నగరమంటే ఏంటి అనేవరైనా అడిగితే ఏం చేప్తాం..దుకాణాలు, పోస్ట్‌ ఆఫీసులు, హోటళ్లు, ప్రభుత్వ కార్యాలయాలు, గుడి, బడి, ఆసుపత్రి, పోలీస్ స్టేషన్.. ఇలా ప్రజలకు కావాల్సిన సదుపాయల.. సముదాయాన్ని నగరమంటారు అంటాం. ఇవన్నీ ఎక్కడ ఉంటాయి.. నగరంలో పలు చోట్ల ఉంటాయి. కానీ.. ఇలాంటి నగరమంతా ఒక భవనంలో ఉండడం సాధ్యమవుతుందా? ఊరుకోండి.. మీరు మీ జోకులు అనుకుంటున్నారు.. నిజమేనండీ.. అలాంటిది ఉందండీ.. కానీ ఆ భవనాన్ని చూడాలంటే యూఎస్‌లో అలస్కా రాష్ట్రంలోని విట్టియర్ అనే నగరానికి వెళ్లాల్సిందే.
అందాలకు నెలవు..
విట్టియర్ నగరం ఎంతో సుందరమైనది.. సిటీ చుట్టూ ఉన్న ఎత్తైన పర్వతాలు.. వాటిని దుప్పటిలా కప్పేసే మంచు.. ఇంకో వైపు సముద్రపు హోరు.. మరోవైపు జలపాతాల వయ్యారం.. వింటుంటేనే వావ్ అనిపిస్తుంది కదూ.. ఈ ప్రదేశంలోనే బెగిచ్ టవర్స్ అనే పద్నాలుగు అంతస్తుల భవనం సముదాయం ఉంది. ఇక్కడి ప్రదేశంలోని అధిక శాతం జనాభా బెగిచ్ టవర్స్ లోనే నివసిస్తున్నారు. . అసలు ఈ భవన నిర్మాణం.. ఈ ప్రాంతం నగరంగా మారడానికి వెనుక పెద్ద కథే ఉంది..
బెగిచ్ టవర్స్ స్పెషాలిటీ..
ఈ బెగిచ్ టవర్స్ సొంతిల్లు కలిగిన స్థానికులు కూడా ఉన్నారు. దానితోపాటు అద్దెకుండే వారి సంఖ్య కూడా తక్కువేమీ కాదు. వీరితోపాటు సీజనల్ విజిట్ చేయడానికి మరికొందరు వచ్చి పోతుండడం విశేషం. అలా వచ్చిన వారు కూడా ఈ భవనంలోనే ఉంటారు. అందుకోసం కొందరు గదుల్ని కొని పెట్టుకున్నారు. వినడానికి.. విడ్డూరంగా, ఆశ్చర్యంగా ఉన్నా.. ఈ భవనంలోని ప్రజలకు కవాల్సినవన్నీ అంటే.. జనరల్ స్టోర్‌, ఆస్పత్రి, పోలీస్ స్టేషన్, ప్రభుత్వ కార్యాలయాలు, చర్చి, బడి, లాండ్రీ, హోటల్‌ వంటి అన్ని ఈ భవనంలోనే ఉంటాయి. అంతేకాదు.. పర్యాటకుల కోసమని కూడా ప్రత్యేక ఏర్పాట్లు చేశారు. ఈ భవనంలోని పద్నాలుగో అంతస్తులో, టెర్రస్‌పై ప్రత్యేక గదులు ఏర్పాటు చేశారు. పండగలైనా, సమావేశాలైనా, ప్రజలంతా ఏకమై ఈ భవనంలోనే నిర్వహిస్తారు
అసలు కథేంటంటే..
ఈ బెగిచ్ వెనక కథ తెలుసుకోవాలంటే రెండో ప్రపంచయుద్ద సమయానికి వెళ్లాల్సిందే. 2వ ప్రపంచయుద్ద సమయంలో అమెరికా సైన్యం ఈ ప్రాంతాన్ని మిలటరీ క్యాంప్‌గా మార్చింది. అలాంటి సమయంలో అమెరికా చేసిన ఒక ఆలోచనే ఈ భవనానికి నాంది పలికింది. యుద్ధం ముగిసిన తర్వాత సైన్యం కోసం విట్టియార్‌లో పెద్ద భవన సముదాయం నిర్మించాలని సైన్యాధికారులు నిర్ణయించారు. ఇందులో భాగంగా, 1953లో మొదటి యూఎస్‌ ఆర్మీ ఇంజినీర్స్‌ ప్రధాన కార్యాలయం నిర్మాణం ప్రారంభించి 1957లో పూర్తిచేశారు. మొదట్లో దీన్ని అందరూ ‘హోగ్డే బిల్డింగ్‌’ అని పిలిచేవారు. దీనికి అనుసంధానంగా మరొక చిన్న భవన నిర్మాణంతో వారు ఆగిపోయారు. 1960 వరకు ఈ రెండు భవనాల్నే ఉపయోగించి.. ఆ తర్వాత సైన్యం అక్కడ నుంచి వెళ్లిపోయింది. అలా భారీ భవన నిర్మాణానికి మొదటి అడుగు పడింది.
చెక్కు చెదరని దృఢత్వం..
1964లో భూకంపం వచ్చినా కూడా 196 ఫ్లాట్‌లు కలిగిన ఆ భవనం చెక్కు చెదరలేదు. దాని వల్ల జనాసంచారం పెరిగిపోయింది. అలా అలా.. భవన సముదాయం పెరుగుతూ.. కొందరు స్థిరనివాసం కూడా ఏర్పాటుచేసుకున్నారు. అలా కాలానుగుణంగా నిర్మిస్తూ వచ్చిన ఆ భవనం నేడు ఓ నగరంగా మారిపోయింది. 1972లో ఈ భవనానికి అలస్కా నాయకుడు నిక్‌ బెగిచ్ పేరు మీద ‘బెగిచ్ టవర్స్’ అని నామకరణం చేశారు. అలా ‘హోగ్డే బిల్డింగ్‌’ కాస్త ‘బెగిచ్ టవర్స్’గా మారింది.
Must Read ;- ‘వర్క్‌ ఫ్రమ్‌ సైకిల్‌’ యాత్ర..!
