గోరంట్ల బుచ్చయ్య చౌదరి తెలుగు దేశం పార్టీలో సీనియర్ మోస్ట్ నేత కిందే లెక్క. పార్టీ ఆవిర్భావం నుంచి ఇప్పటిదాకా పార్టీలో కొనసాగుతున్న అతికొద్ది మంది నేతల్లో గోరంట్ల ముందు వరుసలో ఉండే నేతగా కూడా చెప్పాలి. తూర్పు గోదావరి జిల్లా రాజమహేంద్రవరం కేంద్రంగా రాజకీయాలు నెరపుతున్న గోరంట్ల పేరు తెలియని తెలుగు ప్రజలు ఉండరంటే కూడా అతిశయోక్తి కాదు. రాజమహేంద్రవరం రూరల్ ఎమ్మెల్యేగా కొనసాగుతున్న ఆయన పార్టీలో ఆటుపోట్లను ఎదుర్కొన్నారనే కంటే కూడా.. పార్టీ ప్రాధమ్యాలు, సామాజిక వర్గాల సమీకరణల కారణంగానే ఆయనకు అవకాశాలు దక్కలేదని చెప్పాలి. అయినా కూడా ఏనాడూ అసంతృప్తి వ్యక్తం చేయని ఆయన పార్టీకి వెన్నంటి నడుస్తున్నారు. నాడు ఎన్టీఆర్ అయినా, నేడు చంద్రబాబు అయినా.. పార్టీ అధినేత మాటే వేదవాక్కుగా సాగే నేతగా కూడా గోరంట్లను చెప్పాలి. అయితే ఇటీవల ఆయన పార్టీ అధిష్ఠానంపై అసంతృప్తి వ్యక్తం చేసిన వైనం వైరల్ అయ్యింది. అయితే పార్టీపై ఆయనకున్న నిబద్ధతతో అది చప్పున చల్లారిపోయింది. చంద్రబాబును మరోమారు సీఎంగా చూడాలని, ఏపీలో టీడీపీ మరోమారు అధికారంలోకి రావాలని కలలు గంటున్న గోరంట్ల తన మనోగతాన్ని ఏబీఎన్ ఆంధ్రజ్యోతి ఎండీ వేమూరి రాధాకృష్ణ నిర్వహిస్తున్న ‘ఓపెన్ హార్ట్ విత్ ఆర్కే’లో ఆవిష్కరించారు.
లవ్ అఫైర్నూ చెప్పేశారు
తాజాగా ఆదివారం (అక్టోబర్ 10) రాత్రి ప్రసారం కానున్న ఓపెన్ హార్ట్ విత్ ఆర్కేలో వేమూరి ప్రశ్నలకు గోరంట్ల సమాధానాలు చెప్పారు. సాంతం రాజకీయాలపైనే సాగిన ఈ ఎపిసోడ్లో గోరంట్ల నుంచి పలు ఆసక్తికర అంశాలకు సంబంధించి రాధాకృష్ణ సమాధానాలు రాబట్టారు. కాలేజీ రోజుల్లో గోరంట్ల లవ్ అఫైర్ గురించి కూడా ఈ సందర్భంగా ప్రస్తావనకు రాగా.. ఏమాత్రం మొహమాటం లేకుండానే గోరంట్ల ఒప్పేసుకున్నారు. అంతేకాకుండా కమ్యూనిస్ట్ భావాలు కలిగిన గోరంట్ల లిక్కర్ బిజినెస్ను రన్ చేసిన వైనాన్ని కూడా రాధాకృష్ణ ప్రస్తావించగా.. కమ్యూనిస్ట్ పార్టీలో నాడు లిక్కర్ అమ్మరాదన్న నిబంధనేదీ లేని వైనాన్ని గోరంట్ల బయటపెట్టారు. ఇక పార్టీలో తనకు ఎదురైన అనుభవాలను కూడా ఏమాత్రం ఇబ్బంది పడకుండానే గోరంట్ల బయటపెట్టారు. పార్టీలో సీనియర్ మోస్ట్ నేతగా ఉన్న తననే పట్టించుకోకుంటే ఎలా? రాజమహేంద్రవరంలో పార్టీకి పునాదులు వేసిన తననే విస్మరిస్తే ఎలాగంటూ గోరంట్ల ప్రశ్నించారు. రెండేళ్లుగా పార్టీలో కనబడని తనను అధిష్ఠానం పిలవదా? అంటూ కూడా ఆయన ప్రశ్నించిన తీరు ఆసక్తి రేకెత్తిస్తోంది. ఆదివారం ప్రసారం కానున్న ఈ ఎపిసోడ్కు సంబంధించిన ప్రోమో శనివారం విడుదలైంది. ప్రోమోలోనే ఇన్నేసి అంశాలు ఉంటే.. ఇక ఆదివారం నాటి ఫుల్ ఇంటర్వ్యూలో గోరంట్ల ఇంకెంత ఓపెన్ అప్ అయ్యారోనన్న ఆసక్తి రేకెత్తుతోంది.
Must Read ;- నవ్వుతూనే నరాలు తెంచేశారు