దర్శకుడు శేఖర్ కమ్ముల, సాయిపల్లవి కాంబినేషన్ లో సినిమా అనగానే ఓ విధమైన హైప్ ఉంటుంది. పైగా కరోనా సెకండ్ వేవ్ తర్వాత భారీ అంచనాలతో రిలీజైన సినిమా ఏదైనా ఉంది అంటే అదే లవ్ స్టోరీ మాత్రమే. అక్కినేని నాగ చైతన్య హీరోగా నటించిన ఈ సినిమాని అమిగో క్రియేషన్స్, శ్రీవెంకటేశ్వర సినిమాస్ పతకాంపై నారాయణదాస్ నారంగ్, పుష్కర్ రామ్మోహనరావు నిర్మించారు. ఈ సినిమా ఎలా ఉంది ఏమిటన్నది ఇప్పుడు చూద్దాం.
కథలోకి వెళితే..
తెలంగాణలోని ఆర్మూర్ కు చెందిన పేదింటి కుర్రాడు రేవంత్ (నాగచైతన్య) ఫిట్నెస్ డ్యాన్స్ స్కూల్ పెట్టి జీవితంలో ఎదగాలనుకుంటాడు. అతని దగ్గర ఉద్యోగం చేసేందుకు ఆ ఊరి అమ్మాయి మౌనిక (సాయిపల్లవి) వస్తుంది. అలా ఇద్దరి మధ్యా పెరిగిన పరిచయం ప్రేమగా మారుతుంది. అదే స్కూల్లో ఆమె డ్యాన్స్ మాస్టర్ గా చేరుతుంది. ఇలా వీరి ప్రేమకు కుల వివక్ష ఎలా అడ్డంకిగా మారిందన్నది ప్రధాన కథాంశం. ఈ కుల అడ్డంకిని దాటడానికి వారు ఎలాంటి ప్రయత్నం చేశారు? చివరికి వీరి ప్రేమ కథ ఎలా సుఖాంతమైంది అన్నది తెరమీద చూడాల్సిన అంశం.
ఎలా తీశారు? ఎలా చేశారు?
ఎలాంటి కథ అయినా హృదయానికి హత్తుకునే దర్శకత్వ శైలి శేఖర్ కమ్ముల సొంతం. ముఖ్యంగా ప్రేమ కథలను హృద్యంగా తెరకెక్కించడంలో ఆయనకున్న నైపుణ్యం వేరు. ఈ సినిమా విషయంలో కూడా శేఖర్ కమ్ముల తనదైన శైలిని చూపించాడు. కమర్షియల్ మసాలా అంశాలు ఆయన సినిమాల్లో చాలా తక్కువగా ఉంటాయి. అందుకే హీరో సూపర్ హీరోలా కనిపించడు. ఓ సగటు యువకుడిలానే ఉంటాడు. సంఘంలోని పరిస్థితులు, ఆయా పాత్రల వ్యక్తిత్వం, మాట తీరు లాంటి విషయాల్లో శేఖర్ తీసుకునే ప్రత్యేక శ్రద్ధ ఈ సినిమా విషయంలోనూ కనిపిస్తుంది.
కథను నడపడంలో సహజత్వం కోసం ప్రయత్నించడం వల్ల కథ నిదానంగా సాగుతున్న ఫీల్ కలిగినా దాన్నే ప్రేక్షకులు కూడా కోరుకుంటారు. మెరుపు లాంటి ఇంటర్వెల్ బ్యాంగులు, అరుపులు లాంటి సంభాషణలు లేకుండా సాఫీగా ఈ కథను ఆవిష్కరించగలిగారు. కథ రొటీన్ గా అనిపిస్తుంది. ఇలాంటి కథకు ముగింపు విషయంలో ఇంకాస్త జాగ్రత్తను శేఖర్ తీసుకుని ఉంటే బాగుండేది. సహజత్వం కోసం ప్రయత్నించడం వల్ల సినిమా నిడివి కూడా బాగా పెరిగిపోయింది. కాకపోతే సంభాషణల్లో మాత్రం మెరుపులు మెరిశాయి.
సినిమా ద్వితీయార్థంలో ఓ ముగింపు ఇవ్వాలి కాబట్టి ఆ ఇవ్వడంలో శేఖర్ తడబాటు కనిపిస్తూ ఉంటుంది. అది ద్వితీయార్థం మీద కాస్త పడింది. ఏదో ఊహించుకున్న ప్రేక్షకుడు కాస్త నిరాశ పడక తప్పదు. ఇక సాయి పల్లవి సినిమా అనగానే ఆమె డ్యాన్స్ ల కోసమే జనం థియేటర్ కు వెళుతుంటారు. ఆమె నుంచి జనం ఏమి ఆశించారో అది నెరవేరింది. సాయిపల్లవికి ధీటుగానే నాగచైతన్య డ్యాన్సులు ఉన్నాయి. సారంగ దరియా పాట చిత్రీకరణ చాలా బాగుంది. ఇందులో రెండు పాటలకు విశేషమైన ఆదరణ లభించినట్టే. ఇద్దరి పాత్రలూ మెప్పిస్తాయి. ఇందులో స్టార్స్ కాకుండా పాత్రలే కనిపిస్తాయి.
మరీ ఎక్కువ ఆశ పెట్టుకుని సినిమాకు వెళితే మాత్రం నిరాశ తప్పదు. అలాగే శేఖర్ కమ్ముల ఇంతకుముందు సినిమాను దృష్టిలో పెట్టుకోకుండా సినిమాని చూస్తే మాత్రం మంచి సినిమా చూసిన అనుభూతి కలుగుతుంది. కేవలం సాయిపల్లవి కోసమే వెళితే మాత్రం కచ్చితంగా వారికి ఇది నచ్చితీరుతుంది. ఈశ్వరీరావు నటన బాగుంది. అలాగే దేవయాని కూడా తన పాత్రకు న్యాయం చేసింది. రాజీవ్ కనకాల, ఉత్తేజ్ ఎవరి పరిధిలో వారు నటించారు. క్లైమాక్స్ విషయంలో శేఖర్ ఇంకా జాగ్రత్తలు తీసుకుని ఉంటే బాగుండేది.
నటీనటులు: నాగచైతన్య, సాయిపల్లవి, ఈశ్వరీరావు, దేవయాని, రాజీవ్ కనకాల, ఉత్తేజ్, రావు రమేష్, పోసాని కృష్ణమురళి తదితరులు.
సాంకేంతిక వర్గం: కెమెరా: విజయ్ సి. కుమార్, సంగీతం: పవన్ సీహెచ్., ఎడిటింగ్: మార్తాండ్ కె. వెంకటేష్
నిర్మాతలు: నారాయణ్ దాస్ నారంగ్, పుష్కర్ రామ్మోహన్ రావు
రచన-దర్శకత్వం: శేఖర్ కమ్ముల
విడుదల తేదీ: 24-09-2021
ఒక్క మాటలో: లవర్స్ స్టోరీ
రేటింగ్: 3/5
– హేమసుందర్ పామర్తి
