పవర్ స్టార్ పవన్ కళ్యాణ్ సినిమాల ఎంపికలో సామాజిక దృక్ఫథం కొట్టొచ్చినట్టు కనిపిస్తోంది. ఆయన పుట్టిన రోజు సందర్భంగా ఇప్పుటికి మూడు పోస్టర్లు విడుదలయ్యాయి. ఈ మూడు పోస్టర్లు చూస్తుంటే కథల ఎంపికలో వపన్ కళ్యాణ్ ప్రత్యేక శ్రద్ధ తీసుకున్నట్లు కనిపిస్తోంది. తన సినిమాల్లో సామాజిక దృక్ఫథానికి ఆయన పెద్ద పీట వేశారన్నది స్పష్టమవుతోంది. జనసేన పార్టీకి అధినేత కాబట్టి ఆ జాగ్రత్తలు సినిమాల ఎంపికలో తీసుకుంటున్నారనుకోవాలి.
2024 ఎన్నికలకల్లా ఆయన ఏ సినిమా విడుదలైనా అందులో ఏదో ఒక సామాజిక సందేశం తప్పేలా లేదు. సినిమాల విషయంలో పవన్ అభిమానులు ఆయన నుంచి మాస్ మసాలా సినిమాలను ఆశిస్తుంటారు. మరి ఈ సినిమాల్లో ఆ మసాలా ఏమేరకు ఉంటుందో చూడాలి. వకీల్ సాబ్ పోస్టర్ ను చూస్తుంటే చట్టం, న్యాయం ప్రజాస్వామ్యానికి రెండు కళ్లు అనే అర్థం స్ఫురించేలా ఉంది. వెనుక బ్యాగ్రౌండులో సత్యమేవ జయతే అంటూ మహాత్ముడు ప్రవచించిన మాటల్ని దించేశారు. హిందీ పింక్ సినిమాని పవన్ కు తగ్గట్టుగా మార్చినట్టు కనిపిస్తోంది.
ఓ చేత్తో లాఠీ, మరో చేత్తో క్రిమినల్ పట్టుకున్న పవన్ కళ్యాణ్ కు కచ్చితంగా సామాజిక దృక్పథం ఉన్న పాత్రే అవుతుంది. ఇక పీఎస్ పీకే 27 విషయానికి వస్తే ఇది ఓ బంది పోటు పాత్ర అంటున్నారు. బందిపోటుకు ఏ సామాజిక దృక్ఫథం ఉంటుంది? రాబిన్ హుడ్ పాత్ర ఏమిటంటే ఉన్నోళ్లను కొట్టి లేనోళ్లకు పెట్టడం. దాన్ని బందిపోటు అనటం కూడా తప్పిదమే అవుతుంది. క్రిష్ దర్శకత్వంలో విరూపాక్షగా ఓ సరికొత్త పాత్రను పవన్ పోషించబోతున్నారన్నది స్పష్టమవుతోంది. చేతికి కంకణం,
బొడ్లో కత్తి… చూస్తుంటే ప్రజా సంక్షేమానికి కంకణం కట్టుకున్న పాత్రగా అనిపిస్తోంది. పవన్, హరీష్ కలయికలో మైత్రీమూవీస్ నిర్మించే సినిమా కూడా జనం మనసు దోచే సినిమానే. ముఖ్యంగా సర్దార్ వల్లభాయ్ పటేల్, సుభాష్ చంద్రబోస్ ల మేలు కలయికగా ఈ కాన్సెప్ట్ పోస్టర్ ను తీర్చిదిద్దారు. సినిమా కథ ఏమిటో చెప్పకనే చెప్పడమే ఈ కాన్సెప్ట్ పోస్టర్ లక్ష్యం. పైగా బైక్ పై పెద్ద బాల శిక్ష ఒకటి. ఇది ఏ తరహా శిక్షో చూడాలి మరి. మొత్తానికి ఓట్టు కొల్లగొట్టే వ్యూహంలో భాగమా ఈ సినిమాలు అనే చర్చ కూడా మొదలైంది.
ఇక సురేందర్ రెడ్డి, రామ్ తాళ్లూరి ల సినిమా కాన్సెప్ట్ ఏమిటో కొద్దిసేపట్లో తెలియవచ్చు. ఇది ఎన్నికల రేసుగుర్రం కూడా అవుతుందేమో. అన్నట్టు మనం గురూజీ సినిమా గురించి మరచిపోయాం అని అనుకోవద్దు. ఆ ప్రకటన కూడా ఈరోజు రావచ్చేమో చూడాలి. మళయాళంలో సూపర్ డూపర్ హిట్ అయిన అయ్యనుమ్ కోషియుమ్ సినిమా పవన్ కళ్యాణ్ కు 29వ సినిమా అవుతుంది. హారికీహాసిని క్రియేషన్స్ ఈ సినిమా నిర్మిచే అవకాశం ఉంది. ఇది కూడా జనసేనకు ప్రచారాస్త్రం కావచ్చు.
