కరోనా విరామం తరువాత మొదలైన యూఎస్ ఓపెన్ లో సంచనాల పర్వం కొనసాగుతూనే ఉంది. ఇప్పటికే స్టార్ ఆటగాడు అండీ ముర్రే రెండో రౌండ్ లోనే ఇంటిదారి పట్టగా తాజాగా జరిగిన నాలుగో రౌండ్ లో వరల్డ్ నెంబర్ 1 ఆటగాడు జొకోవిచ్ డిస్ క్వాలిఫై అయ్యారు. మ్యాచ్ రూల్స్ ను అతిక్రమించి ఒక మహిళా లైన్ అంపైర్ ను బంతితో కొట్టడంతో నిర్వాహకులు జొకోవిచ్ పై వేటు వేశారు. నోవాక్ కొట్టిన బంతి తగిలి మహిళా లైన్ అంపైర్ నొప్పితో అరుస్తూ నేల మీద పడిపోయారు. వెంటనే నోవాక్ ఆమె వద్దకు పరిగెత్తుకుంటూ వెళ్లి క్షమాపణ చెప్పారు. నోవాక్ క్షమాపణ చెప్పినా ఇంటర్నేషనల్ టెన్నిస్ ఫెడరేషన్ (ఐటీఎఫ్) నిబంధనల ప్రకారం అంపైర్లకు నష్టం చేసిన ఆటగాళ్లపై నిషేధం విధించవచ్చు. దీంతో జొకోవిచ్ బాధతో టోర్నీ నుంచి నిష్క్రమించారు.
ఆ తరువాత నోవాక్ ” జరిగిన ఘటన చాలా బాధ కలిగిస్తోంది. నిర్వేదాన్ని కూడా కలిగించింది. నేను లైన్ అంపైర్ పరిస్థితి గురించి తెలుసుకున్నాను. ఆమె ఆరోగ్యంగా ఉన్నారని నిర్వాహకులు చెప్పారు. థాంక్స్ గాడ్. ఆమెకు తీవ్రమైన నొప్పిని కలిగించినందుకు సారీ చెబుతున్నాను. ఉద్దేశ పూర్వకంగా చేయకపోయినా నేను చేసిన ఈ తప్పుకు క్షమాపణలు చెబుతున్నాను. వ్యక్తిగత భద్రత దృష్ట్యా ఆమె పేరు నేను చెప్పదల్చుకోలేదు. ఆమె క్షేమంగా ఉండటమే మనకు కావాలి” అంటూ ఆయన ఇన్స్టాగ్రామ్ లో పోస్ట్ పెట్టారు.
“నాపై పడ్డ డిస్ క్వాలిఫికేషన్ తో నిరాశకు గురయ్యాను. కానీ ఈ లాంటి ఘటన వల్ల ఓ చక్కని పాఠం నేర్చుకున్నాను. ఆటగాడిగా, మంచి మనిషిగా ఎదిగేందుకు ఈ పాఠం ఉపయోగపడుతోంది. యూఎస్ ఓపెన్ టోర్నీ నిర్వాహకులకు సారీ చెబుతున్నాను. నా ప్రవర్తన వల్ల ఇబ్బంది కలిగిన వారందరికీ నేను క్షమాపణలు చెబుతున్నాను. ఈ కష్ట సమయంలో నాకు అండగా నిలిచిన వారందిరికి ధన్యవాదాలు. అభిమానులు అర్ధం చేసుకుంటారని భావిస్తున్నాను. అందరికీ ధన్యవాదాలు” అంటూ ఓ సందేశాన్ని కూడా నోవాక్ ఇచ్చారు.
#novakdjokovic Novak Djokovic was disqualified from his fourth-round match at the #USOpen2020 after he accidentally hit a line judge with a tennis ball. pic.twitter.com/VJLURT2GIb
— 12BET Malaysia (@12BETOfficial) September 7, 2020
