ప్రేగులో కలిగే ఇన్ఫెక్షన్ (Colon Infection) .. ఇది వినడానికి సాధారణ జబ్బులా అనిపించినా.. ప్రతి ఏడాది ఎంతో మంది ఈ వ్యాధికి బలవుతున్నారు. బాలీవుడ్, హాలీవుడ్లలో విలక్షణ నుటుడిగా పేరు గాంచిన ఇర్ఫాన్ ఖాన్ కూడా ఈ ప్రేగు సంబంధిత వ్యాధితో బాధపడడం గమనార్హం. ఏ వ్యాధినైనా అరకట్ట గలిగే శక్తి మన తీసుకునే ఆహారానికి ఉంటుంది. అందుకోసం ఈ వ్యాధి బారినపడకుండా మనల్ని కాపాడే ఆహారాన్ని మన రోజువారి మెనూలో చేర్చుకుంటే సరి. మరి ఈ పెద్ద ప్రేగు ఇన్ఫెక్షన్ని చెక్ పెట్టే ఆహారం ఏంటి? వాటిలోని పోషక గుణాల ఏంటి? వాటినెలా మన ఆహారంలో భాగం చేసుకోవాలో ఇప్పుడు తెలుసుకుందాం రండి..
అసలేంటీ ప్రేగు సంబంధిత వ్యాధి?
మనం తీసుకునే ఏ ఆహారమైన ముందు ప్రేగు భాగంలోకి చేరాల్సిందే. ఈ ప్రేగులలో ఎటువంటి ఇబ్బందికలిగినా.. మన దైనందిక జీవితం అస్తవ్యస్తం అవుతుంది. మన కడుపులోని ప్రేగులు రెండు భాగాలుగా ఉంటాయి. అందులోని చిన్న ప్రేగుకి రక్షణగా దాని చుట్టూ అమరి ఉండే పెద్ద ప్రేగు సంబంధించినది ఈ ఇన్ఫెక్షన్. పెద్ద ప్రేగులోని లోపలి పొర భాగం ఇన్ఫెక్షన్ కారణంగా ఎర్రబడడం లేదా వాయడం వంటిది ఏర్పడుతుంది.
ఇన్ఫెక్షన్కి కారణాలేంటి?
ఇలా ప్రేగు లోపలి పొరపై ఇన్ఫెక్షన్ అవడానికి పలు రకాల కారణాలు ఉన్నాయంటున్నారు నిపుణులు. బ్యాక్టీరియా లేదా వైరస్ లాంటి వల్ల ఇన్ఫెక్షన్ వచ్చే అవకాశాలు ఎక్కువ. వీటితోపాటు.. ఏదైనా శస్త్రచికిత్స అనంతరం లేదా క్యాన్సర్ లాంటి జబ్బులు తగ్గడానికి తీసుకునే చికిత్సల వల్ల కూడా ఈ ఇన్ఫెక్షన్ ఏర్పడే అవకాశాలు ఉన్నాయి. ఏదైనా చికిత్స లేదా శస్ర్తచికిత్స అనంతరం మనలోని రోగనిరోధక శక్తి తగ్గుతుంది. అందువల్ల తెల్ల రక్తకణాల శాతం తక్కువగా ఉంటుంది. ఈ సమయంలో ఇన్ఫెక్షన్ ప్రబలే అవకాశాలు చాలా ఎక్కువ.
ఎలాంటి ఆహారం తీసుకోవాలి?
బొప్పాయి పండు..
కడుపులోని సమస్యలను తొలగించడానికి బొప్పాయి చక్కగా ఉపకరిస్తుంది. మలబద్ధకం లాంటి సమస్యలు కూడా బొప్పాయి వల్ల పరిష్కారమవుతాయి. అంతేకాదు.. ఆహారం అరుగుదల తక్కువగా ఉండడం లాంటి సమస్యను ఎదుర్కొ్ంటున్న వారు కూడా బొప్పాయి తినడం వల్ల నచ్చిన ఆహారాన్ని నిరభ్యత్రంగా తీసుకోవచ్చు. బొప్పాయిలోని ధ్రవాలు (లూబ్రికెంట్స్), ఎంజైములు పెద్ద ప్రేగు లోపలి భాగంలో ఎటువంటి ఇన్ఫెక్షన్లు కలగకుండా కాపాడుతాయి.
మామిడి పండు..
ఎండాకాలం వల్ల ఎంత చిరాకు కలిగినా.. కేవలం మామిడి పండు రుచి కోసం ఎండాకాలాన్ని కోరుకునే వారు లేకపోలేదు. ఒక సీజన్లో మాత్రమే దొరికే ఈ పండు రుచిలోనే కాదు.. పోషక గుణాలలో కూడా రారాజనే చెప్పచ్చు. ఈ పండులో పుష్కలంగా లభించే ఫైబర్ మీ జీర్ణ ప్రక్రియ సమస్యలను తగ్గిస్తుంది. అంతేకాదు.. పెద్ద ప్రేగు లోపలి పొరను శుభ్రపరచి ఇన్ఫెక్షన్ బారిన పడకుండా రక్షణ కల్పిస్తుంది.
అవిసె గింజలు..
జీర్ణప్రక్రియ వ్యవస్థలో చాలామంది ఇబ్బందులు ఎదుర్కొటుంటారు. ఇటువంటి ఇబ్బందులు ఎక్కువ కాలం అలాగే ఉండడం వల్ల ప్రేగు సంబంధిత ఇన్ఫెక్షన్లు వచ్చే అవకాశాలు ఉన్నాయి. వీటికి పరిష్కారం చూపాలంటే అవిస గింజలను మీ ఆహారంలో భాగం చేసుకోండి. వీటిని న్యూట్రియంట్స్, ఫైబర్ మీ జీర్ణప్రక్రియ సజావుగా సాగేలా సహకరిస్తుంది. అంతేకాదు.. కడుపులోని వ్యర్ధ పదార్ధాలను బయటకు నెట్టడంతో ప్రముఖ పాత్ర పోషిస్తుంది.
యాపిల్ పండు..
యాపిల్ పండులోని పోషకాలు గురించి ప్రత్యేకంగా చెప్పాల్సిన పని లేదు. ఇందులో ఫైబర్ పుష్కలంగా లభిస్తుంది. ఇది క్యాన్సర్ కారణాలను నశింపజేస్తాయి. దీనితోపాటు ప్రేగులో ఇన్ఫెక్షన్ లాంటివి చేరకుండా కూడా కాపాడుతుంది. అంతేనా.. ప్రేగు లోపలి భాగంలోని వ్యర్ధ పదార్థాలని తొలగించి జీర్ణవ్యవస్థ పనితీరును మెరగుపరచడంలో సహరిస్తుందీ పండు.
లవంగాలు..
లవంగాలు జీర్ణవ్యవస్థ మెరుగుపరుస్తుందనే విషయం తెలిసిందే. అందుకే రోజువారి వంటకాల్లో చాలామంది లవంగాలను జత చేస్తుంటారు. లవంగాలలోని యాంటి ఆక్సిడెంట్ గుణాలు శరీరంలోకి ప్రవేశించిన బ్యాక్టీరియాను నశింపజేస్తుంది. క్యాన్సర్ కారకాలు వృద్ధి చెందకుండా అడ్డుకోవడంలో లవంగాలు ఉపకరిస్తాయి. కడుపులో అల్సర్స్ వంటి ఏర్పడకుండా కాపాడుతుంది.
అలోవెరా..
అటు అందాన్ని ఇనుమడింపజేయడమే కాదు.. ఇటు ఆరోగ్యానందిస్తుంది కలబంద. శరీరంలో వ్యర్ధపదార్ధాలను తొలగించడంలో సమర్ధవంతంగా పనిచేస్తూ.. చల్లదనాన్ని అందిస్తుంది. దీని వల్ల కడుపులో ఇన్ఫెక్షన్లు చేరే అవకాశాలు తక్కువ. కలబందను జ్యూస్ రూపంలో మీ ఆహార ప్రక్రియలో భాగం చేసుకోవచ్చు.
