దశాబ్దాల కాలంగా పెడింగ్‌లో ఉన్న ప్రాజెక్టులను పూర్తి చేసి కరవు ప్రాంతాల సాగు, తాగునీటి కల సాకారమైంది. ఏపీ ఇరిగేషన్ రంగ చరిత్రలో ఎన్నడూ లేనివిధంగా కేవలం 48 గంటల వ్యవధిలో రెండు ప్రాజెక్టులు ప్రారంభమై జాతికి అంకితం కావడం ఓ రికార్డు. ఎలాంటి భారీ ప్రకటనలు, ఊకదంపుడు ప్రసంగాలు లేకుండా కేవలం పని చేసి చూపించాలన్న నిబద్ధతతో కూటమి ప్రభుత్వం ఈ అద్భుతాన్ని సుసాధ్యం చేసింది. మాటల కంటే చేతలే గొప్పవని నిరూపిస్తూ, వెలిగొండ మరియు పోలవరం లెఫ్ట్ మెయిన్ కెనాల్‌లను యుద్ధప్రాతిపదికన పూర్తి చేసి రైతన్నల ముఖాల్లో అసలుసలైన ఆనందాన్ని నింపింది చంద్రబాబు ప్రభుత్వం..
ఉమ్మడి ప్రకాశం, నెల్లూరు, కడప జిల్లాల రైతన్నల చిరకాల స్వప్నమైన వెలిగొండ ప్రాజెక్ట్ (పూల సుబ్బయ్య వెలిగొండ ప్రాజెక్ట్) తొలి దశ విజయవంతంగా ప్రారంభమైంది. సుమారు రూ. 7,983 కోట్ల వ్యయంతో చేపట్టిన ఈ ప్రాజెక్ట్ ద్వారా నల్లమల సాగర్‌లో 10.70 టీఎంసీల నీటిని నిల్వ చేసి, తొలి విడతగా 1.19 లక్షల ఎకరాలకు సాగునీరు, దాదాపు 4 లక్షల మందికి తాగునీరు అందించనున్నారు. నల్లమల కొండల గుండా నిర్మించిన 18.8 కిలోమీటర్ల పొడవైన రెండు జంట సొరంగాల మార్గం ద్వారా కృష్ణా జలాలను తరలించి, ఎండిపోయిన భూములకు జీవధారలు పోశారు. దశాబ్దాలుగా అసంపూర్తిగా ఉన్న పనులను పట్టుదలగా పూర్తి చేసి నీటిని విడుదల చేయడం ద్వారా మెట్ట ప్రాంతాల తలరాత పూర్తిగా మారిపోయింది..
గోదావరి జలాలను సద్వినియోగం చేసుకునే దిశగా పోలవరం ప్రాజెక్టులో అత్యంత కీలకమైన లెఫ్ట్ మెయిన్ కెనాల్ ప్రారంభం మరొక మైలురాయిగా నిలిచింది. తూర్పు కనుమలను తొలిచి, క్లిష్టమైన భౌగోళిక ప్రాంతాలను అధిగమిస్తూ ఏలేరు, పంపా, తాండవ నదులను దాటుకుంటూ ఈ ఎడమ కాలువ ద్వారా గోదావరి జలాలు ఉత్తరాంధ్ర దిశగా పరవళ్లు తొడిగాయి. ఈ ఎడమ కాలువ-ఉత్తరాంధ్ర సుజల స్రవంతి అనుసంధానం ద్వారా ఉత్తరాంధ్రలోని దాదాపు 8 లక్షల ఎకరాలకు సాగు, తాగునీటితో పాటు పారిశ్రామిక అవసరాలు శాశ్వతంగా తీరనున్నాయి..
కేవలం రెండు రోజుల వ్యవధిలోనే ఈ రెండు ప్రాజెక్టులు అందుబాటులోకి రావడం వల్ల, ఏపీ వ్యవసాయ రంగం సరికొత్త హరిత విప్లవానికి నాంది పలికినట్లయింది. కేవలం మాటల గారడీలు, ప్రకటనల ఆర్భాటం లేకుండా క్షేత్రస్థాయిలో ఇంజనీరింగ్ నిపుణులు, కూటమి ప్రభుత్వం నిరంతర పర్యవేక్షణతో ఈ అద్భుతం సాధ్యమైందనే చెప్పాలి. దశాబ్దాలుగా పెండింగ్‌లో ఉన్న భూసేకరణ సమస్యలను పరిష్కరించి, అవసరమైన నిధులను సర్దుబాటు చేసి, రాత్రింబవళ్లు శ్రమించి నిర్మించిన ఈ ప్రాజెక్టులు నాయకుల చిత్తశుద్ధికి నిలువెత్తు నిదర్శనంగా నిలిచాయి..
దశాబ్దాల నిరీక్షణ తర్వాత కళ్ల ముందే సాకారమైన ఈ జలయజ్ఞాన్ని చూసి రైతులు భావోద్వేగానికి గురవుతున్నారు. ఎన్నికల హామీలను నెరవేర్చడంలో చేతల ద్వారానే సమాధానం ఇవ్వవచ్చని ఈ రెండు రోజుల పరిణామాలు రాష్ట్ర రాజకీయాలకు స్పష్టమైన సందేశాన్నిచ్చాయి.ఈ రెండు ప్రాజెక్టులు ఆంధ్రప్రదేశ్ భవిష్యత్ వ్యవసాయ ముఖచిత్రాన్ని పూర్తిగా మార్చివేయడం ఖాయం. ఎండిపోయిన భూముల్లో జీవధారలు పారిన ఈ క్షణం, ప్రతీ రైతు గుండెల్లో చిరస్థాయిగా నిలిచిపోయే సువర్ణావకాశంగా మారుతుంది. ఇప్పటివరకు మాటలతో కాలం వెళ్లదీసిన పాలకులకు భిన్నంగా కూటమి ప్రభుత్వం పని చేసి చూపించింది..
