దుబాయి వేదికగా గురువారం కింగ్స్ ఎలెవన్ పంజాబ్, సన్ రైజర్స్ హైదరాబాద్ జట్లు తలపడ్డాయి. టాస్ గెలిచి ముందుగా బ్యాటింగ్ ఎంచుకున్న హైదరాబాద్ కు ఓపెనర్లు అదిరిపోయే ఆరంభాన్ని ఇచ్చారు. పంజాబ్ బౌలర్లపై ఎదురుదాడి చేసిన వార్నర్, బెయిర్ స్టోలు జట్టు స్కోరును పరుగులు పెట్టించారు. వార్నర్ సహకారంతో బెయిర్ స్టో ఆకాశమే హద్దుగా చెలరేగిపోయాడు. 28 బాల్స్ లోనే హాఫ్ సెంచరీ చేసిన బెయిర్ స్టో ఆ తరువాత మరింత వేగంగా ఆడి సెంచరీ వైపు పరుగులు చేశాడు. వీరిద్దరి జోరుతో హైదరాబాద్ 15 ఓవర్లకే 160 పరుగులు చేసింది.
ఇదే అంశం భయపడుతోంది
15 ఓవర్ల వరకు ధాటిగా ఆడిన హైదరాబాద్ అక్కడి నుంచి తడబడింది. ముందుగా వార్నర్(52) పెవిలియన్ చేరగా ఆ వెంటనే బెయిర్ స్టో(97) కూడా పెవిలియన్ చేరాడు. ఇక అక్కడి నుంచి హైదరాబాద్ మిడిల్ ఆర్డర్ సత్తా తెలిసివచ్చింది. మనీష్ పాండే, ప్రియమ్ గార్గ్, అబ్దుల్ సమద్, అభిషేక్ శర్మ వరుసగా పెవిలియన్ చేరారు. మిడిల్ ఆర్డర్ విఫలం చెందడంతో 230 పరుగులకు పైగా చేయవలసిన హైదరాబాద్ కేవలం 201 పరుగులు మాత్రమే చేయగలిగింది. విలియమ్సన్ లాంటి ఆటగాడు కూడా మునుపటి ఫామ్ లో లేకపోవడం కూడా హైదరాబాద్ జట్టును ఇబ్బందుల్లోకి నెట్టింది.
బౌలింగ్ విభాగంలో కూడా టెన్షన్
ఈ సీజన్ లో అద్భుతంగా రాణిస్తున్న పంజాబ్ ఓపెనర్లు లోకేష్ రాహుల్, మయాంక్ అగర్వాల్ ఇన్నింగ్స్ ను దాటిగానే ఆరంభించారు. ఇక్కడే వార్నర్ అద్భుత ఫీల్డింగ్ తో మయాంక్(9) రనౌట్ గా వెనుదిరిగాడు. ఆ తరువాత వచ్చిన సిమ్రాన్ సింగ్ ఒత్తిడి తట్టుకోలేక పెవిలియన్ చేరాడు. తన వల్లే మయాంక్ రనౌట్ అయ్యాడనే ఉద్దేశంతో రాహుల్ క్రీజులో అసహనంగా కదిలాడు. టైమింగ్ లో ఇబ్బందులు ఎదురుకున్న రాహుల్ 11 పరుగులే చేసి ఔట్ అయ్యాడు.
ఈ దశలో క్రీజులోకి వచ్చిన నికోలస్ పురాన్ ఆకాశమే హద్దుగా చెలరేగిపోయాడు. రషీద్ ఖాన్ మినహా హైదరాబాద్ బౌలర్లు తేలిపోవడంతో ఫోర్లు, సిక్సర్లతో విరుచుకుపడ్డాడు. కానీ నాన్ స్ట్రైక్ ఎండ్ లో పురాన్ కు అండగా నిలిచే బ్యాట్సమెన్ కరువయ్యారు. అదే ఒక్క ఆటగాడు సహకరించినా పురాన్ పంజాబ్ ను గెలిపించేవాడేమో. అబ్దుల్ సమద్ వేసిన ఓవర్ లో పురాన్ ఏకంగా 28 పరుగులు చేయడం విశేషం. 37 బాల్స్ లో 5 ఫోర్లు, 7 సిక్సర్ల సాయంతో 77 పరుగులు చేసిన పురాన్ పెవిలియన్ చేరడంతో పంజాబ్ ఓటమి ఖరారయింది. సందీప్ శర్మ, నటరాజన్, ఖలీల్ అహ్మద్, అబ్దుల్ సమద్, అభిషేక్ శర్మలు విఫలమైన చోట రషీద్ ఖాన్ మరోమారు అద్భుత ప్రదర్శన చేశారు. 4 ఓవర్లు వేసిన రషీద్ ఖాన్ కేవలం 12 పరుగులు ఇచ్చి మూడు వికెట్లు తీశాడు. అందులో ఒక మేడిన్ ఓవర్ ఉండటం గమనార్హం.
