నందమూరి ఫ్యామిలీతో పరుచూరి బ్రదర్స్ కి ఎంతో అనుబంధం ఉంది. ఎన్టీ రామారావు కెరియర్లో ఘన విజయాలుగా నిలిచిన అనేక చిత్రాలకు పరుచూరి బ్రదర్స్ పనిచేశారు. తమ ఇద్దరిని ‘పరుచూరి బ్రదర్స్’ అని మొదటిసారిగా పిలిచిందే అన్నగారిని వాళ్లు చాలా వేదికలపై చెప్పారు కూడా. బాలకృష్ణ హీరోగా ఎంట్రీ ఇచ్చిన తరువాత ఆయన చేసిన అనేక సినిమాలకి వాళ్లు రచయితలుగా పనిచేశారు. ఆయన కెరియర్లో చెప్పుకోదగిన చిత్రాలను అందించి తమ ప్రత్యేకతను చాటుకున్నారు. అలా వాళ్లు బాలకృష్ణతో కలిసి చేసిన సినిమాలలో ‘కథానాయకుడు’ ఒకటి. ఈ వారం ‘పరుచూరి పాఠాలు’లో ఆ సినిమా గురించి పరుచూరి గోపాలకృష్ణ మాట్లాడారు.
‘కథానాయకుడు’ కథను ముందుగా మేము దర్శకులు ‘బాపయ్య’గారికి చెప్పాము. అప్పట్లో ఆయన దగ్గర మురళి (మురళీమోహన్ రావు గారు) కో – డైరెక్టర్ గా ఉండేవారు. కథ విన్న తరువాత తనకి నచ్చలేదని బాపయ్యగారు అన్నారు. ఆయన అక్కడి నుంచి వెళ్లిపోగానే మురళి వచ్చి ఆ కథను తనకి ఇవ్వమని అడిగారు. నిర్మాత ఎవరని అడిగితే, రామానాయుడుగారు అని చెప్పారు. కథ విషయంలో రామానాయుడిగారిని ఒప్పించడం అంత తేలికైన పనేం కాదు. ఆయన అభిరుచి ఎలా ఉంటుందనేది మాకు బాగా తెలుసు. అందువలన కథ విషయంలోను .. పాత్రల విషయంలోను కొన్ని మార్పులు .. చేర్పులు చేశాము.
అలా కథలో మార్పులు చేసిన తరువాత కబురు చేస్తే మురళి వచ్చారు. అన్నయ్య ఆయనకి కథను వినిపించారు. అంతా అయ్యాక ”ఎలా ఉంది కథ?” అని అన్నయ్య అడిగితే “నేను వినలేదు” అని మురళి అన్నారు. అంతే అన్నయ్యకి కోపం వచ్చేసింది. “పదరా గోపాలకృష్ణ” అంటూ ఆయన పైకి లేచారు. దాంతో “అదికాదు పెద్దబ్బాయ్” అంటూ నేను ఆయనను కూల్ చేయవలసి వచ్చింది. ఆ తరువాత మురళితో పాటు వెళ్లి రామానాయుడుగారికి కథ వినిపించాము. కథ నచ్చడంతో తమ బ్యానర్ పై నిర్మించడానికి ఆయన అంగీకరించారు. ఆ కథలోని ఒక వైవిధ్యభరితమైన పాత్రను నేను చేస్తే బాగుంటుందని నాయుడుగారు అనడంతో, అలాగే చేస్తానని చెప్పాను.
ఆ రోజు రాత్రి మురళి మా ఇంటికి వచ్చారు. “నాయుడుగారు చెప్పిన వేషానికి మీరు కరెక్ట్ కాదండీ .. నేను చాలా ఆలోచించాను .. ఈ విషయాన్ని నేను నాయుడిగారికి చెబితే ఆయన నన్ను తిడతారు .. అందువలన ఈ పాత్రను చేయనని మీరే ఆయనతో చెప్పండి” అన్నారు. ఆ మాటకి నాకు నవ్వు వచ్చింది .. అలాగే చెప్తానులే అన్నాను. మరుసటి రోజు ఆ కథను గురించి నాయుడిగారితో మాట్లాడుతూ, ఆ పాత్రను చేయడం నాకు ఇష్టం లేదన్నట్టుగా చెప్పాను. ఆ వేషాన్ని ఇంకెవరైనా చేస్తే బాగుంటుందని అన్నాను. కానీ నాయుడుగారు ఆ వేషం నేనే వేయాలని పట్టుబట్టారు. నేనే ఆ వేషం వేస్తున్నట్టుగా మురళిని పిలిచి మరీ చెప్పారు” అంటూ ఆ సంఘటనను గుర్తుచేసుకున్నారు.
Must Read ;- ఆ నిర్మాతకి కథ చెప్పనన్నా: పరుచూరి గోపాలకృష్ణ
