ఊరు సెంటిమెంట్ తీసుకొచ్చిన ఫైర్ బ్రాండ్
పరిస్థితులకు తగ్గట్లు వ్యూహాలు మార్చుకున్నప్పుడు మాత్రమే రాజకీయాల్లో రాణించే అవకాశం ఉంటుంది. రొడ్డగొట్టుడు నినాదాలు.. కాలం చెల్లిన ప్లాన్లతో ఎలాంటి ప్రయోజనం ఉండదు. మారుతున్న కాలానికి తగ్గట్లు.. ఓటర్ల కంటే ఒక అడుగు ముందుకు వేసి ఆలోచించిన పార్టీనే రాజకీయాల్లో మనగలుగుతుంది. ఆ విషయంలో గులాబీ బాస్ లెక్కలే వేరుగా ఉంటాయి.
ఎప్పుడు ప్రాంతీయవాదాన్ని వినిపించాలో.. ఎప్పుడు ఆంధ్రా అంటూ సెంటిమెంట్ రాజేయాలో ఆయనకు బాగా తెలుసు. ఇదే ఆయన్ను అధికార పీఠంపై కూర్చోబెట్టడం మాత్రమే కాదు. ప్రత్యర్థి పార్టీలు ఆయన సమీపానికి రాలేని పరిస్థితిని తీసుకొస్తున్నాయి. ఇప్పటివరకు ఆయుధంగా ఉన్న ప్రాంతీయ సెంటిమెంట్ తాజాగా జరుగుతున్న దుబ్బాక ఉప ఎన్నికలకు ఏ మాత్రం అక్కరకు రాదు. అందుకే.. తన సెంటిమెంట్ అస్త్రాన్ని కాస్త మార్చేసి.. ‘ఊరు’ సెంటిమెంట్ ను తెర మీదకు తీసుకొచ్చారు.
దుబ్బాక అంటే మాటలా? అంత పెద్ద కేసీఆర్ చదువుకున్న ఊరు. పుట్టిన ఊరు.. మేనమామ ఊరు.. పిల్లనిచ్చిన మామ ఊరు.. చుట్టాలు ఎక్కువగా ఉన్న ఊరు.. ఇలా ఏ ఊరికి ఆ ఊరుతో తనకున్న రిలేషన్ ను తెర మీదకు తీసుకొచ్చే కొత్త ఫార్ములాకు తెర తీశారు కేసీఆర్.
వాస్తవానికి ఇది పాత అస్త్రమే అయినా.. తనకు అనువుగా మార్చేశారు.
ఈ కొత్త వ్యూహాన్ని తన అమ్ముల పొదిలో ఉన్న హరీశ్ అనే అస్త్రంతో ప్రయోగిస్తున్నారు. ఇప్పటికే టీఆర్ఎస్ లో తనకున్న ట్రబుల్ షూటర్ పేరును అంతకంతకూ ఆక్రమించేస్తున్న కేటీఆర్ పుణ్యమా అని.. తానేమిటో ఫ్రూవ్ చేసుకోవాల్సిన అవసరం ఫైర్ బ్రాండ్ హరీశ్ మీద పడింది. అందునా ఉప ఎన్నిక జరుగుతున్న దుబ్బాక- తాను ప్రాతినిధ్యం వహిస్తున్న సిద్ధిపేట జిల్లాలోనే ఉండటంతో.. ఈ ఎన్నికను ప్రతిష్ఠాత్మకంగా తీసుకున్నారు.
ఇప్పటికే అభ్యర్థి తరపున ప్రచారం చేస్తూ.. మీరు వేసే ఓటు అభ్యర్థికి కాదు.. కేసీఆర్ కు అంటూ ప్రచారం చేయటమే కాదు.. ముఖ్యమంత్రి వారు చదువుకున్న ఊరు మీద ఆయనకు మించిన ప్రేమ ఎవరికి ఉంటుంది చెప్పండి? అంటూ ప్రశ్నిస్తున్నారు. మరి.. ఎర్రవల్లిలో మాదిరి.. సిద్ధిపేటలో మాదిరి అదరగొట్టేలా డెవలప్ చేశారా? అన్న ప్రశ్నకు అవకాశం ఇవ్వకుండా ఆ ఊరుతో గులాబీ బాస్ కున్న అనుబంధాన్ని ఏకరువు పెడుతున్నారు.
ఉద్యమ వేళ దుబ్బాకలో అప్పటి పాలకుల కారణంగా కేసులు పెడితే.. అడ్డుకున్నది ఎవరు? ఆదుకున్నది ఎవరు? అంటూ పాత విషయాల్ని సరికొత్తగా సంధిస్తున్నారు హరీశ్. ఇప్పటివరకు ప్రాంతీయ సెంటిమెంట్ తో ప్రత్యర్థి పార్టీల్ని చెడుగుడు ఆడుకున్న మేనమామకు తానేమీ తీసిపోనన్నట్లుగా ‘‘ఊరు’’ సెంటిమెంట్ తో ఎన్నికల ప్రచారాన్ని అదరగొట్టేస్తున్నారట. మరి.. అదెంత వరకు వర్క్ వుట్ అవుతుందో చూడాలి. దుబ్బాక ఫలితం కానీ కేసీఆర్.. హరీశ్ అనుకున్నట్లు వస్తే.. వచ్చే ఎన్నికల్లో ఏ ఊరికి ఆ ఊరు సెంటిమెంట్ ను తెర మీదకు తెచ్చేఅవకాశం ఉందంటున్నారు.
