అధికారంలోకి రావాలని భావించే ఏ రాజకీయ పార్టీ అయినా ప్రభుత్వ వైఫల్యాలను ఎండగట్టాలి. అధికారపార్టీ వైఫల్యాలను ప్రజల వద్దకు తీసుకెళ్లాలి. తమకి అధికారం ఇస్తే ఎలా చేస్తామో ప్రజలకు చెప్పుకోవాలి. అంతే కానీ మాకు మేమే కొట్టుకుచస్తాం. ప్రభుత్వ వైఫల్యాలను పట్టించుకోం అన్న చందంగా తయారైంది…ఏపీ బీజేపీ నేతల తీరు.
ఆ పార్టీకి ఏపీలో ఉన్న ఓటింగ్ శాతం నోటా కన్నా తక్కువ. అయినా పార్టీ పగ్గాలు చేపట్టిన నాయకులు మాత్రం 2024 ఎన్నికల్లో ఏపీలో అధికారం మాదేనని తొడలు కొడతారు. ఆ మాత్రం నమ్మకం ఉండాలి. కాని క్షేత్రస్థాయిలో వార్డు మెంబరుగా కూడా గెలవకుండా, ఏకాఎకిన రాష్ట్రం మొత్తం అధికారంలోకి వస్తామంటే ఎవరు నమ్ముతారు. ఉట్టికి ఎగరలేనమ్మ, స్వర్గానికి ఎగురుతానంటే ఎవరైనా నమ్ముతారా?
మూడు కులాలు, మూడు గ్రూపులు
ఏపీలో బీజేపీ పగ్గాలు కాపు సామాజిక వర్గానికి చెందిన సోము వీర్రాజుకు అప్పగించింది.. కేంద్ర నాయకత్వం. దీంతో కాపులను బీజేపీలోకి తీసుకువస్తే ఆ పార్టీ ఏపీలోనూ బలపడుతుందని ఆశ. కానీ సోమును నమ్ముకుని ఒక్కరంటే ఒక్కరు కూడా ఇంతవరకూ బీజేపీ తీర్థం పుచ్చుకోలేదు. ఇక ఏపీ బీజేపీలో మరో కీలక నేత విష్ణువర్ధన్ రెడ్డి. ఈయన కేవలం టీవీ డిబేట్లకే పరిమితం. పట్టుమని పది మందితో కార్యక్రమం చేసింది లేదు. ఎక్కడా కూడా వార్డు మెంబరుగా కూడా గెలిచిన చరిత్ర లేదు.
వేరెవ్వరూ నోరెత్తద్దు.. ఢిల్లీ బీజేపీ హుకుం!
అయినా వారి సామాజికవర్గాన్ని పోగు చేసి ఏపీ బీజేపీలో ఓ గ్రూపును తయారు చేసుకుంటున్నారనే విమర్శలు వస్తున్నాయి. ఇక పురందేశ్వరి. కేంద్ర మాజీ మంత్రిగా చేసిన ఈమె బీజేపీలో కీలక పదవి సాధించుకున్నారు. బీజేపీ జాతీయ ప్రధాన కార్యదర్శి పదవి దక్కించుకున్నారు. దీంతో ఏపీ బీజేపీ కాపు నేతలకు రుచించలేదు. అమరావతి రాజధానికి కట్టుబడి ఉన్నామని ఆమె ప్రకటించగానే వైసీపీ నెంబరు టు విజయసాయిరెడ్డి విరుచుకుపడ్డారు.
పురందేశ్వరి జాతీయ నేతా? జాతి నేతా? అని ట్వీట్ చేశారు. దీనిపై ఏపీ బీజేపీలోని కాపు నేతలు కనీసం ఖండించలేదు. ఏపీలో బీజేపీ మూడు గ్రూపులుగా చీలిపోయిందనడంలో ఏ మాత్రం సందేహం లేదు. ఏపీలో అందరూ కలసినా ఒక్క ఎమ్మెల్యేను గెలిపించుకునే పరిస్థితి లేదు. అందుకే ఏదో ఒకటి చేసి కేంద్ర నాయకుల దృష్టిలో పడితే, ఏపీలో బీజేపీ ఎక్కడా బోణీ కొట్టకపోయినా, జాతీయ స్థాయిలో ఏదో ఒక పదవి దక్కించుకోవచ్చని ఏపీ బీజేపీ నేతలు తెగ ఆరాటపడుతున్నారు. అంతే కానీ ఏపీలో బీజేపీని అధికారంలోకి తెచ్చేందుకు కులాలను పక్కనపెట్టి పోరాడాలనే నిర్ణయానికి మాత్రం రావడం లేదు.
ఎవరి ఆట వారిదే
ఏపీ బీజేపీలో ఎవరికి వారే బాస్. ఎవరి మాట ఎవరూ వినరు. ఏపీ బీజేపీ అధ్యక్షుడు ఏదైనా పిలుపు ఇస్తే ఎవరూ వినే పరిస్థితి లేదు. అంతర్వేదిలో రధం దహనం చేసినా ఏపీ బీజేపీ అధ్యక్షుడు గుర్రుపెట్టి నిద్ర పోయారు. చివరకు వీహెచ్ పీ, ఆర్ ఎస్ ఎస్, భజరంగ్ దళ్ ఉద్యమానికి పిలుపు నివ్వడంతో సోము నిద్ర వీడారు.
హిందూ దేవాలయాలపై వరుస దాడులు జరుగుతుంటే బీజేపీ నేతలు ఎంత చురుగ్గా ఉండాలి. వారికి చేతి నిండా పని ఉంటుంది. పార్టీని ప్రజల్లోకి తీసుకువెళ్లడానికి ఇదో మంచి అవకాశం కూడా. అయినా వైసీపీ ప్రభుత్వంపై ఈగ వాలితే సోము ఊరుకోరు. ఇక జీవీఎల్ ఉన్నారంటే ఢిల్లీలో వైసీపీ అధికార ప్రతినిధి అనే పేరు మూటగట్టుకున్నారు. అందుకే ఆయనకు కేంద్ర బీజేపీలో ఎలాంటి పదవులు లేకుండా పీకేశారని తెలుస్తోంది.
అయోమయంలో జనసేన శ్రేణులు
ఏపీలో బీజేపీతో జతకట్టడం వల్ల జనసేనకు కలసి వచ్చేది ఏమీ లేదు. జనసేన కార్యకర్తల అండతోనే బీజేపీకి ఎంతో కొంత ప్రయోజనం. బీజేపీతో పోల్చుకుంటే జనసైనికులు పార్టీ లైన్ కు కట్టుబడి పనిచేస్తున్నారని చెప్పుకోవచ్చు. జనసేనకు అధికారం దక్కకపోయినా ప్రజల కోసం చివరి దాకా పోరాటాలు చేస్తామని జనసేనాని పార్టీ ప్రారంభంలోనే చెప్పారు. జనసైనికులు కూడా దానికి కట్టుబడి పనిచేస్తున్నారు. ఎక్కడ కూడా 2024లో అధికారం మాదే అని వారు చెప్పుకోవడం లేదు. కానీ ఏపీలో అరశాతం ఓట్లు కూడా లేని బీజేపీ నేతలు మాత్రం 2024లో అధికారంలోకి వచ్చేది మేమే అని తొడలు కొట్టుకుంటున్నారు.
నమ్మకం ఉంటే మంచిదే కానీ మరీ అంత ఓవర్ కాన్ఫిడెన్స్ పనికిరాదు. ముందు ఏపీ బీజేపీ నేతలంతా కలసి పనిచేయడం ప్రారంభించండి. అప్పుడు ప్రజలు మిమ్మల్ని నమ్మే అవకాశం ఉంది. ఏపీ బీజేపీ అధ్యక్షుడు రాజధాని అంశం కేంద్రానికి సంబంధం లేదంటారు. రాజధాని ఎక్కడైనా పెట్టుకోవచ్చని సెలవిస్తాడు.
మరో జాతీయ నేత పురందేశ్వరి అమరావతే రాజధాని అంటారు. ఇక జీవీఎల్ నరశింహారావు అనే బీజేపీ నేత అయితే రాజధాని అంశం కేంద్ర పరిధిలో లేదని, రాష్ట్ర అంశమని మూడు రాజధానులు పెట్టుకున్నా తమకు అభ్యంతరం లేదంటారు. ఒక్క జెండా కింద ఇన్ని ఎజెండాలు పెట్టుకుని ప్రజల్లోకి ఎలా వెళతారు. ప్రజలు పిచ్చివారు కాదు. ఎవరు ఏం మాట్లాడుతున్నారో గమనిస్తూనే ఉంటారని ఏపీ బీజేపీ నేతలు గుర్తెరిగి ప్రవర్తిస్తే మంచి కాలం ముందు ఉండే అవకాశం ఉంది.
