. ఆయనపై వెంటనే చర్య తీసుకోవాలని వైకాపా అధినేత జగన్మోహన్రెడ్డిని కోరారు.
ఆయన ట్వీట్ పూర్తి పాఠం ఇలా ఉంది. :: జగన్ రెడ్డి గారూ.. దేశ ప్రధానమంత్రిని హతమార్చాలనే కుట్ర పన్ని అరెస్టయిన విరసం నేత వరవరరావును విడుదల చెయ్యాలని కోరిన భూమన కరుణాకరరెడ్డిని ఇంకా సస్పెండ్ చేయలేదంటే ఈ లేఖ మీ అనుమతితోనే వెళ్ళిందనుకోవాలా? తక్షణమే MLA పై చర్యలు తీసుకోని ప్రజలకు క్షమాపణ చెప్పాలి
#MaoistAgainstConstitution
ఎమ్మెల్యేపై చర్య తీసుకోకుంటే భూమన కరుణాకర్ రెడ్డి రాసిన లేఖ వెనక జగన్మోహన్ రెడ్డి ఇ ఉన్నారని భావించాల్సి వస్తుందని ట్విట్టర్ లో సునీల్ ఢియోధర్ పేర్కొన్నారు. కాగా కరుణాకర్ రెడ్డి లేఖ రాసిన దాదాపు నెల రోజులకు (జులై 18న కరుణాకర్ రెడ్డి లేఖ రాశారు) బిజెపి పెద్దలు ఈ విధంగా స్పందించడం కొసమెరుపు.
జగన్ రెడ్డి గారూ
దేశ ప్రధానమంత్రిని హతమార్చాలనే కుట్ర పన్ని అరెస్టయిన విరసం నేత వరవరరావును విడుదల చెయ్యాలని కోరిన భూమన కరుణాకరరెడ్డిని ఇంకా సస్పెండ్ చేయలేదంటే ఈ లేఖ మీ అనుమతితోనే వెళ్ళిందనుకోవాలా?
తక్షణమే MLA పై చర్యలు తీసుకోని ప్రజలకు క్షమాపణ చెప్పాలి#MaoistAgainstConstitution pic.twitter.com/0syhvtvUdY— Sunil Deodhar (@Sunil_Deodhar) August 29, 2020
