మెగాపవర్ స్టార్ రామ్ చరణ్ ప్రస్తుతం రెండు ప్రెస్టేజియస్ ప్రాజెక్ట్స్ ను ఏక కాలంలో ట్రాక్ మీద పెట్టాడు. అందులో ఒకటి తండ్రి చిరంజీవితో స్వీయ నిర్మాణంలో నటిస్తోన్న ‘ఆచార్య’ సినిమా అయితే.. మరొకటి యన్టీఆర్ తో నటిస్తున్న రాజమౌళి క్రేజీ మల్టీస్టారర్ ‘ఆర్.ఆర్.ఆర్’. ఈ రెండు సినిమాలు రిలీజ్ డేట్స్ తో లాక్ అయ్యాయి. ఆచార్య మే 13న విడుదలవుతుంటే.. సరిగ్గా ఐదు నెలల గ్యాప్ తో అంటే అక్టోబర్ 13న ఆర్.ఆర్.ఆర్ విడుదల కాబోతోంది. అయితే ఈ రెండు సినిమాలకు సంబంధించిన .. రెండు సర్ ప్రైజుల్ని మెగా ఫ్యాన్స్ కోసం రామ్ చరణ్ పుట్టినరోజున అంటే ఈ నెల 27న రెడీ చేస్తున్నారు మేకర్స్.
రామ్ చరణ్ పుట్టిన రోజు వేడుకుల్ని ఒక రోజు ముందుగానే అంటే.. మార్చ్ 26న నిర్వహిస్తున్నారు మెగా ఫ్యాన్స్. అయితే మార్చ్ 27న ఆచార్య లోని రామ్ చరణ్ సిద్ధ పాత్రకు సంబంధించిన లుక్ ను, అలాగే.. ఆర్.ఆర్.ఆర్ లో రామ్ చరణ్ అల్లూరి సీతారామరాజు లుక్ ను విడుదల చేసేందుకు మేకర్స్ సన్నాహాలు చేస్తున్నారట. ఈ లెక్కన ఇది మెగా ఫ్యాన్స్ కు డబుల్ ధమాకానే కదా. మరి ఈ వార్తలోని నిజానిజాలు ఏంటో తెలియాలంటే… మార్చ్ 27 వరకూ ఆగాల్సిందే.
