కరోనా ఎందరికో శాపమైతే కొందరికి మాత్రం వరంగా మారింది. ఆ కొందరిలో అగ్రస్థానంలో ఉన్నది మాత్రం సినిమా రంగంలో ఒక్క రాంగోపాల్ వర్మ మాత్రమే. అందరికీ కరోనా కష్టాలొస్తే వర్మకు మాత్రం కరోనా కాసుల వర్షం కురిపిస్తోంది. ఊరందరిదీ ఓ దారి ఉలిపి కట్టెది ఇంకోదారి అనే మాటను మనం వినే ఉంటాం. ఆ ఉలిపి కట్టె ఎవరంటే సినిమా రంగంలో వర్మ అనే సమాధానమే వినిపిస్తుంది. ఆయన సినిమా తీయాలంటే ఎలాంటి ప్రభుత్వ అనుమతులూ అవసరం లేదు… లాక్ డౌన్ నిబంధనలతో ఆయనకు పనే లేదు. భారీ తారాగణాలు ఉండవు, అంతకుమించి భారీ బడ్జెట్ ఉండనే ఉండదు.
సినిమాని అమరశిల్సి జక్కనలాగా ఆయన చెక్కడం ఉండదు. ఎంచక్కా సినిమా చుట్టేయడమే ఆయన స్కూలు. ఒకప్పుడు వర్మ స్కూల్ అంటే అర్థం వేరు…. ఇప్పుడు వర్మ స్కూలు రూటే సెపరేటు. సినిమా తీయడమంటే మార్కెట్లో వంకాయలు కొనుక్కొచ్చినంత ఈజీ ఆయనకు. మొన్నటికి మొన్న నగ్నంతో దండిగా డబ్బులొచ్చాయి. ఇంట్లో నుంచి బయటకు రాకుండా కరోనా కాపలా ఉంటే వర్మ నగ్నం కోసం వెంపర్లాడిన అరవైలో ఇరవై వాళ్లూ ఉన్నారు. అదే వర్క్ ఫ్రమ్ హోమ్ ధియేటర్ అన్నమాట. ఇక నిన్న పవర్ స్టార్… తిప్పి కొడితే ఈ సినిమా అరగంట కూడా లేదు. పైగా దానికి పవర్ స్టార్ అభిమానులే పెట్టుబడి. పులిని చూసి నక్క వాతపెట్టుకున్నట్టు వర్మను ఆయన కర్మకు వదిలేయకుండా పరాన్నజీవి ఒకటి. ఏతావాతా లాభపడింది మాత్రం వర్మే.
అందరూ మీడియాతో మనకెందుకులే అనుకుంటే అదే మీడియాని ఫ్రీ పబ్లిసిటీకి ఎలా వాడుకోవాలో తెలిసిన జీవి మన ఆర్జీవీ. మున్ముందు పావుగంట సినిమాలు ఆయన తీసి పారేసినా మనం చూడాల్సిందే. కరోనాకు వాక్సిన్ రావాలని కోరుకుంటారా.. రాకూడదని వర్మ కోరుకుంటారా అని బెట్టింగులు కట్టే జీవులు తయారైనా మనం ఆశ్చర్యపోవాల్సిన పనిలేదు. త్వరలోనే ప్రణయ్, అమృతల ప్రేమగాథతో ‘మర్డర్ ’ పేరుతో మనముందుకు రావాలని ఉబలాటపడ్డా బ్రేకులు తప్పలేదు. ఇలాంటి బ్రేకులకు ఆయన భయపడేరకం కాదు. మొండివాడు రాజుకంటే బలవంతుడు అనే మాట వర్మ విషయంలో వర్తిస్తుంది. ఆయన చట్టానికి కళ్లులేవు, మనం చూట్టానికి కళ్లే చాలవు… వెరసి ఇదీ వర్మ పాలసీ.
సాధారణంగా యూట్యూబ్ ఇంటర్వ్యూలకు సినీ ప్రముఖులు రావడం తగ్గించేచేశారు. కానీ వర్మగారు అందుకు భిన్నం. కొత్త యూట్యూబ్ ఛానల్ వారు పిలిచినా ఆయన కాదనరు. పవర్ స్టార్ సినిమా ట్రైలర్ చూట్టానికి ప్రవేశరుసుము పావలా పెట్టి అందరినీ ఆశ్చర్య పరిచారు. పైగా ఇంటర్వ్యూలలో పావలా మీద ప్రశ్నలు వేస్తే ఏమీ ఎరగనట్టు పావలా అంటే ఏమిటి? అంటూ ఎదురు ప్రశ్నలు వేయడం ఒకటి. ఇప్పుడు ఆయన దృష్టి పవర్ స్టార్ సీక్వెల్ మీద పడినట్లు ఉంది. అల్లు మీద ఆయన పెట్టిన తాజా ట్వీటు ఆయన అభిమానులకు మాత్రం ఎంతో స్వీటుగా కనిపిస్తుంటే… మెగా ఫ్యామిలీ మాత్రం రగిలిపోతోంది.
ఏమిటో ఈ ‘అల్లు’డి బంధం?
ఇది చిరంజీవి అల్లుడా మజాకా కథ కాదు. అల్లు పేరుతో మరో సినిమా రూపొందిస్తున్నట్లు ప్రకటించారు. కాంట్రావర్శీలకు కేరాఫ్ అడ్రస్ గా మారిన వర్మ ఈసారి మెగా బామ్మర్దిని టార్గెట్ చేసినట్లు కనిపిస్తోంది. ఆర్జీవీ వరల్డ్ ధియేటర్ నుంచి మరో సంచలనాత్మక సినిమా మరెన్ని వివాదాలకు దారితీస్తుందో చూడాలి. ఊరుకున్నంత ఉత్తమం బోడి గుండంత సుఖం ఉండదన్న సామెతను మెగా కాంపౌండు గుర్తుచేసుకుంటుందా, రాద్దాంతం చేసి మరింత ఫ్రీ పబ్లిసిటీని వర్మకు తెచ్చుపెడుతుందా అన్నది వేచిచూడాలి. ఇక అల్లు సినిమా విశేషాల విషయానికి వస్తే ఇది ఓ పెద్ద స్టార్ బామ్మర్ది కథ. జనరాజ్యం పార్టీ ఏర్పడిన అనంతరం పరిణామాలతో కథ సాగుతుంది. ఇందులోని ప్రధాన పాత్ర రకరకాల ప్లాన్లు అల్లుతుంటుందట. ఈ అల్లుడు ఎంతమాత్రం గిల్లుడో చూడవచ్చంటున్నారు. ఇందులోని పాత్రల పేర్లు కూడా ఎ. అరవింద్, కె. చిరంజీవి, ప్రవన్ కల్యాణ్, ఎ. అర్జున్, ఎ. శిరీష్, కె.ఆర్. చరణ్, ఎన్. బాబు తదితరులు ఉంటారంటున్నారు.
ఎవర్ని ‘మర్డర్’ చేద్దామనో సింగర్ అవతారం
రాంగోపాల్ వర్మకు పాటలు పాడటం కొత్త కాదుగానీ ఆయనకు ఎందుకీ పాట్లో ఎవరికీ అర్థం కాదు. అమృత, ప్రణయ్ ల ప్రేమగాథతో తీస్తున్న ‘మర్డర్’ సినిమా కోసం ఆయన ఓ పాటను కూడా పాడేశారు. ‘పెళ్లాన్ని ప్రేమించడం తప్పా’ అనే పల్లవితో సాగే ఈ పాటను జనం బాగానే ఎంజాయ్ చేస్తున్నారు. కొత్త పాటలేమీ లేకపోవడంతో వర్మ పాట, సినిమాలే జనానికి మంచి కాలక్షేపాన్ని ఇస్తున్నాయి. ఇలా వర్మ తీసే సినిమాలు కొన్ని అయితే, వర్మ మీద తీసే సినిమాలు ఇంకొన్ని. ఈ ‘పరాన్నజీవి’మీద ‘ఆర్జీవీ’ పేరుతో ఇంకో సినిమా రూపొందుతోంది.
‘రోజూ గిల్లేవాడు’ అంటూ దానికో ట్యాగ్ లైన్ ఒకటి. వర్మ పాటలకు తోడు ఆయన మీద రాసే సెటైర్ పాటలను కూడా జనం బాగానే ఎంజాయ్ చేస్తున్నారు. ఈ ఆర్జీవీ సినిమాలో ‘ఓడ్కా మీద ఒట్టు…’ అంటూ ఓ పాటను విడుదల చేయగా 20 లక్షల దాకా వ్యూస్ వచ్చాయి. ఈ సినిమాలో రెండో పాటను ఆదివారం అర్ధరాత్రి విడుదల చేస్తారట… అదేం లెక్కో. జొన్నవిత్తుల రచన, దర్శకత్వంలో ఈ సినిమా తెరకెక్కుతోంది. వీణాపాణి సంగీత దర్శకత్వంలో ఈ సినిమా పాటలు రూపొందాయి. టార్గెట్ చేయడం ఏ ఒక్కరి సొత్తూ కాదని ఈ పరిణామాలు నిరూపిస్తున్నాయి.
