తెలుగు చిత్రసీమలో గడిచిన 6 నెలల్లో 76 సినిమాలు థియేటర్లలోకి వచ్చాయి. ఎప్పట్లానే ఈసారి కూడా
సక్సెస్ పర్సంటేజీ 5 శాతం మాత్రమే. అతికొద్ది సినిమాలు మాత్రమే డబ్బులు చూశాయి. చాలా సినిమాలు ఇలా వచ్చి అలా వెళ్లిపోయాయి. అయితే చెప్పుకోదగ్గ విషయం ఏదైనా ఉందంటే, ఈ 6 నెలల్లో షాకులు మాత్రం లేవు. అంటే.. భారీ అంచనాలతో వచ్చి బాల్చీ తన్నేసిన సినిమాలు లేవన్నమాట. అదొక్కటే శుభవార్త.
ఏడాది ప్రారంభంలో సంక్రాంతి కానుకగా క్రాక్, రెడ్, అల్లుడు అదుర్స్ సినిమాలొచ్చాయి. వీటిలో క్రాక్ సినిమా మాత్రమే బ్లాక్ బస్టర్ హిట్టయింది. రెడ్ మూవీ యావరేజ్ అనిపించుకోగా.. అల్లుడు అదుర్స్ సినిమా డిజాస్టర్ అయింది. వీటితో పాటు జనవరిలో వచ్చిన 30 రోజుల్లో ప్రేమించడం ఎలా, బంగారు బుల్లోడు, జై సేన లాంటి సినిమాలన్నీ పోయాయి.
ఫిబ్రవరిలో జాంబీ రెడ్డి హిట్ అవ్వగా, ఉప్పెన సినిమా డబుల్ బ్లాక్ బస్టర్ హిట్ సాధించింది. ఇక ఇదే నెలలో వచ్చిన నాంది సినిమా కూడా హిట్ అనిపించుకోగా.. కపటధారి మాత్రం ఫ్లాప్ అయింది. నితిన్ నటించిన చెక్ సినిమాతో పాటు మిగతా మూవీస్ అన్నీ ఫ్లాప్ అయ్యాయి.
మార్చి నెలలో చెప్పుకోదగ్గ సినిమాలు చాలానే వచ్చాయి. కానీ బ్లాక్ బస్టర్ హిట్ అయింది మాత్రం జాతిరత్నాలు ఒక్కటే. ఇదే నెలలో వచ్చిన రంగ్ దే హిట్ అనిపించుకోగా.. మిగతా సినిమాలన్నీ ఫ్లాప్ అయ్యాయి. ఫ్లాప్ అయిన లిస్ట్ లో అరణ్య, శశి, చావుకబురు చల్లగా, గాలిసంపత్, మోసగాళ్లు, శ్రీకారం, ప్లే బ్యాక్ లాంటి సినిమాలుల చాలానే ఉన్నాయి.
ఏప్రిల్ నెలలో వకీల్ సాబ్ ఒక్కటే ఆడింది. వకీల్ సాబ్ కంటే ముందొచ్చిన వైల్డ్ డాగ్ ఫ్లాప్ అయింది. ఇక ఏప్రిల్ నెల మధ్యలోనే లాక్ డౌన్ పడ్డంతో సినిమా విడుదలలన్నీ నిలిచిపోయాయి. ఓటీటీ విండో మరోసారి తెరుచుకుంది.
ఓటీటీలో ఈ 6 నెలల్లో చాలా సినిమాలు రిలీజ్ అయ్యాయి. వీటిలో ఎక్కువ సినిమాలు సహనాన్ని పరీక్షించాయి. అతికొద్ది సినిమాలు మాత్రమే ఆకట్టుకున్నాయి. అలా క్లిక్ అయిన సినిమాల్లో నెట్ ఫ్లిక్స్ నుంచి సినిమా బండి, జీ5 నుంచి నిన్నిలా నిన్నిలా, అమెజాన్ నుంచి సూపర్ ఓవర్, ఏక్ మినీ కథ లాంటివి కొన్ని ఉన్నాయి. అర్థశతాబ్దం, థ్యాంక్ యు బ్రదర్, బట్టల రామస్వామి బయోపిక్కు లాంటి స్టఫ్ వచ్చినప్పటికీ ఎవ్వరూ పట్టించుకోలేదు.
