ఫిట్ నెస్ .. ఫిట్ నెస్ .. ఫిట్ నెస్ .. ఇదే తనకి తెలిసిన మంత్రమని రకుల్ చెబుతోంది. అందాన్ని .. ఆరోగ్యాన్ని మరింత పెంచడంలో ఫిట్ నెస్ ప్రధానమైన పాత్రను పోషిస్తూ ఉంటుందని అంటోంది. మాటల్లో చెప్పడమే కాదు . చేతల్లోను చూపిస్తూ ఉంటుంది. ఉంటే సెట్లో .. లేదంటే జిమ్ లో ఉండటమే తప్ప, ఇంట్లో కాలక్షేపం చేయడం రకుల్ కి ఎంతమాత్రం అలవాటు లేని పని. అంతగా కసరత్తును చేస్తుండటం వల్లనే రకుల్ చెక్కుచెదరని అందంతో, నడిచే చందమామలా కనిపిస్తోంది. ఈ అందాలను బంధించని కళ్లు ఉంటాయా అనిపిస్తుంది.
మొదటి నుంచి కూడా రకుల్ కి ఫిట్ నెస్ పై శ్రద్ధ ఎక్కువ. తను అనుకున్న షేప్ వచ్చేవరకు అలా కష్టపడుతూనే ఉంటుంది. అలాగే మానసిక ప్రశాంతతను ఇచ్చే యోగా చేస్తూ ఉంటుంది. అందుకే ఎప్పుడూ ఎలాంటి టెన్షన్లు లేకుండా తడిసిన తామరాకులా కనిపిస్తూ ఉంటుంది. అప్పటి వరకూ జిమ్ చేసి వస్తున్న ఈ ఫొటో చూడండీ .. ఇక్కడ కూడా ఆమె పసుపునీళ్లలో కడిగిన ముత్యంలా .. పూతరేకులన్నీ కలిపి పోతబోసినట్టుగా లేదూ. అందుకే రకుల్ అంటే అభిమానులు వెర్రెత్తిపోయేది .. ఆమె గురించిన కలల్లో తేలిపోయేది.
అందం .. అందుకు తగిన అభినయం రకుల్ సొంతం. అందువలన ఆమె తెలుగులో ఎంత త్వరగా స్టార్ హీరోయిన్ కాగలిగిందో, తమిళంలోను అంతే త్వరగా పాపులర్ అయింది. వరసబెట్టి స్టార్ హీరోల జోడీగా సినిమాలు చేసేసింది .. వీలైనన్ని విజయాలు మూటగట్టుకుంది. ఆ తరువాత ఆమె బాలీవుడ్ పై ఎక్కువగా దృష్టిపెట్టింది. ప్రస్తుతం అక్కడ ఆమె చాలా బిజీ. ఈ మధ్య కాలంలో టాలీవుడ్ నుంచి బాలీవుడ్ కి చాలా మంది హీరోయిన్లు వెళ్లినా, ఈ స్థాయిలో అక్కడ ట్రై చేసినవాళ్లెవరూ లేరనే టాక్ వినిపిస్తోంది. శ్రీదేవి .. జయప్రదల సరసన నిలబడుతుందేమో చూడాలి.
Must Read ;- ఫెమీనా మిస్ ఇండియాగా తెలంగాణ అమ్మాయి!
