మున్సిపల్ ఎన్నికల నామినేషన్ల వేళ అన్నమయ్య జిల్లా పుంగనూరులో అరాచకాలకు తెగబడిన కేసుల్లో వైసీపీ ఎంపీ పెద్దిరెడ్డి మిథున్‌రెడ్డికి హైకోర్టులో ఎదురుదెబ్బ తగిలింది. తనపై నమోదైన కేసులను కొట్టేయాలని, అరెస్టు నుంచి రక్షణ కల్పిస్తూ మధ్యంతర ఉత్తర్వులు ఇవ్వాలని కోరుతూ మిథున్ రెడ్డి వేసిన పిటిషన్ వేశారు. ఐతే రక్షణ కల్పించేందుకు కోర్టు నో చెప్పడంతో మిథున్ రెడ్డిని పోలీసులు ఏ క్షణంలోనైనా అరెస్ట్ చేసే అవకాశాలు స్పష్టంగా కనిపిస్తున్నాయి.
నామినేషన్లు వేసేందుకు వెళ్తున్న టీడీపీ శ్రేణులపై దా*డులకు తెగబడటం, ప్రైవేటు బౌన్సర్లతో కారును తెలుగుదేశం కార్యకర్తలపైకి ఉద్దేశపూర్వకంగా నడిపి హ*త్యాయత్నానికి పాల్పడటం వంటి తీవ్ర నేర ఘటనలపై ఈ నెల 16న పుంగనూరు పట్టణ పోలీసులు మిథున్‌రెడ్డి, ఆయన అనుచరులపై నాలుగు కేసులు నమోదు చేశారు. విచారణ సందర్భంగా పోలీసుల తరఫున పీపీ మెండ లక్ష్మీనారాయణ వాదనలు వినిపిస్తూ.. మిథున్ రెడ్డి ప్రైవేటు బౌన్సర్లు, వాహనాల్లో కర్రలు, రాడ్లు తీసుకొచ్చి దా*డులు చేశారని తెలిపారు. “పుంగనూరు తన అడ్డా” అనే రీతిలో వ్యవహరిస్తూ నామినేషన్ కేంద్రం వద్ద తీవ్ర శాంతిభద్రతల సమస్యను సృష్టించారని కోర్టు దృష్టికి తీసుకెళ్లారు.
ఫిర్యాదుదారుల తరఫు సీనియర్ న్యాయవాదులు పోసాని వెంకటేశ్వర్లు, పీవీజీ ఉమేశ్‌చంద్ర వాదనలు వినిపిస్తూ.. నామినేషన్ కేంద్రానికి వెళ్లడానికి మిథున్ రెడ్డి అసలు అభ్యర్థి కాదని, పోటీలో ఉన్న వ్యక్తిని బలపరిచే వ్యక్తి కూడా కాదని స్పష్టం చేశారు. అలాంటప్పుడు భారీ కాన్వాయ్, ప్రైవేటు బౌన్సర్లతో వెళ్లాల్సిన అవసరం ఏమొచ్చిందని ప్రశ్నించారు. క్వాష్ పిటిషన్లలో మధ్యంతర ఉత్తర్వులు పొందే అర్హత ఆయనకు లేదని, అరెస్టు నుంచి రక్షణ పొందేందుకు ఆయన పూర్తిగా అనర్హుడని గట్టిగా వాదించారు.
ఇరువైపుల వాదనలు విన్న హైకోర్టు న్యాయమూర్తి డాక్టర్ జస్టిస్ వై.లక్ష్మణరావు..ఎంపీకి అరెస్టు నుంచి రిలీఫ్ ఇవ్వడానికి నిరాకరించారు. పూర్తి వివరాలతో కౌంటర్ దాఖలు చేయాలని పోలీసులు, ఫిర్యాదుదారులను ఆదేశిస్తూ తదుపరి విచారణను డిసెంబరు 28కి వాయిదా వేశారు. హైకోర్టు రక్షణ ఇచ్చేందుకు నిరాకరించడంతో, తీవ్రమైన హ*త్యాయత్నం కేసులు ఎదుర్కొంటున్న ఎంపీ మిథున్ రెడ్డి అరెస్టు ఖాయమనే ప్రచారం జోరందుకుంది.
