నిరుపేదల కలలను సాకారం చేస్తూ కూటమి ప్రభుత్వం మరో చారిత్రాత్మక సంక్షేమ ఘట్టానికి శ్రీకారం చుట్టింది. మాటల ప్రభుత్వం కాదు..చేతల ప్రభుత్వమని నిరూపిస్తూ, విజయవాడ వేదికగా అత్యంత వైభవంగా పేదలకు పట్టాభిషేకం కార్యక్రమాన్ని నిర్వహిస్తోంది. ఉమ్మడి కృష్ణా జిల్లా వ్యాప్తంగా దశాబ్దాలుగా నివాసముంటున్నా ఇళ్లపై ఎలాంటి హక్కులు లేక అల్లాడుతున్న 24,057 పేద కుటుంబాలకు సంపూర్ణ యాజమాన్య హక్కులు కల్పిస్తూ సీఎం చంద్రబాబు నాయుడు తన చేతుల మీదుగా శాశ్వత ఇళ్ల పట్టాలను పంపిణీ చేయనున్నారు. సింగ్‌నగర్‌లోని MBVK స్టేడియం వేదికగా జరిగే ఈ వేడుక ద్వారా సుమారు రూ.24,297 కోట్ల మార్కెట్ విలువైన ఆస్తులపై నిరుపేదలకు సర్వహక్కులు దక్కనున్నాయి.
దశాబ్దాలుగా పెండింగ్‌లో ఉన్న పేదల స్థలాల సమస్యకు కూటమి ప్రభుత్వం అధికారంలోకి వచ్చిన వెంటనే విప్లవాత్మక పరిష్కారం చూపించింది. ప్రత్యేకంగా జీవో 615, జీవో 30, జీవో 306 ద్వారా ఆక్షేపణ లేని ప్రభుత్వ పోరంబోకు భూముల్లో ఉంటున్న వారి స్థలాలను క్రమబద్ధీకరిస్తూ వేగంగా నిర్ణయం తీసుకుంది. దీనివల్ల జిల్లా వ్యాప్తంగా మొత్తం 617 ఎకరాల పరిధిలోని 29.86 లక్షల చదరపు గజాల భూములకు శాశ్వత చట్టబద్ధత లభించింది.
కూటమి ప్రభుత్వ నిర్ణయంతో లబ్ధి పొందుతున్న ఒక్కో పేద కుటుంబానికి బహిరంగ మార్కెట్ విలువ ప్రకారం ఏకంగా రూ.40 లక్షల నుంచి రూ.45 లక్షల వరకు లబ్ధి చేకూరనుంది. ఈ కార్యక్రమం ద్వారా ముఖ్యంగా విజయవాడ నగరంలోని కొండ ప్రాంతాల్లో తరతరాలుగా నివాసముంటున్న నిరుపేదల ఆవేదనకు శాశ్వతంగా ఎండ్‌ కార్డ్ పడనుంది. నియోజకవర్గాల వారీగా విజయవాడ తూర్పులో అత్యధికంగా 7,990 కుటుంబాలకు, పశ్చిమలో 7,465, సెంట్రల్‌లో 5,815 కుటుంబాలకు పట్టాలు అందనున్నాయి. వీటితో పాటు జగ్గయ్యపేటలో 1,135, మైలవరంలో 981, గన్నవరంలో 602, నందిగామలో 54, తిరువూరులో 15 కుటుంబాలకు కూడా శాశ్వత భూహక్కులు కల్పిస్తున్నారు.
ఇటీవల విశాఖపట్నంలో వేలాది కుటుంబాలకు ఉచిత ఇళ్ల పట్టాలు అందించిన స్పీడ్‌తోనే, ఇప్పుడు విజయవాడ నగరంతో పాటు ఎన్టీఆర్, కృష్ణా జిల్లాల పరిధిలోని పేదలకు కూటమి ప్రభుత్వం కొండంత అభయం ఇస్తోంది. సీఎం చంద్రబాబు చేతుల మీదుగా అందుతున్న ఈ పట్టాలతో పేదలకు తమ ఇళ్లపై బ్యాంక్ రుణాలు పొందే వెసులుబాటు లభించడమే కాకుండా, వారి జీవితాల్లో భవిష్యత్తుపై పూర్తి ఆర్థిక భరోసా ఏర్పడనుంది.
