తెలంగాణ ఏపీ ల్లో ఉండే ప్రజలకు కేంద్రప్రభుత్వం సినిమా షూటింగులకు అనుమతి ఇచ్చిందనే వార్త అంత కొత్తగా అనిపించదు. ఎందుకంటే టాలీవుడ్ లో ఆల్రెడీ గతంలోనే అనుమతులు వచ్చాయి. తెలుగు సినీ ప్రముఖులు తెలంగాణ ప్రభుత్వంతో విడతలు విడతలుగా చర్చలు జరిపి మొత్తానికి అనుమతులు సాధించుకున్నారు. పెద్ద దర్శకులు కొందరు ట్రయల్ షూట్స్ చేసి.. ‘ఇదిగో ఇలా జాగ్రత్తగా చేస్తాం’ అంటూ ప్రభుత్వానికి చెప్పారు.. అనుమతులు వచ్చాయి. అయితే చాలా కొద్ది రోజులకే బ్రేకులు పడ్డాయి. టీవీ సీరియళ్ల షూటింగుల్లో పాల్గొన్న పలువురికి కరోనా సోకింది. దెబ్బకు షూటింగులు చాలావరకు నిలిచిపోయాయి.
ఇప్పుడు కేంద్రం అనుమతులు ఇవ్వడం దేశవ్యాప్తంగా సినీ పరిశ్రమకు సంబంధించి మాత్రమే. ఇదివరకే అనుమతి ఉన్న టాలీవుడ్ కు దీని ఎఫెక్ట్ పెద్దగా ఉండదు. కానీ.. కేంద్రం ఉత్తర్వుల్లో మార్గదర్శకాలు మాత్రం.. చాలా విపులంగా స్పష్టంగా ఉన్నాయి. గట్టి నిబంధనలే పెట్టారు.
అయితే ఇక్కడ గమనించాల్సిన విషయం ఏంటంటే.. షూటింగులకు అనుమతులు వచ్చాయి సరే.. షూటింగులు చేసే ధైర్యం సినీ పరిశ్రమ పెద్దలకు ఉన్నదా? అనేది! ఎందుకంటే.. ఏవైపు నుంచి కరోనా ముప్పు ముంచుకు వస్తుందో తెలియదు. ఎన్ని జాగ్రత్తలు తీసుకున్నప్పటికీ.. కరోనాకు అవకాశం లేదని గ్యారంటీ చెప్పడానికి లేదు. అంత ప్రమాదానికి ఎదురు నిలిచి సినిమా షూటింగులు చేయాల్సిన అవసరం ఏముంది? అనేది పలువురి అభిప్రాయంగా ఉంది.
అసలు షూటింగ్ వంటి కార్యక్రమం ఏమీ లేకుండానే సినీ ప్రముఖులు చాలా మంది కొవిడ్ బారిన పడుతున్నారు. అలాంటిది షూటింగ్ కూడా అంటే.. ఏం జరుగుతుందో అనే భయం వారిలో ఉంది. తెలుగు ఇండస్ట్రీకి సంబంధించి.. గతంలో చిరంజీవి, రాజమౌళి, నాగార్జున వంటి వాళ్లంతా తెలంగాణ ప్రభుత్వంతో చర్చలు జరిపి షూటింగులకు అనుమతులు తీసుకున్నారు. కానీ.. ఇప్పటిదాకా చిరంజీవి షూట్ మొదలు కాలేదు. నాగార్జున బిగ్ బాస్ ప్రమోషన్ కోసం మాత్రం షూట్ చేశారు. రాజమౌళికి కరోనా సోకింది. ఇలా పరిస్థితులు నానా రకాలుగా ఉన్నాయి. ఆ సమయంలో ఒక్క బాలకృష్ణ మాత్రమే.. షూటింగులకోసం అనుమతులు అడగలేదు. పైగా.. ‘ఇప్పుడంత తొందరేముంది. కరోనా సమసిపోయే వరకు ఆగవచ్చు కదా’ అనే తరహాలో మాట్లాడారు.
జాగ్రత్తలు చాలా ఎక్కువగా తీసుకునే సినీ ఇండస్ట్రీకి కూడా.. కోవిడ్ షూటింగ్ మార్గదర్శకాల పేరిట ప్రభుత్వం విధించిన నిబంధనలు భారమే. మరి ఇపుడు కేంద్రం అనుమతులు రాగానే.. ఎగబడి షూటింగులు మొదలైపోతాయా? ఇప్పటిలాగానే స్వయం నిషేధం వంటిదే కొనసాగుతుందా? అనేది అర్థం కావడం లేదు.
ఎవరి లాభం వారు చూసుకున్నారా?
గతంలో టాలీవుడ్ ప్రముఖుల.. ప్రభుత్వాల్ని షూటింగులకు అనుమతులు అడిగినప్పుడు.. ఇండస్ట్రీ స్వలాభం మాత్రమే చూసుకున్నారు. ప్రత్యేకించి కొన్ని భారీ బడ్జెట్ చిత్రాలు, ఎక్కువకాలం షూటింగ్ ఆగితే నష్టాలు వస్తాయి గనుక.. పరిమితమైన వనరులతో వాటి పని కొనసాగించడం గురించి, ఆరకంగా నష్టం తగ్గించుకోవడం గురించి వారు ప్రయత్నించారు. నిజానికి, ఇప్పుడు కేంద్రం కూడా అదే ఆలోచనతో అనుమతులు ఇచ్చింది. సినిమా రంగం ప్రభుత్వానికి చాలా పెద్ద ఆదాయ వనరు కాబట్టి.. ఆ రంగం స్తంభించిపోతే ఆదాయం ఆగుతుంది కాబట్టి… అనుమతులు ఇస్తున్నట్టుగా ప్రకాష్ జవదేకర్ స్వయంగా ప్రకటించారు. నిన్న వాళ్లు అనుమతులు అడిగినా.. ఇవాళ కేంద్రం అనుమతులు ఇచ్చినా.. రెండు విధాలుగానూ ‘లాభం’ మాత్రమే కనిపిస్తోంది.
కొన్ని రంగాలు పనిచేయకపోతే వ్యవస్థ స్తంభిస్తుంది. కొన్నింటి ఉత్పాదకత ఆగిపోతే సమాజం మీద తీవ్రమైన ప్రభావం పడుతుంది. అలాంటి రంగాలకు ఎన్ని జాగ్రత్తలు తీసుకుని అయినా.. కొవిడ్ సమయంలో అనుమతులు ఇవ్వడం అవసరం. కొన్ని రంగాలు.. కొన్నేళ్లపాటూ సుషుప్తావస్థలో ఉన్నా.. సమాజం సాధారణ గమనానికి ఇబ్బంది ఉండదు. సినీ రంగం కూడా అలాంటిదే. అలాంటి తార్కికమైన ఆలోచన లేకుండానే.. కేంద్రం షూటింగులకు అనుమతులు ఇచ్చేసిందనే అభిప్రాయం పలువురిలో వ్యక్తం అవుతోంది.
ఈ అనుమతులు వచ్చినంత మాత్రాన పెద్ద సినిమాలు మొదలు కాకపోవచ్చునని, యాక్షన్ కట్ చెప్పే ధైర్యం పెద్ద సినిమాలకు ఉండకపోవచ్చునని పలువురు అభిప్రాయపడుతున్నారు. చిన్న సినిమాల వారు పనిని పునఃప్రారంభించినా.. ఇన్ని జాగ్రత్తలు, నిబంధనల మధ్య మనగలరా? కొవిడ్ నుంచి సురక్షితంగా ఉండగలరానే అనే అనుమానాలు కూడా ప్రజల్లో ఉన్నాయి.
కేంద్రం విడుదల చేసిన మార్గదర్శకాలు స్థూలంగా ఇవే :
- సామాజిక దూరం,కోవిడ్ నిబందనలు పాటిస్తూ చిత్రీకరణలు చేసుకోవాలి.
- ఫేస్ మాస్కులు, షీల్డులు పని ప్రదేశాలు, షూటింగ్ ప్రదేశాల్లో తప్పనిసరి.
- వీలైనంత వరకు 6 అడుగుల దూరాన్ని పాటించాలి.
- తక్కువ సిబ్బందితో చిత్రీకరణ జరిపేలా చర్యలు చేపట్టాలి.
- షూటింగ్ ప్రదేశాలకు ప్రేక్షకులను అనుమతించరాదు.
- స్టూడియోలలో వేర్వేరు యూనిట్లకు వేర్వేరు సమయాలు కేటాయించాలి. రద్దీని నియంత్రించాలి.
- ప్రవేశ, నిష్క్రమణ మార్గాలు వేర్వేరుగా ఉండాలి.
- పరిశ్రమలో హైరిస్క్ కలిగినవారు మరిన్ని అదనపు జాగ్రత్తలు తీసుకోవాలి.
- సెట్లు, మేకప్ గదులు, వ్యానిటీ వ్యాన్లు, టాయిలెట్లను తరచుగా శానిటైజ్ చేయాలి.
- తగినన్ని గ్లౌజులు, మాస్కులు, పీపీఈలు అందుబాటులో ఉంచుకోవాలి.
- కేమేరా ముందు నటించేవారు, నటించే సమయంలో మినహా మిగతా అందరూ విధిగా ఫేస్ మాస్కులు, షీల్డులు ధరించాలి.
- షూటింగ్ వస్త్రాలు, విగ్గులు, మేకప్ మెటీరియల్ ఇతరులతో పంచుకోకుండా నియంత్రించాలి.
- మేకప్ ఆర్టిస్టులు, హెయిర్ స్టైలిస్టులు పీపీఈ కిట్లు ఉపయోగించాలి.
- కెమేరాలు, పరికరాలను ఒకరికంటే ఎక్కువ ఉపయోగించే పక్షంలో.. సిబ్బంది కచ్చితంగా గ్లౌజులు ధరించాలి.
- లేపల్ మైకులను దూరం పెట్టాలి. లేదా వాటి వాడకం వీలైనంతగా తగ్గించాలి.
థియేటర్ల వద్ద …
- సినిమా థియేటర్ల వద్ద, పార్కింగ్ ప్రదేశాల్లో రద్దీ కాకుండా చర్యలు తీసుకోవాలి.
- లోపలికి ప్రవేశించే మార్గాల్లో థర్మల్ స్కానర్లు ఏర్పాటు చేయాలి.
- కోవిడ్-19 జాగ్రత్తలు తెలిపే పోస్టర్లు, సందేశాలు అందుబాటులో ఉంచాలి
- థియేటర్లలో సోషల్ డిస్టెన్సింగ్ అమలు చేస్తూ సీటింగ్ ఏర్పాటు చేయాలి.
- టికెట్ల అమ్మకాల్లో ముట్టుకోవాల్సిన పనిలేకుండా ఆన్లైన్ బుకింగ్స్, ఈ-వాలెట్లు, QR కోడ్ స్కానర్లు వినియోగించాలి.
- తరచుగా పని ప్రదేశాలను, కామన్ ఏరియాను శానిటైజ్ చేస్తూ ఉండాలి
