నిలిచిన పాల సరఫరా.. వైఎస్ఆర్ సంపూర్ణ పోషణ డీలా

ఏపీ ప్రభుత్వం రెండు నెలల కిందట వైఎస్ఆర్ సంపూర్ణ పోషణ పథకాన్ని ఆర్భాటంగా ప్రారంభించింది. అంగన్వాడీ పాఠశాలలకు వచ్చే చిన్నారులకు, బాలింతలు, గర్భణీలకు ఈ పథకం ద్వారా పోషక ఆహారంతోపాటు పాలు కూడా అందిస్తారు. అయితే, ప్రభుత్వం రెండు నెలలుగా బిల్లులు చెల్లించకపోవడంతో, కర్ణాటక నుంచి టెట్రా ప్యాకెట్ల ద్వారా  పాలు అందిస్తున్న కాంట్రాక్టరు సరఫరా నిలిపి వేశారు. నెల రోజులుగా పాల సరఫరా నిలిచిపోవడంతో ఏపీ సీఎం జగన్మోహన్ రెడ్డి చేతుల మీదుగా ప్రారంభించిన వైఎస్ఆర్ సంపూర్ణ పోషణ పథకం డోలాయమానంలో పడింది.

పోషణ ఎలా?

అంగన్వాడీ కేంద్రాలకు పోషకాహారం సరఫరాలో కేంద్ర, రాష్ట్ర ప్రభుత్వాలు ఖర్చును సమానంగా భరిస్తున్నాయి.   రాష్ట్రంలో గతంలో అంగన్వాడీలకు పోషక ఆహారం సరఫరాతో పాటు, గిరిజనులకు పోషకాహార బుట్ట పేరుతో, బాలింతలు, గర్భీణీలకు అంగన్వాడీ కేంద్రాల్లో శ్రీమంతాలు జరిపించి పోషకాహారం అందించే వారు. వైసీపీ ప్రభుత్వం తాజాగా మరికొన్ని పోషకాలను జోడించి వైఎస్ఆర్ సంపూర్ణ పోషణ, వైఎస్ఆర్ సంపూర్ణ పోషణ ప్లస్ పేరుతో పథకాలను ప్రారంభించింది. ఏపీలో మొత్తం 28 లక్షల మంది చిన్నారులు, బాలింతలు, గర్భీణీలు ఈ పథకం ద్వారా ప్రయోజనం పొందుతున్నారు. గర్భణీల్లో రక్తహీనతను నివారించి శిశు మరణాలు తగ్గించాలనే లక్ష్యంతో ఈ పథకం రూపొందించారు. అయితే, నెల రోజులుగా ఏపీకి పాల సరఫరా నిలిచిపోయింది. కర్ణాటక నుంచి పాలు సరఫరా చేస్తున్న కాంట్రాక్టర్‌కు రూ.200 కోట్ల వరకూ బిల్లులు బకాయిలు పెట్టడంతో సదరు కాంట్రాక్టర్ పాల సరఫరా నిలిపివేశాడని తెలుస్తోంది. కాగా రవాణా ఇబ్బందుల వల్లే కర్ణాటక నుంచి పాలు సరఫరా కావడం లేదని ఏపీ అధికారులు కొత్త భాష్యం చెబుతున్నారు.

జగనన్నా బిల్లులు విడుదల చేయన్నా?

ఏపీ ప్రభుత్వం ప్రాధాన్యతా క్రమంలో పనులు చేయించడంలో విఫలం అయిందని ప్రతిపక్షాల ఆరోపణలు నిజమేననిపిస్తోంది. ఉట్టికి ఎగరలేనమ్మ స్వర్గానికి ఎగిరినట్టు  జీతాలు, డీఏలు కూడా సక్రమంగా చెల్లించలేని ఏపీ ప్రభుత్వం ఒకేసారి రాష్ట్రంలో రూ.80వేల కోట్లతో పలు పనులకు టెండర్లు పిలవడంపై ప్రతిపక్షాలు తప్పు పడుతున్నాయి. నాడు నేడు కార్యక్రమం మొదటి దశ కింద రూ. 3వేల కోట్లతో పనులు చేపట్టారు. మూడో వంతు ప్రభుత్వ పాఠశాలల్లో కాంట్రాక్టర్లు పనులు ప్రారంభించారు. 70 శాతం  పనులు చేసినా ప్రభుత్వం నాలుగోవంతు బిల్లులు కూడా చెల్లించకపోవడంతో వారు పనులు నిలిపి వేశారు. తాజాగా రాష్ట్రంలో రోడ్ల మరమ్మతులకు తక్షణం రూ.300 కోట్లు విడుదల చేస్తున్నామని స్యయంగా ముఖ్యమంత్రి ప్రకటించారు. ఆచరణలో మాత్రం విడుదల చేసింది రూ.30 కోట్లు మాత్రమే. ఇలా ప్రభుత్వ ఆదాయం ఎంత ఉంది, ఎంత ఖర్చు చేయగలం అనే అంచనాలు లేకుండా ఒకేసారి రూ.80 వేల కోట్లతో సచివాలయ భవనాలు, రైతు భరోసా కేంద్రాలు, ఆరోగ్య కేంద్రాలు, నాడు నేడు ద్వారా పాఠశాలల అభివృద్ధి పనులు చేపట్టడంతో అసలు ఈ ప్రభుత్వం కాంట్రాక్టర్లకు బిల్లులు చెల్లింస్తుందా అని ప్రతిపక్ష టీడీపీ నేతలు అనుమానాలు వ్యక్తం చేస్తున్నారు. తాజాగా అంగన్వాడీలకు పాల సరఫరా కూడా నిలిచిపోయింది. రాబోయే రెండు మాసాల్లో ఏపీ ఆర్థిక పరిస్థితి ఎలాంటి సంక్షోభంలోకి దారితీస్తుందోననే ఆందోళనతో కాంట్రాక్టర్లు ఆచితూచి వ్యవహరిస్తున్నారని తెలుస్తోంది.