నవలా రచనలో ఓ ప్రత్యేకమైన ప్రకియ ఉంది. దాన్నే చైతన్య స్రవంతి అంటారు. నవీన్ ‘అంపశయ్య’ ఇలా రాసిందే. ఈ తరహా ప్రక్రియ సినిమాల్లోనూ వచ్చింది. తక్కువ సమయంలోనే కథ ముగియడం. ఇలాంటి ప్రక్రియలోనే తమిళ హీరో కార్తి నటించిన ‘ఖైదీ’ రూపొందింది. ఒక్క రాత్రిలో జరిగే కథతోనే సినిమా ముగిసిపోతుంది. అలాంటి సినిమానే ‘జల్లికట్టు’ కూడా. మలయాళంలో తెరకెక్కిన ఈ సినిమా అక్కడ ఘనవిజయం సాధించింది. అనేక చలన చిత్రోత్సవాల్లో ప్రదర్శించిన ఈ సినిమాకు క్రిటిక్స్ నుంచి అనేక ప్రశంసలు కూడా దక్కాయి. ఈ సినిమా తెలుగులోకి అనువాదమై ఓటీటీ ఫాట్ ఫామ్ ‘ఆహా’ ద్వారా విడుదలైంది. ఈ సినిమా మనల్ని ఎంతవరకు మెప్పిస్తుందో చూద్దాం.
కథ ఏమిటి?
అనంతపురం జిల్లా భైరవకొండ అనే ఊరిలో ఈ కథ జరుగుతుంది. ఆ ఊరిలో విన్సెంట్ అనే వ్యక్తి తన అసిస్టెంట్ ఆంటోనీతో కలిసి ఆ ఊరిలో గొడ్డుమాంసం అమ్ముతుంటారు. ఏదైనా వేడుక జరిగితే గొడ్డు మాంసంతో భోజనం పెట్టడం కూడా ఆ ఊరి ప్రజల అలవాటు. మంచి దున్నపోతులను తీసుకొచ్చి విన్సెంట్ గొడ్డు మాంసం అమ్ముతుంటాడు. అందుకోసం అతను ఓ అడవి దున్నను తెస్తాడు. దాన్ని నరికే క్రమంలో అది తప్పించుకుంటుంది. అది చాలా బీభత్సం సృష్టిస్తుంటుంది. దాన్ని పట్టుకోవడం కోసం ఆ ఊరి ప్రజలు ఎలాంటి ప్రయత్నాలు చేశారు అనేదే ప్రధాన కథ. దాన్ని పట్టుకోడానికి వచ్చిన కుట్టచ్చన్ అనే వ్యక్తి కూడా ఇందులో ప్రధాన పాత్రగా భావించాలి.
ఆంటోనీకీ, కుట్టచ్చన్ కూ ఉన్న గొడవలేంటి అన్నది కూడా మరో ఉపకథ. అడవి దున్నను పట్టుకునే క్రమంలో అది ఏంచేసింది? మనుషులు ఎలా ప్రవర్తించారు? ఆంటోనీ, కుట్టచ్చన్ ల మధ్య ఉన్న గొడవలు ఎలాంటి పరిణామాలకు దారితీశాయి? అనే అంశాలన్నీ ఇందులో ఉంటాయి. మధ్యలో కొన్ని సమాంతర కథలు నడుపుతూనే ముగించారు. ఒకే రోజు జరిగే కథాశంతో సినిమా ముగుస్తుంది. ఒక అడవి దున్నను పట్టుకోడానికి ఆ ఊరిలోని మూడు వర్గాలు ప్రయత్నిస్తాయి. దాన్ని పట్టుకునేవాడే మగాడు అనే ఫీలింగ్ అందరిలోనూ ఉంటుంది. దాన్ని పట్టుకునే క్రమంలో చాలామంది గాయపడతారు.
ఎలా తీశారు?:
ఒక్క మాటలో చెప్పాలంటే ఇది విజువల్ వండర్. దానికి చక్కటి నేపథ్య సంగీతం సమకూరింది. మనిషికీ మృగానికీ ఉన్న తేడా చూపించాలన్నదే దర్శకుడి ప్రయత్నంగా కనిపిస్తుంది. ముఖ్యంగా పతాక సన్నివేశాలతో మనకళ్లకు కనికట్టు చేసేశాడు దర్శకుడు లిజో జోస్ పిల్లిసెరి. చిన్న కథాంశాన్ని పెద్ద సినిమాగా తీయడం దర్శకుడి ప్రతిభే. కానీ తెలుగు నేటివిటీకి ఈ కథ దూరంగా ఉంది. ముఖ్యంగా ఆ పాత్రల్ని మనం జీర్ణించుకోవడం కష్టం. ఎవరు ఏ పాత్ర పోషించారో అర్థంచేసుకోడానికి టైమ్ తీసుకుంటుంది.
మనకు పరిచయం లేని నటులు కావడం వల్ల ఈ పరిస్థితి ఉంది. అడవిలో సంచరించే మృగాలు జనారణ్యంలో ప్రవేశించే మనిషి అంతకన్నా ఎంత పెద్ద మృగంగా మారతాడో కళ్లకు కట్టే చిత్రమిది. వేటాడే విషయంలో మనుషుల మధ్య కూడా ఇలాంటి పోటీ ఉంటుందా అనే సందేహం కూడా మనకు కలుగుతుంటుంది. కేవలం సినిమాటోగ్రఫీ, నేపథ్యం ఈ సినిమాను విజువల్ వండర్ గా నిలబెట్టాయి.
హైలైట్స్:
పతాక సన్నివేశాలు ఈ సినిమాకు హైలైట్. అనాగరిక గ్రామాల్లో వర్గ పోరు ఎలా ఉంటుందన్నది కూడా ఇందులో చూడవచ్చు. ఊరిలో డామినేటింగ్ పాత్ర ఉంటే అతని చుట్టు వందిమాగదులు ఎలా చేరతారో కుట్టచ్చన్ పాత్ర చూస్తే అర్థమవుతుంది. దిగుడు బావిలో అడవి దున్న పడిపోయినపుడు దాన్ని బయటికి తీసే సన్నివేశం అబ్బురపరుస్తుంది. మనిషిలో అంతర్గతంగా ఎలాంటి మృగం ఉంటుందో ఆ ఊరిలోని పాత్రలను చూస్తే అర్థమవుతుంది. కథనంలో బిగువు కనిపిస్తుంది. మనిషి ఆధునిక యుగంలో కూడా ఆదిమానవుడిలా నడుస్తున్నాడని చెప్పడమే దర్శకుడి ఉద్దేశంలో అనిపిస్తుంది. దీన్ని క్లైమాక్స్ చూపించినా ప్రేక్షకులకు అర్థంకాని విధంలా ఉంది. కవి హృదయాన్ని అర్థం చేసుకునేవారికి మాత్రమే అది తెలుస్తుంది.
నటీనటులు : ఆంటోనీ వర్గీస్, చెంబన్ వినోద్ జోస్, సబుమోన్ అబ్దుసామద్
సంగీతం : ప్రశాంత్ పిళ్ళై
సినిమాటోగ్రఫర్ : గిరీష్ గంగాధరన్
ఎడిటర్ : దీపు జోసెఫ్
నిర్మాత : ఓ. థామస్ పానికర్
దర్శకత్వం : లిజో జోస్ పిల్లిసెరి
తెలుగులో విడుదల: ఆహా (25-09-2020)
ఎక్కడ చూడాలి: ఆహా
ఒక్క మాటలో: విజువల్ వండర్ చూడాలనుకునేవారికి మాత్రమే
రేటింగ్: 3
– హేమసుందర్ పామర్తి
