మధ్య తరగతి జీవితాల్లో ఎన్నో మజిలీలుంటాయి. సగటు జీవితానికి అద్దం పట్టే సంఘటనలు చూడాలంటే అవి మధ్యతరగలి జీవితాల్లోనే సాధ్యం. ప్రేమ, కోపతాపాలు, సెటైర్ లు.. ఇలాంటి వన్నీ చాలా మంది అనుభవించి ఉంటారు. వాటిని రంగరించి తీసిన సినిమా ‘మిడిల్ క్లాస్ మెలోడీస్’. భవ్య క్రియేషన్స్ నిర్మించిన ఈ సినిమా ఈ నవంబరు 20 నుంచి అమెజాన్ ప్రైమ్ లో స్ట్రీమింగ్ అవుతోంది. ఈ సినిమా ఎలా ఉందో చూద్దాం.
కథలోకి వెళితే..
సినిమా టైటిల్ లోనే ఇది ఎలాంటి కథో చెప్పేశారు. గుంటూరు నేపథ్యంలో ఈ కథను తెరకెక్కించారు. గుంటూరుకు ఓ 15 కిలోమీటర్ల దూరంలో ఉండే పల్లెటూర్లో కాకా హోటల్ నడిపే కొండలరావు (గోపరాజు రమణ) కొడుకు జీవితమిది. అతని కొడుకు రాఘవ (ఆనంద్ దేవరకొండ) ఓ కల ఉంది. గుంటూరు లో ఓ హోటల్ పెట్టి ఎదగాలనుకుంటాడు. ఈ కాకా హోటల్ లో బొంబాయి చట్నీకి ఎంతో పేరు.
ఇలాంటి చట్నీని గుంటూరు లో వడ్డీస్తే ఎంతో ఎదగవచ్చన్నది రాఘవ కల. కొడుకు చేయాలనుకుంటున్న పనులేవీ తండ్రికి నచ్చవు. ఇలాంటి కలలు కనే రాఘవ వెనక ఓ ప్రేమ కథ కూడా ఉంది. మావయ్య వరసయ్యేనాగేశ్వరరావు కూతురును ప్రేమిస్తాడు. ఆమె పేరు సంధ్య (వర్ష బొల్లమ్మ). ఈ ప్రేమ ప్రయాణం, వ్యాపార కలలు రాఘవ విషయంలో ఎలాంటి ముగింపును ఇచ్చాయి అన్నదే ఈ సినిమా కథ.
ఎలా చేశారు? ఎలా తీశారు?
సహజత్వానికి ఈ సినిమాలో పెద్ద పీట వేశారు. మధ్యతరగతి జీవితాలను కళ్లకు కట్టినట్టు చిత్రీకిరించారు. దర్శకుడు వినోద్ తను అనుభవించిన జీవితాన్ని ఇందులో చూపాలనుకున్నారేమో.. అందుకే కథనం చక్కగా కుదిరింది. ఇంటింటికీ ఇలాంటి ఓ కథ ఉంటుంది. ఇందులో కనిపించే పాత్రలు కూడా సహజంగానే అనిపిస్తాయి. కమర్షియల్ ఫార్మాట్ కన్నా సహజత్వానికి దర్శకుడు ప్రాధాన్యం ఇచ్చాడు.
ముఖ్యంగా ఆనంద్ దేవరకొండకు తండ్రిగా నటించిన గోపరాజు రమణ నటనను చూస్తే మరో చక్కటి నటుడు మనకు దొరికాడని అనిపిస్తుంది. ఇప్పటిదాకా చిన్న చిన్న పాత్రలకే పరిమితమైన గోపరాజు రమణకు ఈ సినిమా తర్వాత పెద్ద పాత్రల్లోకి వెళ్లక తప్పదు. ‘నీదీ నాదీ ఒకే కథ’ సినిమాలో తండ్రి పాత్ర పోషించిన దర్శకుడు దేవీ ప్రసాద్ మాదిరిగా ఈ తండ్రి పాత్ర కూడా జనం మరచిపోలేని విధంగా ఉంటుంది.
సరదా సన్నివేశాలు, కోపతాపాలు, ఉక్రోషాలు లాంటి భావావేశాలన్నీ ఇందులో కనిపిస్తాయి. గుంటూరు కథ కాబట్టి వేషభాషల్లోనూ ఆ జాగ్రత్తలు తీసుకున్నారు. డైలాగ్స్ కూడా ఈ సినిమాకు కీలకంగా మారాయి. సాధారణం జనం ఎలా మాట్లాడుకుంటారో అలానే ఇందులోని మాటలు ఉంటాయి. అందరికీ ఈ సినిమా కనెక్ట్ కావడానికి కారణం ఇదే. ఇప్పటికే గుంటూరు టైటిల్ సాంగ్ కు మంచి పేరొచ్చింది. సంగీతం, కెమెరా, ఎడిటింగ్ అన్నీ ఈ సినిమాకి చక్కగా కుదిరాయి.
హైలైట్స్:
ఈ తక్కువ బడ్జెట్ తో చక్కటి క్వాలిటీతో ఈ సినిమా తీశారు. ఇలాంటి చిన్న సినిమాల అవసరాన్ని ఈ సినిమా మరోసారి గుర్తుచేసింది. ఇప్పటిదాకా అనేక పెద్ద సినిమాలను చేస్తూ వచ్చిన భవ్య క్రియేషన్స్ సంస్థ ఈ మధ్య ఇలాంటి సినిమాల వైపు కూడా దృష్టి పెట్టింది. తెలుగు సినిమా రంగానికి ఇది మంచి పరిణామం. కలర్ ఫోటో సినిమా ఇప్పటికే మంచి విజయంతో దూసుకుపోతోంది. మళ్లీ అదే తరహా విజయాన్ని ఈ ‘మిడిల్ క్లాస్ మెలోడీస్’ కూడా సొంతం చేసుకుందని చెప్పాలి. దర్శకుడు తరుణ్ భాస్కర్ కూడా ఓ మంచి పాత్రను ఇందులో పోషించారు. ఈ పాత్రను కూడా హైలైట్ గా చెప్పుకోవాలి. జనార్ధన్ పసుమర్తి మాటలు మరో ప్రధాన ఆకర్షణ.
నటీనటులు: ఆనంద్ దేవరకొండ, వర్ష బొల్లమ్మ, గోపరాజు రమణ, చైతన్య గరికపాటి, సురభి ప్రభావతి, తరుణ్ భాస్కర్, దివ్య శ్రీపాద
సాంకేతిక వర్గం: సంగీతం : స్వీకర్ అగస్తి, కెమెరా: సన్నీ కూరపాటి, ఎడిటింగ్: రవితేజ గిరిజాల, కథ-మాటలు: జనార్దన్ పసుమర్తి.
నిర్మాత: వి. ఆనంద్ ప్రసాద్, దర్శకత్వం: వినోద్ అనంతోజు
విడుదల: అమెజాన్ ప్రైమ్
విడుదల తేదీ: 20-11-2020
ఒక్కమాటలో: మంచి చట్నీలాంటి సినిమా.
రేటింగ్: 3/5
– హేమసుందర్ పామర్తి