అమరావతి కోసం దీక్ష మొదలై సరిగ్గా ఏడాది అవుతోంది. ఇప్పుడు ఏపీ కి రాజధాని అంశమే పెద్ద సమస్యగా మారింది. సాక్షాత్తూ ప్రధాని చేతులమీదుగా పూర్ణాహుతితో అంకురార్పణ జరిగిన కలల రాజధాని కోసం నేడు పోరాటం సాగించాల్సిన పరిస్థితి. అప్పట్లో ప్రధాని సైతం తాము తోడుంటామన్న హామీ ఏమైంది.. అప్పట్లో ప్రధాని చేసిన ప్రసంగం.. ఏంటి.. ? ..పార్లమెంటులో ని మట్టిని, పవిత్ర జలాలను ఇచ్చిన తరువాత అసలు విషబీజం ఎక్కడ పడిందనే ప్రశ్న తలెత్తడం ఖాయం. ఒక్కసారి మోదీ ప్రసగం గుర్తుతెచ్చుకుంటే అర్థం చేసుకోవచ్చు.
అక్టోబరు 24 2015..ఏపీ రాజధాని అమరావతికి శంకుస్థాపన జరిగిన రోజు. ఆ రోజు జరిగిన కార్యక్రమానికి ప్రధాని మోదీ వచ్చి చెప్పిన మాటలు ఏపీ ప్రజలను అబ్బురపరిచాయి. ఆయన మట్టి, పవిత్ర జలం ఇచ్చి.. అందరినీ ఆశ్చర్యకితులను చేయడంతోపాటు తెలుగులో రెండుమూడు వ్యాఖ్యలు చేసి ఆకట్టుకున్నారు. అసలు మోదీ ఆ రోజు ఏం చెప్పారనేది ఓ సారి చూస్తే..
‘ప్రియమైన సోదర సోదరీమణులారా నమస్కారం. అందరికీ విజయదశమి శుభాకాంక్షలు .. ఈ రోజు శుభదినం.. గొప్పరాజధానికి చంద్రబాబు ప్రణాళిక వేశారు. అందుకు మేం తోడుంటాం. కేంద్రానికీ, ఏపీకి మంచి సంబంధాలున్నాయి.. వనరుల అభివృద్ధికి ఏపీలో అపార అవకాశాలున్నాయి. అందుకు ప్రణాళిక రూపొందించాం. మంజూరు చేశాం. నేను సైతం అమరావటికి మట్టి, నీరు సమర్పిస్తున్నాను. నా మట్టి, నా నీరు పథకం ఉంది..అలాగే నేనూ యమునా నది నుంచి పవిత్ర నీరు తెచ్చాను. మట్టి తీసుకురావడమంటే మీ అభివృద్ధిలో కలసిఉంటామనే ఉద్దేశం.
Must Read ;- అమరావతికి ఇచ్చింది మట్టి, నీళ్లేగా.. బీజేపీ నేతలకు కేటీఆర్ కౌంటర్
విభజన అనంతరం కూడా కొంతమంది విభేదాలు రెచ్చగొట్టేలా చూస్తున్నారు. కొత్త నగరాలను ప్రకృతి వైపరీత్యాలను తట్టుకుని నిలబడే తరహాలో నిర్మించాలి. అమరావతికి తెలంగాణ కేసీఆర్ ని చంద్రబాబు ఆహ్వానించడం నాకూ ఆనందంగా ఉంది. ముందుచూపు లేకుండా అప్పటి పాలకులు చేసిన విభజన రెండు ప్రాంతాలకూ నష్టం చేసింది. కొన్ని సమస్యలు ఇంకా ఉన్నాయి. వాటిని సామరస్య పూర్వకంగా పరిష్కరించుకోవాలి. రాష్ట్రాలు వేరైనా తెలుగు ఆత్మ ఒక్కటే.
తెలుగువారు చాలా తెలివైనవారు.. యువత అన్ని రంగాల్లో ముందున్నారు. యువతపైనే దేశ భవిష్యత్ ఆధారపడింది. రెండు తెలుగురాష్ట్రాలు విడిపోయినా కలసి పనిచేస్తే అభివృద్ధి సాధ్యం. అదే జరుగుతుందన్న విశ్వాసం నాకుంది. వాజపేయి హయాంలో మూడు రాష్ట్రాలు ఏర్పాటైనా అవి సామరస్యంగా అభివృద్ధి సాధిస్తున్నాయి.
శతాబ్దాల చరిత్ర కలిగిన తెలుగువారు.. వాటన్నింటినీ గుర్తుంచుకునే విధంగా కొత్త రాజధాని నిర్మించుకుంటున్నారు. ప్రపంచం నలుమూలలనుంచి సాంకేతిక జ్ఞానాన్ని సేకరించి భవిష్యత్ తరాలకు స్ఫూర్తినిచ్చే రాజధాని నిర్మాణానికి చంద్రబాబు శ్రీకారం చుట్టారు. దేశ స్వాతంత్ర్యానంతరం గొప్ప నగరాల నిర్మాణం ఇప్పటివరకు జరగలేదు. ప్రపంచంలో పలు దేశాలు ఆధునిక, చారిత్రల నేపథ్యం కలగలిపి నగరాలను నిర్మిస్తున్నాయి. అలాగే మన దేశం కూడా కొత్త నగరాల నిర్మాణం జరిపేందుకు సిద్ధంగా ఉంది. అలా జరిగితేనే ప్రజలకు సరైన జీవనప్రమాణాలు అందుతాయి. కాలుష్య రహితంగా ఉండేలా, వ్యర్థాలు లేని నగరాలను నిర్మించుకోవాలి.
దేశంలోని పట్టణాల అభివృద్ధికి అమరావతి దిక్సూచి కావాలి. మంచి నగరాల నిర్మాణంలో భాగంగా దేశంలో 100 నగరాలను స్మార్ట్ సిటీలుగా అభివృద్ధి చేయాలని బీజేపీ ప్రభుత్వం నిర్ణయించింది. నేను నీరు, మట్టి ఏదో ఊరికే తేలేదు. దేశ రాజధానే ఏపీ రాజధానిలో భాగం అయిందని చెప్పడమే ఉద్దేశం. జపాన్ మంత్రి కొత్త నగరాల ఏర్పాటులో ఉన్న సమస్యలను చెప్పడం గుర్తుంది. 2001లో గుజరాత్‌లో వచ్చిన భూకంపం నేను మర్చిపోలేదు.’’
ఇదీ మోదీ ప్రసంగ పూర్తి సారాంశం. మరి అప్పుడు చెప్పిన మాటలు గతం. తరువాత కేంద్ర ప్రభుత్వం చెబుతున్నది వర్తమానం.. గతానికి, వర్తమానానికి ఎంత తేడా ఉందో.. దీన్ని బట్టి అర్థం చేసుకోవచ్చు.
Also Read ;- వీర్రాజు మాటల్లో కుట్రకోణం దాగి ఉందా?
