Allu Arha Debut In Shakuntalam Movie :
గుణశేఖర్ చాలా సింపుల్ గా కనిపిస్తారు .. ఎలాంటి ఆర్భాటాలు లేకుండా కూల్ గా తన పని చేసుకుంటూ వెళుతుంటారు. తన సినిమాలపై అంచనాలు పెంచకుండా, విడుదల తరువాత అవి విజయాల దిశగా దూసుకుపోయేలా చేస్తుంటారు. సాంఘిక చిత్రాలలో యాక్షన్ .. ఎమోషన్ లో గుణశేఖర్ ఎంతో ప్రాధాన్యతనిస్తారు. ఇక పౌరాణిక .. చారిత్రకాలపై కూడా ఆయనకి మంచి పట్టు ఉంది. బాలలతో చేసిన ‘రామాయణం’ .. ‘రుద్రమదేవి‘ సినిమాలు అందుకు నిదర్శనంగా చెప్పుకోవచ్చు. భారీ సెట్లలో భారీ చిత్రాలను తెరకెక్కించడం ఆయన సమర్ధతకు అద్దం పడుతుంటూ ఉంటుంది.
అలాంటి గుణశేఖర్ ‘ప్రతాపరుద్రుడు’ అనే చారిత్రకం .. ‘హిరణ్యకశిప’ అనే పౌరాణికం చేయాలనుకున్నారు. కానీ అందుకు పూర్తిస్థాయి పరిస్థితులు కలిసి రాని కారణంగా ఆయన ‘శాకుంతలం’ ప్రాజెక్టును పట్టాలెక్కించారు. కణ్వ మహర్షి ఆశ్రమంలో పెరిగిన శకుంతల – హస్తినాపురం రాజ్యానికి చెందిన దుష్యంత మహారాజు కి సంబంధించిన ప్రేమకథ ఇది. వాళ్ల గాంధర్వ వివాహం … శకుంతలకి దుర్వాసుడి శాపం .. భరతుడి జననం .. ఇలా అనేక ఆసక్తికరమైన మలుపులతో ఈ కథ నడుస్తుంది. అలాంటి ఈ సినిమా ఇప్పటికే చాలావరకూ చిత్రీకరణను జరుపుకుంది.
శకుంతలగా సమంత .. దుష్యంతుడిగా దేవ్ మోహన్ నటిస్తున్న ఈ సినిమాలో, అల్లు అర్జున్ కూతురు అల్లు అర్హ కూఆ కనిపించనున్నట్టు వార్తలు వచ్చాయి. అయితే అర్హ ఈ సినిమాలో చిన్నప్పటి శకుంతలగా కనిపించనుందా? బాల భరతుడి పాత్రలో కనిపించనుందా? అనే విషయాల్లో ఇంకా క్లారిటీ రావలసి ఉంది. ఇక హైదరాబాద్ – ‘గండిపేట’ పరిసరాల్లో ఈ సినిమా షూటింగుకి అనుమతులు వచ్చినట్టుగా చెబుతున్నారు. చాలా కాలం తరువాత అనుమతులు సంపాదించి అక్కడ షూటింగు జరుపుకుంటున్న సినిమాగా కూడా ‘శాకుంతలం’ ఇప్పుడు అందరినోళ్లలో నానుతోంది.
